Fuel Price Hike |'എണ്ണയൊഴിക്കാതെ കരിന്തിരി കൊളുത്തി'; ഇന്ധനവില വർധനവിനെതിരെ ഒറ്റയാൾ പ്രതിഷേധം

ദിനംപ്രതി വർദ്ധിയ്ക്കുന്ന ഇന്ധനവിലയിൽ പ്രതിഷേധിച്ച് ഒറ്റയാൾ പ്രതിഷേധം. 

ചേർത്തല: ദിനംപ്രതി വർദ്ധിയ്ക്കുന്ന ഇന്ധനവിലയിൽ പ്രതിഷേധിച്ച് ഒറ്റയാൾ പ്രതിഷേധം. ജനങ്ങളെ ദ്രോഹിക്കുന്ന കേന്ദ്രസർക്കാർ നടപടിക്കെതിരെ ഇതിനു മുമ്പും പലവട്ടം ഒറ്റയാൾ പ്രതിഷേധമുയര്‍ത്തിയ കരപ്പുറം രാജശേഖരനാണ് ചേർത്തല പ്രധാന പോസ്റ്റോഫീസിന് മുന്നിൽ നിലവിളക്കിൽ കരിന്തിരി കൊളുത്തി പ്രതീകാത്മക പ്രതിഷേധം നടത്തിയത്. 

പോസ്റ്റ് ഓഫീസിന് മുന്നിലെ തപാൽ പെട്ടിക്ക് സമീപം തൂശനിലയിട്ട് അഞ്ച് തിരിയിട്ട നിലവിളക്ക് സ്ഥാപിച്ച് എണ്ണയൊഴിക്കാതെ ദീപംകൊളുത്തി. രാജ്യം ദീപാവലി ആഘോഷിക്കുന്നത് സാഹചര്യത്തിലാണ് നിലവിളക്കും ദീപവും പ്രതിഷേധത്തിന് ഉപായമാക്കിയതെന്ന് സാംസ്കാരിക പ്രവർത്തകനും ഡ്രൈവിങ് സ്കൂൾ ഉടമയുമായ രാജശേഖരൻ പറഞ്ഞു. 

എണ്ണയൊഴിക്കാതെ കൊളുത്തിയ ദീപം പൊടുന്നനെ എരിഞ്ഞടങ്ങുന്നതും കറുത്തപുക ഉയരുന്നതും രാജ്യത്തിന്റെയും ജനതയുടെയും ദൈന്യതയാണ് വെളിവാക്കുന്നതെന്നും അദ്ദേഹം പറഞ്ഞു. കരിന്തിരി കത്തിയ നിലവിളക്ക് സാക്ഷിയാക്കി നാമജപവും പ്രതിഷേധത്തിന്റെ ഭാഗമായി. വേറിട്ട പ്രതിഷേധം വീക്ഷിക്കാൻ സ്ഥലത്ത് നിരവധിയാളുകൾ എത്തി.