ആഭ്യന്തര മന്ത്രിയായിരുന്നെങ്കിൽ ബുദ്ധിജീവികളെ വെടിവച്ചു കൊല്ലുമായിരുന്നു: ബിജെപി നേതാവ് ബസനഗൗഡ പാട്ടീൽ
ബിജെപി നിയമോപദേഷ്ടാവ് ബസനഗൗഡ പാട്ടീൽ യത്നൽ
2002 മുതൽ 2004 വരെ വാജ്പേയി സർക്കാരിൽ റെയിൽവേ- ടെക്സ്റ്റൈൽസ് സഹമന്ത്രി
വിജയപുര: തനിക്ക് ആഭ്യന്തര മന്ത്രി എന്ന അധികാരം ഉണ്ടായിരുന്നങ്കിൽ സംസ്ഥാനത്തെ എല്ലാ ബുദ്ധിജീവികളെയും വെടിവച്ച് കൊല്ലാൻ ഉത്തരവിടുമായിരുന്നു എന്ന് ബിജെപി നിയമോപദേഷ്ടാവ് ബസനഗൗഡ പാട്ടീൽ യത്നൽ. കാർഗിൽ വിജയ് ദിവസ് പരിപാടിയിൽ പങ്കെടുത്ത് സംസാരിക്കുകയായിരുന്നു ഇദ്ദേഹം. ബുദ്ധിജീവികളിൽ നിന്നും ചിന്തകരിൽ നിന്നും കൂടുതൽ ഭീഷണി നേരിടേണ്ടി വരുന്നുണ്ടെന്നും അദ്ദേഹം കൂട്ടിച്ചേർത്തു.
നമ്മളുടെ നികുതിപ്പണത്തിൽ നിന്നും ലഭിക്കുന്ന സൗകര്യങ്ങൾ അനുഭവിച്ചാണ് ഈ ബുദ്ധിജീവികൾ ഇവിടെ ജീവിക്കുന്നത്. എന്നാൽ ഇന്ത്യയ്ക്കെതിരെ അവർ മുദ്രാവാക്യം മുഴക്കുകയും ചെയ്യുന്നു. നമ്മുടെ രാജ്യത്തിന് വളരെയധികം ഭീഷണി ഉയർത്തുന്നവരാണിവർ. ബസന ഗൗഡ പറഞ്ഞു. ഈ പ്രസ്താവനകളെ ജനങ്ങൾ ഹർഷാരവത്തോടെയാണ് സ്വീകരിച്ചത്. മുസ്ലീം വിഭാഗത്തെ ഒരു വിധത്തിലും സഹായിക്കാൻ പാടില്ല എന്നൊരു വിവാദ പ്രസ്താവനയും അടുത്തിടെ ബസനഗൗഡ ഇറക്കിയിരുന്നു. 1994 മുതൽ 1999 വരെ എംഎൽഎയും 1999 മുതൽ 2009 വരെ എംപിയും ആയിരുന്ന വ്യക്തിയാണ് ബസനഗൗഡ. 2002 മുതൽ 2004 വരെ വാജ്പേയി സർക്കാരിൽ റെയിൽവേ- ടെക്സ്റ്റൈൽസ് സഹമന്ത്രിയായിരുന്നു.