ഇരുമ്പ് ദണ്ഡും മാരകായുധങ്ങളുമായി ദമ്പതികളുടെ വീട് ആക്രമിച്ചു

വീടിന് സമീപത്തെ ആള്‍ത്താമസമില്ലാത്ത പറമ്പില്‍ തമ്പടിച്ചിരുന്ന സാമൂഹ്യവിരുദ്ധര്‍ വീടിന് നേര്‍ക്ക് ആക്രമണം നടത്തുകയായിരുന്നുവെന്ന് ദമ്പതികള്‍

ആലപ്പുഴ: ദമ്പതികളുടെ വീടിന് നേരെ സാമൂഹ്യവിരുദ്ധരുടെ അക്രമണം. പുന്നപ്ര വടക്ക് പഞ്ചായത്ത് 15-ാം വാര്‍ഡില്‍ കല്ലുപുരക്കല്‍ വീട്ടില്‍ ആര്യ- രാജേഷ് ദമ്പതികളുടെ വീടിന് നേരെയാണ് കഴിഞ്ഞ ദിവസം ആക്രമണം ഉണ്ടായത്. സമീപത്തെ ആള്‍ത്താമസമില്ലാത്ത പറമ്പില്‍ തമ്പടിച്ചിരുന്ന സാമൂഹ്യവിരുദ്ധര്‍ വീടിന് നേര്‍ക്ക് ആക്രമണം നടത്തുകയായിരുന്നുവെന്ന് ദമ്പതികള്‍ പൊലീസിന് നല്‍കിയ പരാതിയില്‍ പറയുന്നു. 

അക്രമികള്‍ ഇരുമ്പ് ദണ്ഡും മാരകായുധങ്ങളുമായി എത്തി രാജേഷിനെയും തടയാന്‍ ശ്രമിക്കവേ സഹോദരന്‍ ജയേഷിനെയും ക്രൂരമായി മര്‍ദ്ദിക്കുകയായിരുന്നു. യാതൊരു പ്രകോപനവും കൂടാതെയായിരുന്നു ആക്രമണമെന്ന് രാജേഷ് പറഞ്ഞു. സംഭവത്തില്‍ പുന്നപ്ര പൊലീസ് കേസെടുത്തു.