പഹൽഗാം ആക്രമണം: കോൺഗ്രസ് നേതാക്കൾക്ക് കെ.സിയുടെ താക്കീത്; 'പാർട്ടി ലൈനിൽ നിന്ന് മാറി പ്രതികരിച്ചാൽ നടപടി'

'പഹൽഗാം ആക്രമണത്തിൽ കോൺഗ്രസ് പാർട്ടി ലൈനിൽ നിന്ന് മാറി പ്രതികരിച്ചാൽ നേതാക്കൾക്കെതിരെ പദവി നോക്കാതെ നടപടി'

ദില്ലി: പഹൽഗാം ഭീകരാക്രമണവുമായി ബന്ധപ്പെട്ട് നേതാക്കൾക്ക് കടുത്ത താക്കീതുമായി കോൺഗ്രസ് ദേശീയ നേതൃത്വം. പാർട്ടി ലൈനിൽ നിന്ന് മാറി പഹൽഗാം ആക്രമണത്തിൽ പ്രതികരിച്ചാൽ നേതാക്കൾക്കെതിരെ പദവി നോക്കാതെ നടപടിയെടുക്കുമെന്ന് പാർട്ടി സംഘടനാ ജനറൽ സെക്രട്ടറി കെ.സി വേണുഗോപാൽ വ്യക്തമാക്കി. പാർട്ടി പിസിസികൾക്ക് അയച്ച കത്തിലാണ് ഇക്കാര്യം വ്യക്തമാക്കിയത്. പ്രധാനമന്ത്രിക്കെതിരായ എക്‌സ് ഹാൻഡിലിലെ വിമർശനം പാർട്ടിയെ പ്രതിരോധത്തിലാക്കിയതിന് പിന്നാലെയാണ് കെസി വേണുഗോപാലിൻ്റെ നടപടി.

പഹൽഗാം ഭീകരാക്രമണവുമായി ബന്ധപ്പെട്ട് പ്രധാനമന്ത്രിക്കെതിരെ പങ്കുവച്ച ട്വീറ്റ് കോൺഗ്രസ് പിൻവലിച്ചിരുന്നു. ബിജെപിയുടെ ശക്തമായ പ്രചാരണത്തിന് പിന്നാലെയാണ് സമൂഹമാധ്യമമായ എക്സിലെ പോസ്റ്റ് പിൻവലിച്ചത്. ഉത്തരവാദിത്തം കാട്ടേണ്ട  സമയത്ത് പ്രധാനമന്ത്രിയെ  കാണുന്നില്ലെന്നാണ് കോണ്‍ഗ്രസ് എക്സിലെ കുറിപ്പിൽ വിമർശിച്ചത്. പ്രധാനമന്ത്രി മോദിയുടേതിന് സമാനമായ വസ്ത്രധാരണം നടത്തിയ ഉടലിൻ്റെ ചിത്രത്തിൽ തലയുണ്ടായിരുന്നില്ല. Gayab എന്നും ഫോട്ടോയിൽ കുറിച്ചിരുന്നു. പോസ്റ്റ് വലിയ ചർച്ചയായതിന് പിന്നാലെയാണ് പാകിസ്ഥാന്‍റെ  പിആർ ഏജൻറുമാരാണ് കോണ്‍ഗ്രസെന്ന് ബിജെപി തിരിച്ചടിച്ചു. ഇതോടെയാണ് ഇന്ന് രാത്രി വൈകി ഔദ്യോഗിക എക്‌സ് ഹാൻഡിലിൽ നിന്നും പോസ്റ്റ് പിൻവലിച്ചത്.

അതിനിടെ ഇന്ന് ദില്ലിയിലെ വസതിയിൽ സൈനിക മേധാവിമാരുമായും പ്രതിരോധ മന്ത്രി, ദേശീയ സുരക്ഷാ ഉപദേഷ്ടാവുമായും ചർച്ച നടത്തിയ പ്രധാനമന്ത്രി, പഹൽഗാം ആക്രമണത്തിന് തിരിച്ചടി നൽകാൻ സൈനിക മേധാവിമാർക്ക് പൂർണ സമയം നൽകിയതായി പറഞ്ഞിരുന്നു. ലക്ഷ്യം, സമയം, ആക്രമണത്തിൻ്റെ രീതി എന്നിവ നിശ്ചയിക്കാനാണ് സൈനിക വിഭാഗങ്ങൾക്ക് തീരുമാനമെടുക്കാമെന്ന് പ്രധാനമന്ത്രി വ്യക്തമാക്കിയത്. പിന്നീട് ആഭ്യന്തര മന്ത്രി അമിത് ഷായുമായും ആർഎസ്എസ് മേധാവി മോഹൻ ഭഗവതുമായും പ്രധാനമന്ത്രി കൂടിക്കാഴ്‌ച നടത്തി. നാളെ സുരക്ഷ സംബന്ധിച്ച കേന്ദ്രമന്ത്രിസഭാ ഉപസമിതി യോഗത്തിലും പ്രധാനമന്ത്രി പങ്കെടുക്കുന്നുണ്ട്.