മദ്യലഹരിയിൽ ഡ്രൈവർ, എസ്യുവി ഗണേശോത്സവത്തിനിടയിലേക്ക് ഇടിച്ച് കയറി; 3 പേർ കൊല്ലപ്പെട്ടു, 22 പേർക്ക് പരിക്ക്
Synopsis
മദ്യലഹരിയിൽ വാഹനമോടിച്ചയാൾ നിയന്ത്രണംവിട്ട് ഗണേശോത്സവത്തിനിടയിലേക്ക് വാഹനം ഇടിച്ച് കയറ്റുകയായിരുന്നു.
റായ്പുര്: ചത്തീസ്ഗഢില് ആള്ക്കൂട്ടത്തിനിടയിലേക്ക് നിയന്ത്രണം വിട്ട് എസ്യുവി കാർ ഇടിച്ചുകയറിയുണ്ടായ അപകടത്തില് മൂന്ന് പേര് കൊല്ലപ്പെട്ടു. നിരവധി പേര്ക്ക് പരിക്കേറ്റു.ജാഷ്പൂർ ജില്ലയിൽ ബഗിച്ച പൊലീസ് സ്റ്റേഷന് പരിധിയിലെ ജുരുദണ്ഡ് ഗ്രാമത്തില് ചൊവ്വാഴ്ച രാത്രിയോടെയാണ് ദാരുണമായ സംഭവമുണ്ടായത്. മദ്യലഹരിയിൽ വാഹനമോടിച്ചയാൾ നിയന്ത്രണംവിട്ട് ഗണേശോത്സവത്തിനിടയിലേക്ക് വാഹനം ഇടിച്ച് കയറ്റുകയായിരുന്നു.
അപകടത്തില് വിപിന് പ്രജാപതി (17), അരവിന്ദ് (19), ഖിരോവതി യാദവ് (32) എന്നിവരാണ് മരിച്ചത്. ഗണപതി വിഗ്രഹ നിമഞജ്ന യാത്രയില് നൂറുകണക്കിനാളുകള് പങ്കെടുത്തിരുന്നതായാണ് വിവരം. അപകടത്തില് ഗുരുതരമായി പരിക്കേറ്റവരെ അംബികാപുര് മെഡിക്കല് കോളേജിലെത്തിച്ചിട്ടുണ്ട്. മറ്റുള്ളവരെ പ്രാദേശിക കമ്മ്യൂണിറ്റി ഹെൽത്ത് സെന്ററിൽ പ്രവേശിപ്പിച്ചു.സംഭവത്തില് മദ്യലഹരിയിലായിരുന്ന കാര് ഡ്രൈവറെ അറസ്റ്റുചെയ്തിട്ടുണ്ട്. 40-കാരനായ സുഖ്സാഗര് വൈഷ്ണവ് ആണ് പൊലീസിന്റെ പിടിയിലായത്. അപകടത്തിനിടയാക്കിയ വാഹനം പൊലീസ് പിടിച്ചെടുത്തു. കേസ് രജിസ്റ്റര് ചെയ്ത് അന്വേഷണം ആരംഭിച്ചതായി പോലീസ് അറിയിച്ചു.