നെഞ്ചുവേദന മാത്രമല്ല; ഹൃദ്രോഗത്തിന്റെ അത്ര പരിചിതമല്ലാത്ത ലക്ഷണങ്ങൾ ഇവയാണ്

ഹൃദയത്തെയും രക്തക്കുഴലുകളെയും ബാധിക്കുന്ന വിവിധ അവസ്ഥകളെ പൊതുവായി പറയുന്ന പേരാണ് ഹൃദ്രോഗം. ഇതുമായി ബന്ധപ്പെട്ട് ശരീരം കാണിക്കുന്ന ചില ലക്ഷണങ്ങളെ പലരും ശരിയായി മനസിലാക്കാറില്ല. ഹൃദ്രോഗത്തിന്റെ 10 ലക്ഷണങ്ങൾ അറിയാം.

നെഞ്ചുവേദന/അസ്വസ്ഥത

നെഞ്ചിൽ അമിതമായ സമ്മർദ്ദം, മുറുക്കം, ഭാരം അല്ലെങ്കിൽ നീറ്റൽ എന്നിവ അനുഭവപ്പെടുന്നതാണ് പ്രധാന ലക്ഷണം. എല്ലാ നെഞ്ചുവേദനയും ഹൃദയസംബന്ധമാകണമെന്നില്ല, എങ്കിലും വേദന കൂടുന്നത് ഹൃദയത്തിലേക്കുള്ള രക്തയോട്ടം കുറയുന്നതിന്റെ ലക്ഷണമാകാം. വിട്ടുമാറാത്ത വേദന ഗൗരവമായി എടുത്ത് ഉടൻ ചികിത്സ തേടണം.

ശ്വാസംമുട്ടൽ

വിശ്രമിക്കുമ്പോഴോ ചെറിയ ജോലികൾ ചെയ്യുമ്പോഴോ ശ്വാസമെടുക്കാൻ ബുദ്ധിമുട്ട് തോന്നുന്നത് ഹൃദയസംബന്ധമായ പ്രശ്നങ്ങള്‍ കാരണമായേക്കാം. രക്തചംക്രമണത്തിലെ കുറവോ ശ്വാസകോശത്തിൽ ദ്രാവകം അടിഞ്ഞുകൂടുന്നതോ കൊണ്ടാകാം ഇങ്ങനെ സംഭവിക്കുന്നത്. ശ്വാസംമുട്ടൽ കൂടുകയാണെങ്കിൽ അടിയന്തരമായി ഡോക്ടറെ സമീപിക്കണം.

ക്രമരഹിതമായ ഹൃദയമിടിപ്പ്

ഹൃദയം അതിവേഗം മിടിക്കുകയോ അല്ലെങ്കിൽ മിടിപ്പുകൾ സമയം തെറ്റി ഉണ്ടാകുകയോ ചെയ്യുന്നത് ഹൃദ്രോഗത്തിന്റെ ലക്ഷണമാണ്. ഇടയ്ക്കിടെയുള്ള കഠിനമായ ഹൃദയമിടിപ്പ് പരിശോധനയ്ക്ക് വിധേയമാക്കണം.

തലകറക്കം

ഹൃദയത്തിന് രക്തം ഫലപ്രദമായി പമ്പ് ചെയ്യാൻ കഴിയാതെ വരുമ്പോൾ തലച്ചോറിലേക്കുള്ള ഓക്സിജന്റെ അളവ് കുറയുന്നു. ഇത് തലകറക്കത്തിനോ ബോധക്ഷയത്തിനോ കാരണമായേക്കാം. ഉടൻ തന്നെ വൈദ്യസഹായം തേടണം.

ക്ഷീണം

പ്രത്യേകിച്ച് കഠിനാധ്വാനം ഒന്നും ചെയ്യാതെ തന്നെ അനുഭവപ്പെടുന്ന അമിതമായ ക്ഷീണം ഹൃദയത്തിന്റെ പമ്പിംഗ് ശേഷി കുറയുന്നതിന്റെ ലക്ഷണമാകാം. ഇത് ദൈനംദിന പ്രവർത്തനങ്ങളെ ബാധിച്ചേക്കാം. അതിനാൽ അമിതമായ ക്ഷീണം അനുഭവപ്പെട്ടാൽ ആശുപത്രിയിൽ പോകാൻ മടിക്കരുത്.

കൈകാലുകളിലെ വീക്കം

പാദങ്ങൾ, കണങ്കാൽ, കാലുകൾ എന്നിവിടങ്ങളിൽ ഉണ്ടാകുന്ന വീക്കം ശരീരത്തിൽ ദ്രാവകം അടിഞ്ഞുകൂടുന്നതിന്റെ ലക്ഷണമാണ്. രക്തചംക്രമണത്തിലെ തകരാറോ ഹൃദയപേശികളുടെ ബലക്കുറവോ ഇതിന് കാരണമാകാം.

ഓക്കാനം അല്ലെങ്കിൽ ദഹനക്കേട്

ഹൃദയസംബന്ധമായ പ്രശ്നങ്ങൾ മൂലമുണ്ടാകുന്ന ഓക്കാനം പലരും കാര്യമറിയാതെ അവഗണിക്കാറുണ്ട്. ഇത് ഹൃദ്രോഗത്തിന്റെ ലക്ഷണമാണ്. ദഹനക്കേടിനൊപ്പം മറ്റ് ലക്ഷണങ്ങൾ കൂടി ഉണ്ടെങ്കിൽ അത് ശ്രദ്ധിക്കേണ്ടതാണ്.

താടിയെല്ല്, കഴുത്ത്, പിൻഭാഗം അല്ലെങ്കിൽ കൈകളിലെ വേദന

നെഞ്ചിൽ നിന്നാരംഭിച്ചു ശരീരത്തിന്റെ മറ്റ് ഭാഗങ്ങളിലേക്ക് പടരുന്ന വേദന ഹൃദ്രോഗത്തിന്റെ ഒരു പ്രധാന ലക്ഷണമാണ്. താടിയെല്ല്, പുറംഭാഗം, കൈകൾ എന്നിവിടങ്ങളിലെ വേദനയ്ക്കൊപ്പം ശ്വാസംമുട്ടലോ നെഞ്ചുവേദനയോ ഉണ്ടെങ്കിൽ അത് ഹൃദയാഘാതത്തിന്റെ ലക്ഷണമാകാം.

തണുക്കുകയും വിയർക്കുകയും ചെയ്യുന്നത്

അപ്രതീക്ഷിതമായി ശരീരം തണുക്കുകയും ഒപ്പം വിയർക്കുകയും ചെയ്യുന്നത് ഹൃദയസംബന്ധമായ അടിയന്തര സാഹചര്യങ്ങളിൽ ശരീരം പ്രതികരിക്കുന്നത് കൊണ്ടാണ്. ഹൃദയാഘാത സമയത്ത് പലരിലും ഇത്തരം ലക്ഷണം കാണാറുണ്ട്.

വേഗതയേറിയതോ ക്രമരഹിതമോ ആയ പൾസ്

തുടർച്ചയായി വേഗത കൂടിയതോ ക്രമരഹിതമോ ആയ പൾസ് 'ഏട്രിയൽ ഫിബ്രിലേഷൻ' പോലുള്ള അവസ്ഥകളുമായി ബന്ധപ്പെട്ടിരിക്കുന്നു. ഇത് നേരത്തെ കണ്ടെത്തുന്നത് ഭാവിയിലെ അപകടസാധ്യതകൾ കുറയ്ക്കാൻ സഹായിക്കും.