അഭയാര്ത്ഥി ജീവിതത്തിന് വിരാമമിട്ട് ഇവോ മൊറേല്സ് ബോളിവിയയിലേക്ക്
First Published Nov 12, 2020, 4:35 PM IST
" ഞാന് തിരിച്ച് വരും " എന്ന് പറഞ്ഞായിരുന്നു ബോളീവിയയുടെ പ്രസിഡന്റായിരുന്ന ഇവോ മൊറേല്സ്, 2019 നവംബറില് അര്ജന്റീനയിലേക്ക് ഒളിച്ചോടിയത്. ആ വാക്കുകള് യാഥാര്ത്ഥ്യമാക്കി ഒരു വര്ഷം തികയുമ്പോള് അദ്ദേഹം സ്വരാജ്യത്തേക്ക് തിരിച്ച് വരികയാണ്. 14 വര്ഷം ബോളിവിയ ഭരിച്ച ആദ്യത്തെ തദ്ദേശീയനായ പ്രസിഡന്റായിരുന്നു ഇവോ മൊറേല്സ്. എന്നാല് തെരഞ്ഞെടുപ്പില് കൃത്രിമം കാണിച്ചെന്നാരോപണത്തെ തുടര്ന്നാണ് ഇവോ മൊറേല്സിന് രാജ്യം വിടേണ്ടിവന്നത്. ആരോപണങ്ങള് അന്ന് നിഷേധിക്കുകയും താന് തെരഞ്ഞെടുപ്പില് വിജയിച്ചെന്നും അദ്ദേഹം അവകാശപ്പെട്ടിരുന്നു. എന്നാല്, രാജ്യം വിട്ട് പോകാനായിരുന്നു സാഹചര്യങ്ങള് അദ്ദേഹത്തെ പ്രയരിപ്പിച്ചത്. അല്പ കാലം മെക്സിക്കോയിലും 2019 ഡിസംബര് മുതല് ബ്യൂണസ് അയേഴ്സിലുമായി താമസിക്കുകയായിരുന്നു അദ്ദേഹം. പഴയ പ്രസിഡന്റിന്റെ മടങ്ങി വരവ് ആഘോഷമാക്കാന് കാത്തിരിക്കുകയാണ് അദ്ദേഹത്തിന്റെ ബോളിവിയന് ആരാധകര്.