Finland Border: ഫിന്ലന്ഡ് അതിര്ത്തിയിലേക്ക് ആണവശേഷിയുള്ള ഇസ്കന്ദർ മിസൈലുകളുമായി റഷ്യ
First Published May 18, 2022, 2:42 PM ISTഫെബ്രുവരി 24 ന് യുക്രൈന് അക്രമണത്തിന് റഷ്യയുടെ മുന്നിലുണ്ടായിരുന്ന പ്രധാന കാരണം, യുക്രൈന്, യുഎസ് നേതൃത്വത്തിലുള്ള നാറ്റോ സൈനിക സഖ്യത്തിന്റെ ഭാഗമാകാന് ശ്രമിക്കുന്നുവെന്നതായിരുന്നു. അതിന് മറയായി, യുക്രൈനിയന് ഭരണകൂടം നവനാസി സംഘത്തിന്റെ പിടിയിലാണെന്നും നവനാസികളില് നിന്നും യുക്രൈന് ഭരണകൂടത്തെ മോചിപ്പിക്കാനുള്ള സൈനിക നടപടി മാത്രമാണ് തങ്ങളുടെത് എന്നുമായിരുന്നു പുടിന്റെ യുക്രൈന് ആക്രമണ ന്യായീകരണം. റഷ്യ, യുക്രൈന് അധിനിവേശം ആരംഭിച്ച് ഏതാണ്ട് മൂന്ന് മാസം തികയാന് ദിവസങ്ങള് മാത്രം ബാക്കിയുള്ളപ്പോള്, യൂറോപ്പിന്റെ വടക്കന് കിഴക്കന് മേഖലയില് റഷ്യ പുതിയൊരു യുദ്ധമുഖം തുറക്കുകയാണോയെന്ന ആശങ്കയിലാണ് ലോകം. റഷ്യയുടെ യുദ്ധ നീക്കം രാജ്യങ്ങള് തമ്മിലുള്ള സൈനിക ബാലാബലത്തിലേക്ക് ലോകത്തെ വീണ്ടും എത്തിക്കുമോയെന്ന ഭയവും നിലനില്ക്കുന്നു. യുക്രൈന് ആക്രമണം റഷ്യ കടുപ്പിച്ചതിനെ തുടര്ന്നാണ് ഫിന്ലന്ഡും സ്വീഡനും നാറ്റോ അംഗത്വത്തിനായി ശ്രമം ആരംഭിച്ചത്.