കടിച്ചുകീറി പിറ്റ്ബുൾ; വാടകവീട് നോക്കാനെത്തിയ ദമ്പതിമാർക്ക് നേരേ വളർത്തുനായയുടെ ആക്രമണം; യുവതിക്ക് ​ഗുരുതര പരിക്ക്

യുവതിയുടെ കൈയിലും മറ്റുഭാ​ഗങ്ങളിലും നായ മാരകമായി കടിച്ചുപരിക്കേൽപ്പിച്ചു. സ്വകാര്യ ആശുപത്രിയിൽ ചികിത്സയിലുള്ള യുവതിയ്ക്ക് ശസ്ത്രക്രിയ വേണമെന്നാണ് ഡോക്ടർമാർ അറിയിച്ചത്. . ഭാര്യയെ രക്ഷിക്കാൻ ശ്രമിക്കുന്നതിനിടെ അങ്കിതിനും കടിയേറ്റു. കാലിലും പിൻഭാ​ഗത്തുമാണ് ഇദ്ദേഹത്തിന് കടിയേറ്റത്.

ലുധിയാന: വാടകവീട് നോക്കാനെത്തിയ ദമ്പതിമാരെ പിറ്റ്ബുൾ ഇനത്തിൽപ്പെട്ട വളർത്തുനായ ക്രൂരമായി ആക്രമിച്ചു. പഞ്ചാബിലെ പട്യാല ​ഗുമാൻ ന​ഗറിലാണ് സംഭവം. പട്യാല നിവാസികളായ അങ്കിത് സബർവാൾ ഭാര്യ ഷിഫാലി എന്നിവർക്കാണ് പിറ്റ്ബുളിന്റെ ആക്രമണത്തിൽ പരിക്കേറ്റത്. ഇതിൽ ഷിഫാലിയ്ക്ക് ​ഗുരുതരമായ പരിക്കേറ്റിട്ടുണ്ട്. യുവതിയുടെ കൈയിലും മറ്റുഭാ​ഗങ്ങളിലും നായ മാരകമായി കടിച്ചുപരിക്കേൽപ്പിച്ചു. സ്വകാര്യ ആശുപത്രിയിൽ ചികിത്സയിലുള്ള യുവതിയ്ക്ക് ശസ്ത്രക്രിയ വേണമെന്നാണ് ഡോക്ടർമാർ അറിയിച്ചത്.

പട്യാലയിൽ തന്നെ താമസിക്കുന്ന അങ്കിതും ഭാര്യ ഷിഫാലിയും വാടകയ്ക്കുള്ള വീട് നോക്കാനായാണ് ചൊവ്വാഴ്ച വൈകിട്ട് ​ഗുമാൻ ന​ഗറിലെത്തിയത്. ഒരു ബ്രോക്കറും ഇവർക്കൊപ്പമുണ്ടായിരുന്നു. തുടർന്ന് വീട്ടിലേക്ക് പ്രവേശിക്കാനായി ബ്രോക്കർ ​ഗേറ്റ് തുറന്നു. ഈ സമയത്താണ് വീട്ടിൽനിന്ന് പിറ്റ്ബുൾ പുറത്തേക്ക് ഓടിയെത്തിയത്. പിന്നാലെ യുവതിയെ കടിക്കുകയായിരുന്നു. ഭാര്യയെ രക്ഷിക്കാൻ ശ്രമിക്കുന്നതിനിടെ അങ്കിതിനും കടിയേറ്റു. കാലിലും പിൻഭാ​ഗത്തുമാണ് ഇദ്ദേഹത്തിന് കടിയേറ്റത്. മിനിറ്റുകളോളം ആക്രമണം നീണ്ടുനിന്നു. ഈ സമയം ബ്രോക്കറും വീട്ടിൽനിന്ന് എത്തിയ വീട്ടുടമയും വടി ഉപയോ​ഗിച്ച് നായയെ പിന്തിരിപ്പിക്കാൻ ശ്രമിച്ചെങ്കിലും ഫലംകണ്ടില്ല. തുടർന്ന് കൂടുതൽപേരെത്തി നായയെ അടിച്ച് ഓടിക്കുകയായിരുന്നു. ​പരിക്കേറ്റ ദമ്പതിമാരെ ഉടൻ തന്നെ ആശുപത്രിയിൽ പ്രവേശിപ്പിച്ചു.

സംഭവത്തിൽ പൊലീസിൽ പരാതി നൽകിയതായി അങ്കിത് മാധ്യമങ്ങളോട് പറഞ്ഞു. സംഭവത്തിൻ്റെ സിസിടിവി ​​ദൃശ്യങ്ങളും പുറത്തുവന്നിട്ടുണ്ട്. അതിനിടെ, ഇത്തരം ആക്രമണസ്വഭാവമുള്ള നായകളെ വീട്ടിൽ വളർത്തുന്നത് നിരോധിക്കുമെന്ന് പട്യാല മേയർ കുന്ദൻ ​ഗോ​ഗിയ പ്രതികരിച്ചു.