ഒമാൻ തീരത്ത് അപൂർവ്വയിനം തിമിം​ഗലം ചത്ത് കരക്കടിഞ്ഞു

അൽ ജാസിർ തീരത്താണ് കഴിഞ്ഞ ദിവസം അറേബ്യൻ കടൽ കൂനൻ തിമിം​ഗലം കരക്കടിഞ്ഞത് 

മസ്കത്ത്: ഒമാന്റെ അൽ വുസ്ത ​ഗവർണറേറ്റിൽ അറേബ്യൻ കടൽ കൂനൻ തിമിം​ഗലം ചത്ത് കരക്കടിഞ്ഞു. ​ഗവർണറേറ്റിലെ അൽ ജാസിർ തീരത്താണ് കഴിഞ്ഞ ദിവസം തിമിം​ഗലം കരക്കടിഞ്ഞത്. അപൂർവവും വംശനാശ ഭീഷണി നേരിടുന്നതുമായ സസ്തനിയാണ് അറേബ്യൻ കടൽ കൂനൻ തിമിം​ഗലം. ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചറിന്റെ റെഡ് ലിസ്റ്റിൽ ഇവയെ ഉൾപ്പെടുത്തിയിട്ടുണ്ട്. റോയൽ ഒമാൻ പോലീസ്, വാലി ഓഫിസ്, കൃഷി, മത്സ്യബന്ധനം, ജല വിഭവ മന്ത്രാലയം എന്നിവയുടെ അധികാരികൾ സംയുക്തമായി അന്വേഷണം ആരംഭിച്ചു. 

തിമിം​ഗലത്തിന്റെ മരണകാരണം കണ്ടെത്തുന്നതിനായി ശാസ്ത്രീയ പരിശോധനകൾ നടത്തുമെന്ന് പരിസ്ഥിതി അതോറിറ്റി അറിയിച്ചു. ഒമാന്റെ ജലാശയങ്ങളിൽ കാണപ്പെടുന്ന 20 തിമിംഗല ഇനങ്ങളിൽ ഒന്നാണിത്. പ്രാദേശിക വെല്ലുവിളികൾ കണക്കിലെടുത്ത് അന്വേഷണത്തിനാവശ്യമായ സാമ്പിളുകൾ, വിവരങ്ങൾ എന്നിവ ശേഖരിക്കുന്നത് വേ​ഗത്തിൽ പൂർത്തിയാക്കുമെന്നും അന്വേഷണം പൂർത്തിയായിക്കഴിഞ്ഞാൽ തിമിംഗല ജഡം സംസ്കരിക്കുമെന്നും അധികൃതർ അറിയിച്ചു.