ഈ വേനൽക്കാലത്ത് പലരേയും അലട്ടുന്ന ഒന്നാണ് ചർമ്മ സംബന്ധമായ പ്രശ്നങ്ങൾ. മുഖക്കുരു, കണ്ണിന് ചുറ്റും കറുപ്പ് ഇങ്ങനെ വിവിധ ചർമ്മ പ്രശ്നങ്ങൾ അലട്ടാം. വീട്ടിലെ തന്നെ ചില ചേരുവകൾ ഉപയോഗിച്ച് ചർമ്മ പ്രശ്നങ്ങൾ അകറ്റാം.
ചര്‍മ്മസംരക്ഷണത്തിന് ഏറ്റവും മികച്ചതാണ് കറ്റാർവാഴ. മുഖത്തെ കറുത്തപാടുകള്‍, മുഖക്കുരു എന്നിവ അകറ്റാനും കറ്റാർവാഴ സഹായിക്കും. ഇതിനായി കറ്റാർവാഴ ജെല്‍ മുഖക്കുരുവിലും അതിന്റെ പാടുകളിലുമെല്ലാം പുരട്ടാം. 30 മിനിറ്റിന് ശേഷം കഴുകി കളയാം.
ശുദ്ധമായ വെളിച്ചെണ്ണ ചർമ്മത്തിൽ പുരട്ടുന്നത് തിളക്കം വർധിപ്പിക്കാൻ സഹായിക്കും. വെളിച്ചെണ്ണ ചർമ്മത്തെ മൃദുവാക്കുക മാത്രമല്ല, സ്വാഭാവികത നിലനിർത്താൻ കൂടി സഹായിക്കുന്നു. ശരീരത്തിലെ ചെറുസുഷിരങ്ങൾ അടയ്ക്കാൻ വെളിച്ചെണ്ണയിലെ കൊഴുപ്പിന്റെ സാന്നിധ്യം സഹായിക്കുന്നു.
മുഖത്തെ ചുളിവുകൾ തടയാനും ചര്‍മ്മം തിളങ്ങാനും മികച്ചതാണ് വാഴപ്പഴം. ഇതിനായി പകുതി പഴം, ഒരു ടീസ്പൂണ്‍ തേന്‍, ഒരു ടീസ്പൂണ്‍ പാല്‍ എന്നിവ ചേര്‍ത്ത് മിശ്രിതമാക്കുക. ശേഷം ഈ മിശ്രിതം മുഖത്ത് പുരട്ടി മസാജ് ചെയ്യാം. 20 മിനിറ്റിന് ശേഷം ഇളംചൂടുവെള്ളം കൊണ്ട് കഴുകാം.
മുഖത്ത് വെയിലേറ്റ് വീഴുന്ന കറുത്ത പാടുകൾ മാറ്റാനും അൾട്രാവയലറ്റ് കിരണങ്ങൾ കാരണമുണ്ടാകുന്ന പരിക്കുകൾ കുറയ്ക്കാനും തണുത്ത ഗ്രീൻ ടീ ബാഗ് ഉപയോഗിക്കാം. ടീ ബാഗ് 30 മിനിറ്റ് ഫ്രഡ്ജിൽ സൂക്ഷിച്ച ശേഷം കൺപോളകളിൽ ഉപയോഗിക്കുന്നത് കണ്ണിലെ നീർക്കെട്ട് കളയാനും മുഖത്തെ കലകൾ ഇല്ലാതാക്കാനും സഹായിക്കും.
അര ടീസ്പൂൺ മഞ്ഞൾപ്പൊടി, അര ടീസ്പൂണ്‍ പാല്‍ എന്നിവ നന്നായി മിശ്രിതമാക്കുക. ശേഷം ഈ മിശ്രിതം മുഖത്തു പുരട്ടി ഉണങ്ങുമ്പോൾ കഴുകാം. പതിവായി ഇത് ചെയ്യുന്നത് മുഖക്കുരുവിന്‍റെ പാടുകള്‍ മാറാന്‍ സഹായിക്കും.