അമ്പലത്തില്‍ പോകുന്നതിനിടെ ഡിജെ, ശബ്ദം താങ്ങാനായില്ല; നെഞ്ചുവേദനയെ തുടർന്ന് യുവതി മരിച്ചു

ട്രാക്ടർ ട്രോളിയിൽ ഘടിപ്പിച്ചിരുന്ന ഡി.ജെ സിസ്റ്റത്തിൽ നിന്നുള്ള അമിത ശബ്ദത്തെത്തുടർന്ന് കടുത്ത നെഞ്ചുവേദന അനുഭവപ്പെട്ട ഉത്തർപ്രദേശ് സ്വദേശിയായ യുവതി ക്ഷേത്രത്തിലേക്കുള്ള യാത്രയ്ക്കിടെ മരിച്ചു

ലക്ക്നൗ: ട്രാക്ടർ ട്രോളിയിൽ ഘടിപ്പിച്ചിരുന്ന ഡി.ജെ സിസ്റ്റത്തിൽ നിന്നുള്ള അമിത ശബ്ദത്തെത്തുടർന്ന് കടുത്ത നെഞ്ചുവേദന അനുഭവപ്പെട്ട ഉത്തർപ്രദേശ് സ്വദേശിയായ യുവതി ക്ഷേത്രത്തിലേക്കുള്ള യാത്രയ്ക്കിടെ മരിച്ചു. ക്ഷേത്ര ദർശനത്തിനായി ആളുകൾക്കൊപ്പം ട്രാക്ടർ ട്രോളിയിൽ യാത്ര ചെയ്യുകയായിരുന്നു യുവതി. ട്രോളിയിൽ വളരെ ഉയർന്ന ശബ്ദത്തിൽ ഡി.ജെ വച്ചിരുന്നു.

അമിതമായ ശബ്ദവും പ്രകമ്പനവും കാരണം യുവതിക്ക് കടുത്ത നെഞ്ചുവേദനയും അസ്വസ്ഥതയും അനുഭവപ്പെടുകയായിരുന്നു. അവസ്ഥ ഗുരുതരമായതിനെ തുടർന്ന് ഉടൻ തന്നെ ആശുപത്രിയിൽ എത്തിക്കാൻ ശ്രമിച്ചെങ്കിലും വഴിമധ്യേ യുവതിക്ക് ജീവൻ നഷ്ടപ്പെടുകയായിരുന്നു. ഡി.ജെ അമിത ശബ്ദത്തിൽ പ്രവർത്തിപ്പിച്ചതാണ് യുവതിയുടെ പെട്ടെന്നുള്ള ആരോഗ്യപ്രശ്നങ്ങൾക്കും മരണത്തിനും കാരണമായതെന്ന് ബന്ധുക്കൾ ആരോപിച്ചു.