ബിരുദദാന ചടങ്ങിൽ 'ഗായത്രി മന്ത്രം' ചൊല്ലിയതിൽ വിമർശനമവുമായി ഷമ മുഹമ്മദ്; തെറ്റ് ചൂണ്ടിക്കാട്ടി മുൻ വിദ്യാർത്ഥി

ഐഐടി ഡൽഹിയിലെ ബിരുദദാന ചടങ്ങിൽ സംസ്‌കൃത ശ്ലോകം ചൊല്ലിയത് വിവാദമായി. ഇത് ഗായത്രി മന്ത്രമാണെന്ന് കരുതി കോൺഗ്രസ് വക്താവ് ഷമ മുഹമ്മദ് വിമർശിച്ചെങ്കിലും, ചടങ്ങിൽ ചൊല്ലിയത് തൈത്തിരീയ ഉപനിഷത്തിലെ ഗുരു-ശിഷ്യ ബന്ധത്തെക്കുറിച്ചുള്ള 'ശിക്ഷാവല്ലി' ആണെന്ന് മുൻ വിദ്യാർഥി പ്രതികരിച്ചു.

ദില്ലി: ഐഐടി ഡൽഹിയുടെ അടുത്തിടെ നടന്ന ബിരുദദാന ചടങ്ങിൽ സംസ്‌കൃത ശ്ലോകങ്ങൾ ആലപിച്ചതുമായി ബന്ധപ്പെട്ട് വൻ രാഷ്ട്രീയ-സാമൂഹിക വിവാദം ഉയർന്നുവരുന്നു. അക്കാദമിക് ചടങ്ങിൽ 'ഗായത്രി മന്ത്രം' ചൊല്ലിയത് എന്തിനാണെന്ന് ചോദ്യം ചെയ്ത് കോൺഗ്രസ് വക്താവ് ഷമ മുഹമ്മദ് രംഗത്തെത്തിയതാണ് പുതിയ തർക്കങ്ങൾക്ക് വഴിവെച്ചത്. പ്രധാനമന്ത്രി നരേന്ദ്ര മോദി പങ്കെടുത്ത ചടങ്ങിലായിരുന്നു ഈ സംഭവം എന്നത് വിഷയത്തിന്‍റെ രാഷ്ട്രീയ പ്രാധാന്യം വർദ്ധിപ്പിച്ചു. എന്നാൽ, ചടങ്ങിൽ ചൊല്ലിയത് ഗായത്രി മന്ത്രമല്ലെന്ന് വ്യക്തമാക്കി ഐഐടി കാൺപൂരിലെ മുൻ വിദ്യാർത്ഥിയായ ഗ്യാൻ സി മേത്ത രംഗത്തെത്തി.

തൈത്തിരീയ ഉപനിഷത്തിലെ 'ശിക്ഷാവല്ലി' എന്ന ഭാഗത്തുനിന്നുള്ള ശ്ലോകങ്ങളാണ് അവിടെ ചൊല്ലിയതെന്നും, അത് അറിവിനെയും ഗുരു-ശിഷ്യ ബന്ധത്തെയും കുറിച്ചുള്ളതാണെന്നും അദ്ദേഹം ചൂണ്ടിക്കാട്ടി. അറിവ് പകർന്നുനൽകുന്നതിന് മുമ്പ് അദ്ധ്യാപകനും വിദ്യാർത്ഥിയും ഒരുപോലെ സംരക്ഷിക്കപ്പെടട്ടെ എന്ന അർത്ഥം വരുന്ന പ്രാർത്ഥനയാണിതെന്ന് അദ്ദേഹം വ്യക്തമാക്കുകയുണ്ടായി. അക്കാദമിക് സ്ഥാപനങ്ങൾ ഇത്തരം മതപരമായ ശ്ലോകങ്ങളിൽ നിന്ന് മുക്തമായിരിക്കണമെന്ന വാദമാണ് ഷമ മുഹമ്മദ് ഉന്നയിച്ചത്.

തന്‍റെ വീട്ടിൽ പാചകം ചെയ്യുന്നയാൾ എന്നും അടുക്കളയിൽ ഗായത്രി മന്ത്രം വയ്ക്കാറുണ്ടെന്നും അത് കേൾക്കാൻ തനിക്ക് ഇഷ്ടമാണെന്നും പറഞ്ഞ അവർ, എന്നാൽ ഒരു ഉന്നത സാങ്കേതിക വിദ്യാഭ്യാസ സ്ഥാപനത്തിന്‍റെ ബിരുദദാന ചടങ്ങിൽ ഇത്തരമൊരു മന്ത്രം ചൊല്ലേണ്ടതിന്‍റെ ആവശ്യകത എന്താണെന്ന് ചോദിക്കുകയായിരുന്നു. എന്നാൽ, ചൊല്ലിയ വരികൾ ഏതാണെന്ന് പോലും തിരിച്ചറിയാതെയാണ് വിമർശനം ഉന്നയിച്ചതെന്ന് മേത്ത മറുപടി നൽകി. അടിസ്ഥാനപരമായ വസ്തുത പോലും പരിശോധിക്കാതെ വിവാദമുണ്ടാക്കുന്നതിൽ ഒരു ഐഐടി പൂർവ്വ വിദ്യാർത്ഥി എന്ന നിലയിൽ വിഷമമുണ്ടെന്നും അദ്ദേഹം കൂട്ടിച്ചേർത്തു.

മൂവായിരത്തിലധികം വിദ്യാർത്ഥികളും നൂറുകണക്കിന് ഗവേഷകരും പങ്കെടുത്ത ഐഐടി ഡൽഹിയുടെ 57-ാമത് ബിരുദദാന ചടങ്ങിലായിരുന്നു സംഭവം. ചടങ്ങിൽ പ്രധാനമന്ത്രിയുടെ പ്രസംഗം പൂർണ്ണമായും വിദ്യാഭ്യാസം, ഗവേഷണം, സാങ്കേതികവിദ്യ, രാജ്യത്തിന്‍റെ വികസനം എന്നിവയിൽ കേന്ദ്രീകരിച്ചുള്ളതായിരുന്നു. പുരാതന ഇന്ത്യയിൽ വിദ്യാഭ്യാസം പൂർത്തിയാക്കി സമൂഹത്തിലേക്ക് ഇറങ്ങുന്ന വേളയിൽ നടത്തിയിരുന്ന 'സമാവർത്തനം' എന്ന ചടങ്ങുമായി ഈ ശ്ലോകങ്ങൾക്ക് അടുത്ത ബന്ധമുണ്ട്. സത്യം, ധർമ്മം, അച്ചടക്കം, ഗുരുവിനോടുള്ള ആദരവ് എന്നിവയാണ് ഈ ശ്ലോകങ്ങളുടെ സാരം. പൊതു വിദ്യാഭ്യാസ സ്ഥാപനങ്ങളിൽ ഇത്തരം പുരാതന ആചാരപരമായ ശ്ലോകങ്ങൾ ഉൾപ്പെടുത്തുന്നത് സംബന്ധിച്ച തർക്കങ്ങൾ ഒരുവശത്ത് നിലനിൽക്കുന്നുണ്ട്.