തടിപ്പാത്രങ്ങൾ വൃത്തിയാക്കാൻ ഇതാ ചില എളുപ്പവഴികൾ

പലതരത്തിലുള്ള പാത്രങ്ങൾ നമ്മൾ അടുക്കളയിൽ ഉപയോഗിക്കാറുണ്ട്. അതിൽ ഒന്നാണ് തടിപ്പാത്രങ്ങൾ. ഇത് വൃത്തിയാക്കുന്നത് കുറച്ചധികം സമയം ചിലവഴിക്കേണ്ടി വരുന്ന ജോലിയാണ്.

പാത്രങ്ങൾ എപ്പോഴും കഴുകി വൃത്തിയാക്കി സൂക്ഷിക്കുന്നതാണ് അടുക്കളയിലെ ഏറ്റവും കൂടുതൽ തിരക്കു പിടിച്ച പണി. എന്നാൽ അടുക്കള പാത്രങ്ങൾ എപ്പോഴും വൃത്തിയാക്കി സൂക്ഷിക്കേണ്ടത് വളരെ പ്രധാനമാണ്. ഇതിൽ ഭക്ഷണാവശിഷ്ടങ്ങൾ പറ്റിയിരുന്നാൽ അണുക്കൾ പെരുകുകയും അതുമൂലം അസുഖം ഉണ്ടാവുകയും ചെയ്യുന്നു. പലതരത്തിലുള്ള പാത്രങ്ങൾ നമ്മൾ അടുക്കളയിൽ ഉപയോഗിക്കാറുണ്ട്. അതിൽ ഒന്നാണ് തടിപ്പാത്രങ്ങൾ. ഇത് വൃത്തിയാക്കുന്നത് കുറച്ചധികം സമയം ചിലവഴിക്കേണ്ടി വരുന്ന ജോലിയാണ്. തടിപ്പാത്രങ്ങൾ എളുപ്പത്തിൽ വൃത്തിയാക്കാൻ ഇങ്ങനെ ചെയ്തുനോക്കു.

ഉപ്പുകൊണ്ട് വൃത്തിയാക്കാം

ചെറുചൂട് സോപ്പ് വെള്ളത്തിൽ തടിപ്പാത്രങ്ങൾ നന്നായി കഴുകിയെടുക്കണം. ഇത് അണുക്കളെ നശിപ്പിക്കാൻ സഹായിക്കുന്നു. ശേഷം അതിലേക്ക് കുറച്ച് ഉപ്പ് വിതറി നാരങ്ങ ഉപയോഗിച്ച് നന്നായി ഉരച്ച് കഴുകിയാൽ മതി. ഇത് കറയെയും ദുർഗന്ധത്തെയും ഇല്ലാതാക്കുന്നു.

നാരങ്ങ ഉപയോഗിക്കാം

പറ്റിപ്പിടിച്ച കറയും അണുക്കളെയും ഇല്ലാതാക്കാൻ നാരങ്ങ ഉപയോഗിക്കുന്നത് നല്ലതാണ്. വെള്ളം ചൂടാക്കിയതിന് ശേഷം അതിലേക്ക് നാരങ്ങ പിഴിഞ്ഞ് ഒഴിക്കാം. ശേഷം പാത്രം അതിലേക്ക് മുക്കിവെച്ചാൽ മതി. 10 മിനിറ്റ് അങ്ങനെ തന്നെ വെച്ചതിന് ശേഷം നന്നായി കഴുകിയെടുക്കാം.

ബേക്കിംഗ് സോഡ

ബേക്കിംഗ് സോഡയും നാരങ്ങയും ഉപയോഗിച്ച് തടിപ്പാത്രങ്ങൾ വൃത്തിയാക്കാൻ സാധിക്കും. പാത്രത്തിലേക്ക് കുറച്ച് ബേക്കിംഗ് സോഡ വിതറിയതിന് ശേഷം അതിലേക്ക് നാരങ്ങ പിഴിഞ്ഞൊഴിക്കാം. ശേഷം തുണി ഉപയോഗിച്ച് നന്നായി ഉരച്ച് കഴുകിയാൽ മതി.

വിനാഗിരി ഉപയോഗിക്കാം

തടിപ്പാത്രങ്ങളിൽ കറപ്പറ്റിയിരുന്നാൽ വൃത്തിയാക്കാൻ ബുദ്ധിമുട്ടാണ്. എന്നാൽ വിനാഗിരി ഉപയോഗിച്ച് ഇത് എളുപ്പത്തിൽ വൃത്തിയാക്കാൻ സാധിക്കും. ഒരേ അളവിൽ വെള്ളവും വിനാഗിരിയും ചേർത്തതിന് ശേഷം അതിലേക്ക് പാത്രങ്ങൾ മുക്കിവയ്ക്കാം. രാത്രി മുഴുവൻ അങ്ങനെ തന്നെ വെച്ചതിന് ശേഷം നന്നായി കഴുകിയെടുത്താൽ മതി.