ശൈത്യകാലത്ത് വിറ്റാമിൻ ഡിയുടെ അളവ് കുറയുന്നത് ആരോ​ഗ്യത്തെ എങ്ങനെയൊക്കെ ബാധിക്കാം?

സ്ഥിരമായ ക്ഷീണം, ശ്രദ്ധ കേന്ദ്രീകരിക്കാൻ കഴിയാത്ത അവസ്ഥ, പേശിവേദന, ആവർത്തിച്ചുള്ള അണുബാധകൾ എന്നിവയെല്ലാം വിറ്റാമിൻ ഡിയുടെ അളവ് കുറയുന്നതിന്റെ ലക്ഷണമാണ്.

ശാരീരികവും മാനസികവുമായ ആരോഗ്യം നിലനിർത്തുന്നതിന് വിറ്റാമിൻ ഡി പ്രധാന പങ്കാണ് വഹിക്കുന്നത്. പ്രതിരോധശേഷി, മാനസികാവസ്ഥ, ഊർജ്ജ നില എന്നിവയെ പിന്തുണയ്ക്കുന്നതിന് വിറ്റാമിൻ ഡി പ്രധാനമാണ്. സൂര്യപ്രകാശം കുറയുന്നതിനാൽ ശൈത്യകാലത്ത് ശരീരത്തിന്റെ സ്വാഭാവിക വിറ്റാമിൻ ഡി ഉത്പാദനം വളരെ പരിമിതമാണ്. അതുകൊണ്ട് തന്നെ പലരിലും "വിന്റർ ബ്ലൂസ്" എന്ന രോ​ഗാവസ്ഥ കാണുന്നതായി ബെംഗളൂരുവിലെ കിംസ് ഹോസ്പിറ്റലിലെ ചീഫ് ഡയറ്റീഷ്യൻ അർച്ചന എസ് പറഞ്ഞു.

സൂര്യപ്രകാശം കുറയുന്നത് മൂലം തലച്ചോറിന്റെ മാനസികാവസ്ഥയെ നിയന്ത്രിക്കുന്ന സെറോടോണിൻ, മെലറ്റോണിൻ തുടങ്ങിയ രാസവസ്തുക്കളുമായി ബന്ധപ്പെട്ട കൂടുതൽ കഠിനവും സ്ഥിരവുമായ വിഷാദാവസ്ഥയാണിത്. സ്ഥിരമായ ക്ഷീണം, ശ്രദ്ധ കേന്ദ്രീകരിക്കാൻ കഴിയാത്ത അവസ്ഥ, പേശിവേദന, ആവർത്തിച്ചുള്ള അണുബാധകൾ എന്നിവയെല്ലാം വിറ്റാമിൻ ഡിയുടെ അളവ് കുറയുന്നതിന്റെ ലക്ഷണമാണ്. രോഗപ്രതിരോധ കോശങ്ങളെ ഉത്തേജിപ്പിച്ച് പ്രതിരോധശേഷി വർദ്ധിപ്പിക്കുന്നതിനൊപ്പം മാനസികാവസ്ഥയ്ക്കും വൈകാരിക ആരോഗ്യത്തിനും അത്യാവശ്യമായ സെറോടോണിൻ ഉത്പാദിപ്പിക്കാൻ വിറ്റാമിൻ ഡി തലച്ചോറിനെ സഹായിക്കുന്നു.

വെയിലിന്റെ അളവ് കുറയുക, വീടിനുള്ളിൽ കൂടുതൽ സമയം കഴിയുക, സൺസ്‌ക്രീൻ ഉപയോഗം, വായു മലിനീകരണം, അമിതവണ്ണം എന്നിവയുൾപ്പെടെ നിരവധി ഘടകങ്ങൾ വിറ്റാമിൻ ഡി സമന്വയത്തെയും ആഗിരണത്തെയും തടസ്സപ്പെടുത്തുമെന്ന് അർച്ചന എസ് പറയുന്നു.

താപനിലയിലെ കുറവും സൂര്യപ്രകാശ സമയം കുറവും കാരണം, ശരീരത്തിന് ശരിയായി പ്രവർത്തിക്കാൻ ആവശ്യമായ വിറ്റാമിൻ ഡി സ്വാഭാവികമായി ഉത്പാദിപ്പിക്കാൻ പ്രയാസമാണ്. കൂടാതെ, പോഷകാഹാരക്കുറവും സപ്ലിമെന്റുകളുടെ അഭാവവും തണുത്ത മാസങ്ങളിൽ അപകടസാധ്യത വർദ്ധിപ്പിക്കുന്നു.

ആരോഗ്യമുള്ള അസ്ഥികളും കാൽസ്യവും നിലനിർത്താൻ മാത്രമല്ല, ശക്തമായ പേശികൾ, മാനസികാവസ്ഥ, ശക്തമായ രോഗപ്രതിരോധ ശേഷി എന്നിവയ്ക്കും വിറ്റാമിൻ ഡി ആവശ്യമാണ്. ആവശ്യത്തിന് വിറ്റാമിൻ ഡി കഴിക്കുന്നത് കൂടുതൽ സ്റ്റാമിന, മികച്ച മാനസികാരോഗ്യം, ശ്വാസകോശ അണുബാധയ്ക്കുള്ള സാധ്യത കുറയ്ക്കൽ എന്നിവയുമായി ബന്ധപ്പെട്ടിരിക്കുന്നു.

കൊഴുപ്പുള്ള മത്സ്യം, മുട്ടയുടെ മഞ്ഞക്കരു, പാൽ, ധാന്യങ്ങൾ, കൂൺ, ചില സസ്യാധിഷ്ഠിത പോഷകസമൃദ്ധമായ ഭക്ഷണങ്ങൾ എന്നിവ വിറ്റാമിൻ ഡിയുടെ ഭക്ഷണ സ്രോതസ്സുകളിൽ ഉൾപ്പെടുന്നു. പ്രത്യേകിച്ച് ശൈത്യകാലത്ത്, മതിയായ അളവ് നിലനിർത്താൻ പലർക്കും സപ്ലിമെന്റേഷൻ ആവശ്യമായി വന്നേക്കാ‌മെന്നും അർച്ചന എസ് പറഞ്ഞു.