'മയക്കുമരുന്ന് അമിതമായി ചെല്ലുമ്പോഴുള്ള വെപ്രാളം'; രാഹുൽ ഗാന്ധിക്കെതിരെ അധിക്ഷേപവുമായി ആർ. ശ്രീലേഖ

ദില്ലി സമരത്തിനിടെ രാഹുൽ ഗാന്ധിക്കെതിരെ കടുത്ത അധിക്ഷേപവുമായി ബിജെപി നേതാവ് ആർ. ശ്രീലേഖ രംഗത്തെത്തി. മയക്കുമരുന്ന് അമിതമായി ഉപയോഗിച്ചാലുള്ള വെപ്രാളമാണ് രാഹുൽ കാണിക്കുന്നതെന്ന് അവർ ആരോപിച്ചു. കൂടാതെ തന്റെ രാജി വാർത്തകൾ തള്ളിയ ശ്രീലേഖ, മരണം വരെ ബിജെപിയിൽ തുടരുമെന്നും വ്യക്തമാക്കി.

ദില്ലി: സമരത്തിനിടെ കോൺഗ്രസ് നേതാവ് രാഹുൽ ഗാന്ധിക്കെതിരെ അധിക്ഷേപ പരാമർശവുമായി ബിജെപി നേതാവ് ആർ. ശ്രീലേഖ. മയക്കുമരുന്ന് അമിതമായി ഉള്ളിൽ ചെല്ലുമ്പോഴുള്ള വെപ്രാളവും താണ്ഡവവുമാണ് രാഹുൽ ഗാന്ധി ദില്ലിയിൽ കാണിക്കുന്നതെന്ന് അവർ ആരോപിച്ചു. പുനലൂരിൽ സംഘടിപ്പിച്ച ബിജെപി പ്രതിഷേധ ജനസഭയിൽ സംസാരിക്കുകയായിരുന്നു ആർ. ശ്രീലേഖ.

കഴിഞ്ഞ ദിവസങ്ങളിൽ ശ്രീലേഖയുടെ രാജി തീരുമാനവും പിന്മാറ്റവും വിവാദമായിരുന്നു. പിന്നാലെ വിശദീകരണവുമായി അവർ രം​ഗത്തെത്തി. കൗൺസിലർ ആയി തുടരുമെന്നും മരിക്കും വരെ ബിജെപിയിൽ ഉണ്ടാകുമെന്നും ശ്രീലേഖ വ്യക്തമാക്കി. അതേസമയം, ദേശീയ വനിതാ കമ്മീഷൻ ആക്കാത്തതിലുള്ള പ്രതിഷേധമാണ് രാജിക്ക് പിന്നിലെന്ന വാർത്ത തള്ളുകയും ചെയ്തു. സസ്നേഹം ശ്രീലേഖ എന്ന യൂട്യൂബ് ചാനലിലൂടെയാണ് വിശദീകരണം.

താൻ ആശുപത്രിയിൽ ചികിത്സയിലായിരുന്നു. തന്നെ മോശമാക്കാനുള്ള ശ്രമങ്ങളാണ് നടന്നത്. ബിജെപി അംഗത്വം എടുത്തത് മുതൽ മാധ്യമങ്ങൾ ചൊറിയുകയാണ്. തെരഞ്ഞെടുപ്പ് കാലത്ത് ഇത് ഒരുപാട് നേരിട്ടു. താൻ കൂടി ഉൾപ്പെട്ട സമിതിയാണ് മേയറെയും ഡെപ്യൂട്ടി മേയറെയും തെരഞ്ഞെടുത്തത്. താനൊരു മോദി ഭക്തയാണെന്നും മറ്റൊരു പാർട്ടിയിലേക്കും പോകില്ലെന്നും ശ്രീലേഖ വിശദീകരിച്ചു. മരിക്കുംവരെ ബിജെപിയിൽ തുടരും. കോൺഗ്രസിലേക്ക് പോകും എന്നത് അസംബന്ധമാണെന്നും അവർ യുട്യൂബ് ചാനലിലൂടെ വ്യക്തമാക്കി.