പിളര്ന്നും ലയിച്ചും ഒരു പാര്ട്ടി; കേരള കോണ്ഗ്രസ് ഒരു രാഷ്ട്രീയ ചിത്രകഥ
First Published Jun 17, 2019, 4:57 PM ISTവളരുന്തോറും പിളരുക. പിളരുന്തോറും വളരുക. കേരള കോണ്ഗ്രസ് എന്ന രാഷ്ട്രീയ പ്രതിഭാസത്തിന്റെ ചരിത്രം ഈ വാക്കുകളിലുണ്ട്. 1964ല് രൂപീകൃതമായതു മുതല് ഇതുവരെ 11 തവണ ഈ പാര്ട്ടി പിളര്ന്നു. പല നേതാക്കന്മാരുടെ മുന്കൈയില് പല പാര്ട്ടികളായി പിളര്ന്നെങ്കിലും അവയെല്ലാം പലപ്പോഴും ലയിച്ചു. വീണ്ടും പിളര്ന്നു. പലപ്പോഴും ഇടതു വലതു മുന്നണികളില് പ്രബലരായി നിന്നു. കേരള കോണ്ഗ്രസിന്റെ ചരിത്രത്തിലൂടെ നടക്കുമ്പോള് നാമറിയുന്നത് കേരള രാഷ്ട്രീയത്തിന്റെ കൂടി വിചിത്രമായ വഴിത്തിരിവുകളാണ്.
1960 കളുടെ ആദ്യ പാദത്തില് കേരള രാഷ്ട്രീയം കലങ്ങി മറിഞ്ഞതോടെയാണ് കേരള കോണ്ഗ്രസിന്റെ പിറവിക്ക് വഴി തെളിയുന്നത്. 1960-ല് പട്ടം താണുപിളളയുടെ നേതൃത്വത്തില് കോണ്ഗ്രസ്-പി.എസ്.പി കൂട്ടുമന്ത്രിസഭ അധികാരത്തില് വന്നതു മുതല് പ്രശ്നങ്ങള് ആരംഭിച്ചു. കോണ്ഗ്രസിലെ നിയമസഭാഘടകവും സംഘടനാ ഘടകവും തമ്മില് ചേരിതിരിവുണ്ടായി. സംഘടനാ തലത്തില് കെ. പി. സി. സി. അധ്യക്ഷന് സി. കെ. ഗോവിന്ദന്നായരുടെ നേതൃത്വവും നിയമസഭാഘടകത്തില് പി ടി ചാക്കോ, ആര്. ശങ്കര് എന്നിവരുടെ നേതൃത്വവും അംഗീകരിക്കപ്പെട്ടിരുന്നു. താണുപിള്ള പഞ്ചാബ് ഗവര്ണറായപ്പോള് ആര്. ശങ്കര് മുഖ്യമന്ത്രിയും പി ടി ചാക്കോ ആഭ്യന്തര മന്ത്രിയുമായി. ഇരു ഘടകങ്ങളും തമ്മിലുള്ള പ്രശ്നങ്ങള് വളര്ന്ന് 1964 ഫെബ്രുവരി 20 ന് മന്ത്രിസഭയില് നിന്ന് പി ടി. ചാക്കോ രാജി വെച്ചു. 1964 ജൂണില് നടന്ന കെ.പി.സി.സി. പ്രസിഡന്റ്് തിരഞ്ഞെടുപ്പില് ചാക്കോ മത്സരിച്ചെങ്കിലും പരാജയപ്പെട്ടു. ആഗസ്ത് 2-ന് പിടി ചാക്കോ മരിച്ചു.
ഈ ഘട്ടത്തില് പ്രജാസോഷ്യലിസ്റ്റ് പാര്ട്ടി ശങ്കര് മന്ത്രിസഭയ്ക്കെതിരായി നിയമസഭയില് അവിശ്വാസം കൊണ്ടുവന്നു. ചാക്കോ ഗ്രൂപ്പിലുണ്ടായിരുന്ന നിയമസഭാ സാമാജികരില് പതിനഞ്ചുപേര് മന്ത്രിസഭയ്ക്കെതിരായി വോട്ടു ചെയ്തു. അങ്ങനെ അവിശ്വാസ പ്രമേയം പാസാകുകയും ശങ്കര് രാജിവയ്ക്കുകയും ചെയ്തു. ചാക്കോ ഗ്രൂപ്പുകാര് കെ.എം. ജോര്ജിന്റെ നേതൃത്വത്തില് 'കേരള പ്രദേശ് കോണ്ഗ്രസ് സമുദ്ധാരണസമിതി' എന്ന പേരില് ഒരു പുതിയ രാഷ്ട്രീയ പാര്ട്ടി രൂപവല്കരിച്ചു. 1964 ഒക്ടോബര് ഒമ്പതിന് ഈ പാര്ട്ടി കേരളകോണ്ഗ്രസ് എന്ന് പേരു മാറ്റി.
കോട്ടയത്തെ തിരുനക്കര മൈതാനിയില് വെച്ച് മന്നത്ത് പത്മനാഭന് പതാക ഉയര്ത്തിയതുമുതല് പിളര്പ്പിലൂടെ വളരുന്ന ചരിത്രമാണ് കേരള കോണ്ഗ്രസിനുള്ളത്. 1964 മുതല് ഇന്നോളമുള്ള കേരള കോണ്ഗ്രസിന്റെ ചരിത്രം പതിനൊന്ന് പിളര്പ്പുകളുടേത് കൂടിയാണ്. ലോക് സഭാ തെരഞ്ഞെടുപ്പില് സ്ഥാനാര്ഥിയാകാനായി പി ജെ ജോസഫ് ഉയര്ത്തിവിട്ട കലാപം ചായക്കോപ്പയിലെ കൊടുങ്കാറ്റ് പോലെ കെട്ടടങ്ങിയെങ്കിലും കെ എം മാണിയുടെ വിയോഗത്തിന് ശേഷം പാര്ട്ടി ചെയര്മാന് സ്ഥാനത്തിനായുള്ള അധികാര വടംവലി കേരളാ കോണ്ഗ്രസിലെ പതിനൊന്നാം പിളര്പ്പിലേക്ക് നയിക്കുകയായിരുന്നു.