ഒടുവിൽ നിതിൻ ഗഡ്കരി തന്നെ സമ്മതിച്ചു, എഥനോൾ ചേർത്ത ഇന്ധനം മൈലേജ് കുറയ്ക്കും; വാഹനം കേടാകുമെന്ന പ്രചാരണം വ്യാജമെന്നും മന്ത്രി

പെട്രോളിൽ എഥനോൾ ചേർക്കുന്നത് വാഹനങ്ങളുടെ മൈലേജ് കുറയ്ക്കുമെന്ന് കേന്ദ്രമന്ത്രി നിതിൻ ഗഡ്കരി സമ്മതിച്ചു. എന്നാൽ, എഞ്ചിന് കേടുപാടുകൾ സംഭവിക്കുമെന്ന പ്രചാരണം വ്യാജമാണെന്നും, ഇന്ധന ഇറക്കുമതി കുറച്ച് രാജ്യത്തെ സ്വയംപര്യാപ്തമാക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.

ന്യൂ‍ഡൽഹി: പെട്രോളിൽ എഥനോൾ ചേർക്കുന്നത് വഴി വാഹനങ്ങളുടെ മൈലേജ് കുറയുന്നുണ്ടെന്ന വസ്‌തുത ഔദ്യോഗികമായി സമ്മതിച്ച് കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി. എഥനോൾ ഇന്ധനത്തിന്‍റെ ഉപയോഗം മൂലം വാഹനങ്ങളുടെ എഞ്ചിനും മറ്റ് ഭാഗങ്ങൾക്കും കേടുപാടുകൾ സംഭവിക്കുന്നുണ്ടെന്ന സോഷ്യൽ മീഡിയയിലെ പ്രചാരണങ്ങൾ പൂർണ്ണമായി തള്ളിക്കളഞ്ഞുകൊണ്ടാണ് മന്ത്രി ഇക്കാര്യം വ്യക്തമാക്കിയത്. 'ദി ഇന്ത്യൻ എക്സ്പ്രസിന്' നൽകിയ പ്രത്യേക അഭിമുഖത്തിലാണ് ഗഡ്കരി സർക്കാരിന്‍റെ എഥനോൾ നയത്തെ പ്രതിരോധിച്ചതും ഭാവി പദ്ധതികൾ വിശദീകരിച്ചതും.

മൈലേജ് കുറയാനുള്ള കാരണം രാസമാറ്റം

പെട്രോളും എഥനോളും തമ്മിലുള്ള കലോറിഫിക്കേഷൻ മൂല്യത്തിലെ വ്യത്യാസമാണ് മൈലേജ് കുറയാൻ പ്രധാന കാരണമെന്ന് മന്ത്രി പറഞ്ഞു. കൂടാതെ ഡൽഹി, മുംബൈ പോലുള്ള നഗരങ്ങളിലെ കനത്ത ട്രാഫിക്കും തുടർച്ചയായ ബ്രേക്കിംഗും മൈലേജ് കുറയുന്നതിന് കാരണമാകുന്നുണ്ട്. എന്നാൽ പൂനെ ആസ്ഥാനമായി പ്രവർത്തിക്കുന്ന ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യയുടെ റിപ്പോർട്ട് പ്രകാരം, 'ഫ്ലെക്സ്-ഫ്യുവൽ' എഞ്ചിനുകൾക്കായി പ്രത്യേകം നിർമ്മിച്ച വാഹനങ്ങളിൽ മൈലേജ് കാര്യക്ഷമത കുറയുന്നില്ല. അതുകൊണ്ട് തന്നെയാണ് രാജ്യം ഫ്ലെക്സ്-എഞ്ചിൻ സാങ്കേതികവിദ്യയിലേക്ക് അതിവേഗം മാറുന്നതെന്നും അദ്ദേഹം കൂട്ടിച്ചേർത്തു.

വാഹനം കേടാകുമെന്നത് വ്യാജ പ്രചാരണം

ഇ20 (E20 - 20% എഥനോൾ ചേർത്ത പെട്രോൾ) ഇന്ധനം കാരണം രാജ്യത്ത് ഒരു കാറിന് പോലും കേടുപാടുകൾ സംഭവിച്ചിട്ടില്ലെന്ന് ഗഡ്കരി ഉറപ്പിച്ചു പറഞ്ഞു. സോഷ്യൽ മീഡിയയിൽ പ്രചരിക്കുന്നത് ബോധപൂർവ്വം ചമച്ചെടുത്ത വ്യാജ വാർത്തകളാണ്. നിരവധി ഘട്ടങ്ങളിലെ കടുത്ത പരിശോധനകൾക്ക് ശേഷമാണ് കഴിഞ്ഞ വർഷം ഇ20 ഇന്ധനം രാജ്യവ്യാപകമായി അവതരിപ്പിച്ചത്.

പഴയ വാഹനങ്ങളിൽ ഉണ്ടായേക്കാവുന്ന ചെറിയ തേയ്മാനങ്ങൾ പരിഹരിക്കാൻ വാഹന നിർമ്മാതാക്കൾക്ക് കൃത്യമായ നിർദ്ദേശം നൽകിയിട്ടുണ്ട്. പഴയ കാറുകളുടെ സർവീസിംഗ് സമയത്ത്, മെറ്റൽ വാഷറുകൾക്ക് പകരം പുതിയ റബ്ബർ വാഷറുകൾ യാതൊരു അധിക ചിലവുമില്ലാതെ ഉപഭോക്താക്കൾക്ക് മാറ്റി നൽകുന്നുണ്ട്. മാത്രമല്ല, എഥനോളിന് ആന്‍റി-നോക്കിംഗ് ഗുണങ്ങളും ഉയർന്ന ഒക്ടേൻ നമ്പറും ഉള്ളതിനാൽ ഇത് വാഹനങ്ങളുടെ പെർഫോമൻസ് വർദ്ധിപ്പിക്കുകയാണ് ചെയ്യുന്നത്. ടാറ്റ, മഹിന്ദ്ര, ഹ്യുണ്ടായ്, ടൊയോട്ട, മാരുതി സുസുക്കി തുടങ്ങിയ മുൻനിര കമ്പനികൾ ഇപ്പോൾ ഫ്ലെക്സ്-ഫ്യുവൽ മോഡലുകൾ നിർമ്മിക്കുന്നുണ്ടെന്നും മന്ത്രി ചൂണ്ടിക്കാട്ടി.

ഇന്ധന ഇറക്കുമതിക്ക് അന്ത്യമാകും

പശ്ചിമേഷ്യയിലെ നിലവിലെ രാഷ്ട്രീയ അസ്ഥിരതകൾ കണക്കിലെടുക്കുമ്പോൾ വിദേശ ഫോസിൽ ഇന്ധനങ്ങളെ ആശ്രയിക്കുന്നത് കുറയ്ക്കേണ്ടത് അത്യന്താപേക്ഷിതമാണെന്ന് മന്ത്രി ഓർമ്മിപ്പിച്ചു. ഇതിനായി വൻ പദ്ധതികളാണ് സർക്കാർ അണിയറയിൽ ഒരുക്കുന്നത്. കർണാടകയിൽ അശോക് ലെയ്‌ലൻഡുമായി സഹകരിച്ച് 15 ശതമാനം മെഥനോൾ-ഡീസൽ മിശ്രിതത്തിൽ 25 ബസുകൾ വിജയകരമായി പരീക്ഷണ ഓട്ടം നടത്തി. ഡീസലിന് ലിറ്ററിന് 110 രൂപയുള്ളപ്പോൾ, അസം പെട്രോ-കെമിക്കൽസ് വെറും 20-22 രൂപയ്ക്കാണ് മെഥനോൾ ഉത്പാദിപ്പിക്കുന്നത്.

എഥനോളിൽ നിന്ന് വേർതിരിച്ചെടുക്കുന്ന ഐസോ-ബ്യൂട്ടനോൾ ട്രാക്ടറുകൾ, കൊയ്ത്തുയന്ത്രങ്ങൾ, നിർമ്മാണ ഉപകരണങ്ങൾ എന്നിവയിലെ ഡീസലിന് പകരമായി ഉപയോഗിക്കാം (എഥനോൾ നേരിട്ട് ഡീസൽ എഞ്ചിനുകളിൽ ഉപയോഗിക്കാൻ കഴിയില്ല). ജനറേറ്ററുകൾ സിഎൻജി, എഥനോൾ, മെഥനോൾ എന്നിവയിലേക്ക് മാറ്റും. നിലവിൽ പ്രതിവർഷം 2 ലക്ഷം കോടി രൂപയുടെ ഫോസിൽ ഇന്ധനമാണ് ഇന്ത്യ ഇറക്കുമതി ചെയ്യുന്നത്. തദ്ദേശീയ ഇന്ധനങ്ങളിലേക്ക് മാറുന്നതോടെ ഈ ഭീമമായ തുക ലാഭിക്കാനും മലിനീകരണം ഗണ്യമായി കുറയ്ക്കാനും സാധിക്കും. ഇന്ത്യയെ ഇന്ധന സ്വയംപര്യാപ്തതയിലേക്ക് നയിക്കുകയാണ് ലക്ഷ്യമെന്ന് വ്യക്തമാക്കിക്കൊണ്ടാണ് മന്ത്രി തന്‍റെ വാക്കുകൾ അവസാനിപ്പിച്ചത്.