World Spine Day 2025 : നട്ടെല്ലിന്റെ ആരോഗ്യത്തിനായി ശ്രദ്ധിക്കേണ്ട കാര്യങ്ങൾ
Synopsis
“അസ്ഥിദ്രവ്യം (bone mass) യുടെ 40% വരെ കൗമാരത്തിൽ തന്നെ രൂപപ്പെടുന്നു; ഏകദേശം 95% ‘peak bone mass’ 19-ാം വയസ്സോടെ കൈവരുന്നു.
“സമ്പത്ത് കാലത്ത് തൈ ഫത്ത് വച്ചാൽ ആപത്ത് കാലത്ത് കാ പത്ത് തിന്നാം” ദീർഘകാല നിക്ഷേപത്തെ പറ്റിയും സമ്പാദ്യത്തെപ്പറ്റിയും ഇത്രയും ലളിതമായും ഗഹനമായും മറ്റൊരു പഴഞ്ചൊല്ല് ഇല്ല തന്നെ. ഈ വർഷത്തെ ലോക സ്പൈൻ ദിനാചരണം ലക്ഷ്യം വയ്ക്കുന്നത് നിങ്ങളുടെ നട്ടെല്ലിന്റെ ആരോഗ്യത്തിൽ നിക്ഷേപിക്കൂ എന്നതാണ്.
എങ്ങനെ നമ്മുടെ സമ്പാദ്യ ശീലം, നിക്ഷേപത്തിലുള്ള മുൻകരുതലുകൾ എന്നിവ നമ്മുടെ ഭാവിയിലെ സാമ്പത്തിക സുരക്ഷിതത്വം വർദ്ധിപ്പിക്കുന്നു അതുപോലെ തന്നെ നട്ടെല്ലിന്റെ ആരോഗ്യകാര്യങ്ങളിലും ഉള്ള ശ്രദ്ധ ഭാവിയിലെ ബുദ്ധിമുട്ടുകൾ ഒഴിവാക്കാനും വേദന രഹിതമായ ജീവിതം മുന്നോട്ടു കൊണ്ടുപോകാനും നയിക്കും.
സാമ്പത്തിക ശാസ്ത്രത്തിലെ നിക്ഷേപ തത്വങ്ങൾ എങ്ങനെ നട്ടെല്ലിന്റെ ആരോഗ്യ സംരക്ഷണത്തിന് ഉതകുന്നതാണ് എന്നുള്ള ലളിതമായ ഒരു പരിശ്രമമാണ് ഈ ലേഖനത്തിൽ ഉദ്ദേശിക്കുന്നത്. സാമ്പത്തിക നിക്ഷേപങ്ങൾ പോലെ, നിങ്ങളുടെ നട്ടെല്ലിന്റെ ആരോഗ്യത്തിൽ നിങ്ങൾ എത്ര നേരത്തെയും സ്ഥിരമായും 'നിക്ഷേപം' നടത്തുന്നുവോ, അത്രയും വലുതും ദീർഘകാലത്തേക്കുമുള്ള പ്രതിഫലം ലഭിക്കും. കൗമാരക്കാരായ പെൺകുട്ടികൾക്കും പൊതുവെ സ്ത്രീകൾക്കും ഇത് വളരെ പ്രധാനമാണ്.
നട്ടെല്ലിനെ നിങ്ങളുടെ ശരീരത്തിന്റെ ഏറ്റവും നിർണ്ണായകമായ താങ്ങ് ആയി കരുതുക, ചലിക്കാനും വളയാനും ജീവിതം പൂർണ്ണമായി ജീവിക്കാനും നിങ്ങളെ അനുവദിക്കുന്ന ഒരു പ്രതിരോധശേഷിയുള്ളതും എന്നാൽ ശ്രദ്ധയോടെ കൈകാര്യം ചെയ്യേണ്ടതുമായ ഘടനയാണിത്. ശരിയായ ഭക്ഷണത്തിലൂടെയും പതിവായ ശാരീരിക പ്രവർത്തനങ്ങളിലൂടെയും അതിന്റെ ആരോഗ്യത്തിൽ നേരത്തെയും സ്ഥിരമായും നിക്ഷേപം നടത്തുന്നത് ഭാവിയിലെ വലിയ 'നഷ്ടങ്ങൾ' തടയാൻ സഹായിക്കും, പലിശ ചേർന്ന് സമ്പത്ത് വർദ്ധിക്കുന്നതുപോലെ.
എന്തുകൊണ്ട് നട്ടെല്ലിൽ നേരത്തെ 'നിക്ഷേപിക്കണം'? കൗമാര കാലമാണ് പ്രധാനം. കൗമാരക്കാരായ പെൺകുട്ടികളെ സംബന്ധിച്ചിടത്തോളം, ഈ വർഷങ്ങൾ അസ്ഥികളുടെ ഉൾക്കട്ടി അഥവാ സാന്ദ്രതയും നട്ടെല്ലിന്റെ ശക്തിയും കൂട്ടുവാനുള്ള നിർണായകമായ സമയമാണ്. ഈ കാലയളവ് ഒരു മൂലധന നിക്ഷേപ കാലയളമായി കണക്കാക്കുക.
“അസ്ഥിദ്രവ്യം (bone mass) യുടെ 40% വരെ കൗമാരത്തിൽ തന്നെ രൂപപ്പെടുന്നു; ഏകദേശം 95% ‘peak bone mass’ 19-ാം വയസ്സോടെ കൈവരുന്നു. കൗമാരത്തിൽ 10% അധികം അസ്ഥിദ്രവ്യം കൂട്ടാനായാൽ, ആർത്തവവിരാമത്തിന് ശേഷമുള്ള പൊട്ടലുകളുടെ അപകടം ഏകദേശം പകുതിയായി കുറയാമെന്ന് പഠനങ്ങൾ സൂചിപ്പിക്കുന്നു.
Peak bone mass ആണ് ഭാവിയിലെ ഒസ്റ്റിയോപോറോസിസ് അപകടം നിർണ്ണയിക്കുന്നത്. യൗവനാരംഭത്തിലും യുവത്വത്തിലും അസ്ഥികളുടെ സാന്ദ്രത അഥവാ ബോൺ മിനറൽ ഡെൻസിറ്റി അതിവേഗം രൂപപ്പെടുന്നു. ശക്തമായ നട്ടെല്ലിന്റെ ആരോഗ്യത്തിന് അടിത്തറ സ്ഥാപിക്കാനുള്ള അവസരമാണിത്.
● പോഷകാഹാരമാണ് ലാഭവിഹിതം
നാം ഓഹരി വിപണിയിൽ നിക്ഷേപം നടത്തുമ്പോൾ അതിന്റെ ലാഭവിഹിതം സമയാസമയങ്ങളിൽ ലഭിക്കാറുണ്ട് എങ്ങനെ നല്ല ഓഹരികളിൽ നിക്ഷേപം നടത്തിയാൽ അങ്ങനെ കൂടുതൽ ലാഭവിഹിതം നേടാമോ അതുതന്നെയാണ് പോഷക ആഹാരം കാര്യത്തിലും ഉള്ളത്..കൂടാതെ പോഷകാഹാരം ദിവസേന ചെയ്യ ന്ന നിക്ഷേപമായി കണക്കാക്കാം. കാൽസ്യവും വിറ്റാമിൻ ഡിയും അസ്ഥികളുടെ ആരോഗ്യത്തിന് അത്യാവശ്യമായ 'ഓഹരികൾ' ആണ്. പരമാവധി അസ്ഥിസാന്ദ്രത നേടുന്നതിന് കൗമാരക്കാരായ പെൺകുട്ടികൾക്ക് ആവശ്യമായ അളവിൽ ഇത് ലഭിക്കണം. പാൽ ഉൽപ്പന്നങ്ങൾ, വിറ്റാമിൻ ചേർത്ത സസ്യജന്യ പാൽ, ഇലക്കറികൾ, കൊഴുപ്പുള്ള മത്സ്യങ്ങൾ എന്നിവ മികച്ച സ്രോതസ്സുകളാണ്.
ഇവയെ അവരുടെ ഭാവിയിലെ അസ്ഥിബലത്തിനായുള്ള ഉയർന്ന വരുമാനം ( പലിശയും കൂട്ടുപലിശയും പോലെ) തരുന്ന നിക്ഷേപങ്ങളായി കാണുക.
● വ്യായാമം
നടക്കുക, ഓടുക, നൃത്തം ചെയ്യുക, ഭാരം താങ്ങിയുള്ള വ്യായാമങ്ങൾ (വെയിറ്റ് ബെയറിംഗ്), ശക്തി പരിശീലനം (ശരിയായ മാർഗ്ഗനിർദ്ദേശത്തോടെ) എന്നിവ അസ്ഥികളുടെ വളർച്ചയെ ഉത്തേജിപ്പിക്കാനും നട്ടെല്ലിനെ താങ്ങുന്ന പേശികളെ ശക്തിപ്പെടുത്താനും അത്യന്താപേക്ഷിതമാണ്. പെൺകുട്ടികളെ അവർ ആസ്വദിക്കുന്ന പ്രവർത്തനങ്ങൾ കണ്ടെത്താൻ പ്രോത്സാഹിപ്പിക്കുക.
ഇന്ന് യൂട്യൂബിലും സോഷ്യൽ മീഡിയകളിലും നൃത്താധിഷ്ഠിതമാ?യിട്ടുള്ള വ്യായാമങ്ങൾ അവരവരുടെ മുറികളിൽ തന്നെ ചെയ്യാനുള്ള സൗകര്യം നമുക്കുണ്ട്. ഇത് വ്യായാമത്തെ ഒരു ഭാരമെന്നതിനുപകരം സന്തോഷകരമായ ഒരു 'നിക്ഷേപ'മാക്കി മാറ്റും. ഭാവിയിലെ നട്ടെല്ല് പ്രശ്നങ്ങൾക്കെതിരായ ശക്തമായ ഒരു 'പോർട്ട്ഫോളിയോ' നിർമ്മിക്കാൻ ഇത് സഹായിക്കും.
സ്ത്രീകളുടെ നട്ടെല്ല് ആരോഗ്യം: വർഷങ്ങളിലൂടെ നിങ്ങളുടെ നിക്ഷേപം സംരക്ഷിക്കുക
നമ്മുടെ ജീവിതത്തിൽ കുട്ടികളുടെ ഭാവിയിലെ വിദ്യാഭ്യാസ ചെലവുകൾ വിവാഹ ഇതര ചെലവുകൾ, വാഹനം വാങ്ങിക്കുവാനുള്ള ചെലവ്, വീട് വയ്ക്കാനുള്ള ചിലവുകൾ എന്നിവ മുൻകൂട്ടി കണ്ടു നാം നേരത്തെ പണം സ്വരൂപിക്കാറുണ്ട്. സ്ത്രീകളുടെ നട്ടെല്ലിന്റെ ആരോഗ്യത്തിലും ഇത് ബാധകമാണ്.
സ്ത്രീകൾക്ക് പ്രായമാകുമ്പോൾ, ഹോർമോൺ മാറ്റങ്ങൾ, പ്രത്യേകിച്ച് ആർത്തവവിരാമത്തിന് മുൻപും ശേഷവും, അസ്ഥികളുടെ സാന്ദ്രതയെ ബാധിക്കും. ഇത് നട്ടെല്ലിന്റെ ആരോഗ്യത്തിൽ വിവേകത്തോടെയുള്ള 'നിക്ഷേപങ്ങൾ' കൂടുതൽ നിർണായകമാക്കുന്നു. ആർത്തവവിരാമത്തിനു ശേഷം ഈസ്റ്റ്രജൻ കുറഞ്ഞ് അസ്ഥിബശോഷണം വേഗത്തിൽ ആകുമ്പോൾ മുമ്പ് നേടിയ ബോണും മസിലും ‘കമ്പൗണ്ട് ഇന്ററസ്റ്റ്’ അഥവാ കൂട്ടുപലിശ പോലെ സംരക്ഷണം നൽകും.
● ആർത്തവവിരാമത്തിന് ശേഷമുള്ള അസ്ഥിക്ഷയത്തെ (Osteoporosis) ചെറുക്കുക: അസ്ഥികൾ ദുർബലമാവുകയും എളുപ്പത്തിൽ പൊട്ടുകയും ചെയ്യുന്ന അവസ്ഥയാണ് ഓസ്റ്റിയോപൊറോസിസ്. ആർത്തവവിരാമത്തിനുശേഷം സ്ത്രീകൾക്ക് ഇത് ഒരു പ്രധാന ആശങ്കയാണ്. ഇവിടെയാണ് നിങ്ങളുടെ ആദ്യകാല നിക്ഷേപങ്ങൾ അതായത് കൗമാരത്തിലും യൗവനത്തിലും ഉള്ള ശരിയായ പോഷകാഹാരവും വ്യായാമവും നിങ്ങൾക്ക് പ്രായമാകുമ്പോൾ ശരിക്കും ഫലം നൽകുന്നത്.
തുടർച്ചയായ പോഷകാഹാര ശ്രദ്ധ : ആവശ്യമായ കാൽസ്യവും വിറ്റാമിൻ ഡിയും ഉറപ്പാക്കുക. ഭക്ഷണ സ്രോതസ്സുകൾ മതിയാകുന്നില്ലെങ്കിൽ ഡോക്ടറുമായി ചർച്ച ചെയ്ത ശേഷം സപ്ലിമെന്റുകൾ പരിഗണിക്കാവുന്നതാണ്. മഗ്നീഷ്യവും വിറ്റാമിൻ കെ-യും അസ്ഥികളുടെ ആരോഗ്യത്തിൽ പിന്തുണ നൽകുന്ന ഘടകങ്ങളാണ്, ഇത് നിങ്ങളുടെ പോഷകാഹാര പോർട്ട്ഫോളിയോയിലെ വൈവിധ്യമാർന്ന നിക്ഷേപങ്ങൾ പോലെയാണ്.
വ്യായാമം : ഭാരം താങ്ങിയുള്ളതും റസിസ്റ്റൻറ് വ്യായാമങ്ങൾ തുടരുക. നടക്കുക, ജോഗിംഗ്, ഹൈക്കിംഗ്, യോഗ,, വെയിറ്റ് ട്രെയിനിംഗ് എന്നിവ അസ്ഥികളുടെ സാന്ദ്രത നിലനിർത്താനും ബാലൻസ് മെച്ചപ്പെടുത്താനും വീഴ്ചകളും ഒടിവുകളും ഉണ്ടാകാനുള്ള സാധ്യത കുറയ്ക്കാനും സഹായിക്കുന്നു. നിങ്ങളുടെ നട്ടെല്ലിനെ താങ്ങി നിർത്തുന്ന പേശികൾക്കുള്ള ‘കോർ’ ശക്തിപ്പെടുത്തുന്നതിനുള്ള വ്യായാമങ്ങളിൽ ശ്രദ്ധ കേന്ദ്രീകരിക്കുക.
സ്ത്രീകളെ മാത്രം ബാധിക്കുന്ന മറ്റ് നട്ടെല്ല് പ്രശ്നങ്ങൾ
ഗർഭധാരണവും പ്രസവശേഷവും: ഗർഭകാലത്തെ വർദ്ധിച്ച ഭാരവും ഹോർമോൺ മാറ്റങ്ങളും നട്ടെല്ലിന് കാര്യമായ ബുദ്ധിമുട്ടുണ്ടാക്കും. ലഘുവായ വ്യായാമങ്ങൾ, ശരിയായ ഇരിപ്പും നടപ്പും ശ്രദ്ധിക്കുക, താങ്ങ് നൽകുന്ന പാദരക്ഷകൾ എന്നിവ പ്രധാനമാണ്. പ്രസവശേഷം, നട്ടെല്ലിനെ താങ്ങാനായി കോർ ശക്തി ക്രമേണ വീണ്ടെടുക്കുന്നതിൽ ശ്രദ്ധ കേന്ദ്രീകരിക്കുക.
ദൈനംദിന ജീവിതത്തിലെ സൗകര്യക്രമീകരണം (Ergonomics): പല സ്ത്രീകളും മേശപ്പുറത്ത് ഇരുന്നും കുട്ടികളെ പരിപാലിച്ചും വീട്ടുജോലികൾ ചെയ്തും മണിക്കൂറുകളോളം ചെലവഴിക്കുന്നു, ഇത് നട്ടെല്ലിന് ബുദ്ധിമുട്ടുണ്ടാക്കാം. ജോലിസ്ഥലത്തും വീട്ടിലും സൗകര്യപ്രദമായ ക്രമീകരണങ്ങൾ (ergonomic setups) ചെയ്യുക, ഭാരം ഉയർത്തുന്നതിൽ ശ്രദ്ധാലുവായ രീതികൾ പരിശീലിക്കുക, ഇടയ്ക്കിടെ എഴുന്നേറ്റ് നടക്കുകയും സ്ട്രെച്ച് ചെയ്യുകയും ചെയ്യുക. ഇവയെല്ലാം നട്ടെല്ലിന്റെ സമ്മർദ്ദം തടയുന്ന ചെറിയ, സ്ഥിരമായ 'നിക്ഷേപങ്ങൾ' ആണ്.
“സ്ക്രീനിങ്ങും മെഡിക്കൽ പങ്കാളിത്തവും”
“- നേരത്തെ പരിശോധിക്കേണ്ടവർ : മാതാവിനോ പിതാവിനോ ഇടുപ്പല്ല് പൊട്ടിയിട്ടുള്ളവർ, നേരത്തെ ആർത്തവവിരാമം സംഭവിച്ചവർ, നേരത്തെ ഓവറി ശസ്ത്രക്രിയയിലൂടെ മാറ്റിയവർ , ശരീരഭാരം കുറഞ്ഞവർI, ദീർഘകാല സ്റ്റിറോയിഡ് മരുന്ന് കഴിക്കുന്നവർ, സീലിയാക്/തൈറോയ്ഡ് രോഗങ്ങൾ ഉള്ളവർ. ഇവരെല്ലാം വിദഗ്ധ വൈധ്യോപദേശം നേരത്തെ തന്നെ വേണ്ടത് അത്യാവശ്യമാണ്.
ദീർഘകാല ലാഭം: വേദനയില്ലാത്ത, സജീവമായ ഒരു ഭാവി
മികച്ച സാമ്പത്തിക ആസൂത്രണം വിരമിക്കൽ കാലത്ത് സുരക്ഷിതത്വവും സ്വാതന്ത്ര്യവും നൽകുന്നതുപോലെ, നിങ്ങളുടെ നട്ടെല്ലിന്റെ ആരോഗ്യത്തിൽ നിക്ഷേപിക്കുന്നത് അളവറ്റ പ്രതിഫലം നൽകുന്നു: വേദന കുറയുന്നു, ചലനശേഷി വർദ്ധിക്കുന്നു, മികച്ച ശരീരാവസ്ഥ , ഉയർന്ന ജീവിത നിലവാരം എന്നിവയെല്ലാം ഇതിൽ ഉൾപ്പെടുന്നു. നട്ടെല്ലിന്റെ ബുദ്ധിമുട്ടുകൾ ഇല്ലാതെ പേരക്കുട്ടികളോടൊപ്പം കളിക്കാനും, ഹോബികളിൽ ഏർപ്പെടാനും, വാർദ്ധക്യത്തിലും സ്വാതന്ത്ര്യം നിലനിർത്താനും ഇത് നിങ്ങളെ പ്രാപ്തരാക്കും.
ഇന്ന് തന്നെ നിങ്ങളുടെ നിക്ഷേപ പദ്ധതി ആരംഭിക്കുക:
ഒരുപക്ഷേ ഇത്തരം കാര്യങ്ങൾ നിങ്ങൾ ആദ്യമായിട്ടാണ് അറിയുന്നത് എങ്കിലും വിഷമിക്കേണ്ട കാര്യമില്ല.നിങ്ങളുടെ നട്ടെല്ലിൽ നിക്ഷേപം തുടങ്ങാൻ ഒരിക്കലും വൈകിയിട്ടില്ല. യുവതികളെ ആരോഗ്യകരമായ ശീലങ്ങൾ സ്വീകരിക്കാൻ പ്രോത്സാഹിപ്പിക്കുക. എല്ലാ പ്രായത്തിലുമുള്ള സ്ത്രീകൾ അവരുടെ ഭക്ഷണക്രമത്തിൽ ശ്രദ്ധിക്കുക, പതിവായി വ്യായാമം ഉൾപ്പെടുത്തുക, ആവശ്യമുള്ളപ്പോൾ വിദഗ്ദ്ധോപദേശം തേടുക.
നിങ്ങളുടെ നട്ടെല്ല് വിലമതിക്കാനാവാത്ത ഒരു ആസ്തിയാണ്. അതിനെ സംരക്ഷിക്കുക, പോഷിപ്പിക്കുക, ശക്തിപ്പെടുത്തുക. ആരോഗ്യകരമായ നട്ടെല്ലിന്റെ ലാഭവിഹിതം എന്നത് അനാവശ്യമായ വേദനയുടെ ഭാരമില്ലാതെ, സന്തോഷത്തോടെ ഊർജ്ജസ്വലമായ ഒരു ജീവിതം നയിക്കാൻ നിങ്ങളെ പ്രാപ്തരാക്കും. വിവേകത്തോടെ നിക്ഷേപിക്കുക, മനോഹരമായി ജീവിക്കുക.
(കൊച്ചി വി.പി.എസ് ലേക്ഷോർ ആശുപത്രിയിൽ ഇൻസ്റ്റിറ്റ്യൂട്ട് ഓഫ് സ്പൈൻ&സ്കോളിയോസിസ് സർജറി വിഭാഗം ഡയറക്ടറും അന്താരാഷ്ട്ര സ്കോളിയോസിസ് സർജന്മാരുടെ റിസർച്ച് സംഘടനയായ (AO SPINE KNOWLEDGE FORUM DEFORMITY GROUP) എ.ഓ. സ്പൈൻ നോളജ് ഫോറം ഡിഫോമിറ്റി ഗ്രൂപ്പിലെ ഇന്ത്യയിൽ നിന്നുള്ള പ്രതിനിധിയുമായ ഡോ കൃഷ്ണകുമാർ ആർ ആണ് ലേഖകൻ)