പുത്തന് ഹോണ്ട സിറ്റി ഇന്ത്യയിലേക്ക്
ജാപ്പനീസ് വാഹനനിര്മ്മാതാക്കളായ ഹോണ്ടയുടെ പ്രീമിയം സെഡാനായ സിറ്റി അടിമുടി മാറ്റങ്ങളോടെ ഇന്ത്യയിലേക്ക്. അഞ്ചാംതലമുറ സിറ്റി മാര്ച്ച് 16നാണ് ഇന്ത്യയിലെത്തുക.
ജാപ്പനീസ് വാഹനനിര്മ്മാതാക്കളായ ഹോണ്ടയുടെ പ്രീമിയം സെഡാനായ സിറ്റി അടിമുടി മാറ്റങ്ങളോടെ ഇന്ത്യയിലേക്ക്. അഞ്ചാംതലമുറ സിറ്റി മാര്ച്ച് 16നാണ് ഇന്ത്യയിലെത്തുക. ഇന്ത്യന് വിപണിക്കുവേണ്ട സ്പെസിഫിക്കേഷനുകളോടെ നിര്മിച്ച മിഡ്സൈസ് സെഡാനാണ് ഇന്ത്യയിലേക്ക് എത്തുന്നത്. അന്നുതന്നെ വാഹനത്തിന്റെ ഔദ്യോഗിക ബുക്കിംഗ് ആരംഭിച്ചേക്കും. പുതിയ സിറ്റിയുടെ ആദ്യ ടീസര് ഹോണ്ട കാര്സ് ഇന്ത്യ ഈയിടെ പുറത്തുവിട്ടിരുന്നു.
2019 നവംബറില് തായ്ലന്ഡില് ആഗോള അരങ്ങേറ്റം നടത്തിയ സിറ്റിയും ഇന്ത്യയില് അനാവരണം ചെയ്യുന്ന സിറ്റിയും വളരെ സാമ്യമുള്ളതായിരിക്കും. എന്നാല് ഇന്ത്യന് വിപണിക്ക് ആവശ്യമായ മാറ്റങ്ങള് വരുത്തും. കൂടുതല് പ്രീമിയമെന്ന് തോന്നിപ്പിക്കുന്നതിന് ഡുവല് ടോണ് നിറങ്ങള്, ബ്രഷ്ഡ് അലുമിനിയം അലങ്കാരങ്ങള് എന്നിവ കാറിനകത്ത് നല്കും. ഇസഡ്എക്സ് എന്ന ടോപ് സ്പെക് വേരിയന്റില് സണ്റൂഫ്, 16 ഇഞ്ച് അലോയ് വീലുകള്, പൂര്ണമായും എല്ഇഡി ഹെഡ്ലാംപുകള് എന്നിവ സ്റ്റാന്ഡേഡായി നല്കും.
ബിഎസ് 6 പാലിക്കുന്ന 1.5 ലിറ്റര് ഡീസല്, 1.5 ലിറ്റര് പെട്രോള് എന്നിവയായിരിക്കും പുതിയ ഹോണ്ട സിറ്റിയുടെ എന്ജിന് ഓപ്ഷനുകള്. മുമ്പുണ്ടായിരുന്ന പെട്രോള്, ഡീസല് എന്ജിനുകള്ക്കൊപ്പം പുതിയ 1.0 ലിറ്റര് മൂന്ന് സിലണ്ടര് പെട്രോള് എന്ജിനിലും, ഹൈബ്രിഡ് എന്ജിനിലും ഇത്തവണ സിറ്റി എത്തുമെന്നാണ് റിപ്പോര്ട്ടുകള്. 1.5 ലിറ്റര് പെട്രോള് എന്ജിനിലായിരിക്കും ഹൈബ്രിഡ് മോഡല് എത്തുക.
1.5 ലിറ്റര് i-VTEC എഞ്ചിനാണ് പെട്രോള് വകഭേദത്തിന്റെ ഹൃദയം. 6 സ്പീഡ് മാനുവല്/സിവിടി ട്രാന്സ്മിഷനില് ഈ എഞ്ചിന് 117 ബിഎച്ച്പി കരുത്തും 145 എന്എം ടോര്ക്കും സൃഷ്ടിക്കും. ഡീസല് സിറ്റിയില് 1.5 ലിറ്റര് i-DTEC എഞ്ചിന് 6 സ്പീഡ് മാനുവല് ട്രാന്സ്മിഷനില് 100 ബിഎച്ച്പി കരുത്തും 200 എന്എം ടോര്ക്കുമേകും.
ഹോണ്ടയുടെ മറ്റ് സെഡാന് മോഡലുകളായ സിവിക്, അക്കോഡ് മോഡലുകളോട് സമാനമാണ് പുതുതലമുറ സിറ്റിക്കും. ബംമ്പറിന്റെയും ഗ്രില്ലിന്റെയും വലിപ്പം കൂടി. എല്.ഇ.ഡി ഹെഡ്ലാമ്പ്, എല്.ഇ.ഡി ഡേടൈംറണ്ണിങ് ലൈറ്റ്, എല്.ഇ.ഡി ഫ്രണ്ട് ഫോഗ് ലാമ്പ് എന്നിവ മുന്വശത്തെ അലങ്കരിക്കുന്നു.
ആഗോള വിപണിയില് അടുത്തിടെ എത്തിയ ജാസിന്റേതിന് സമാനമാണ് തായ്ലന്ഡില് അവതരിപ്പിച്ച വാഹനത്തിന്റെയും ഇന്റീരിയര്. പുതിയ ഡിസൈനിലുള്ള സ്റ്റിയറിങ്, ഡിജിറ്റല് ഇന്സ്ട്രുമെന്റ് കണ്സോള്, ടച്ച് സ്ക്രീന് ഇന്ഫോടെയ്ന്മെന്റ് സിസ്റ്റം എന്നീ ഫീച്ചറുകള് പുതിയ സിറ്റിയില് അധികമായി നല്കിയിട്ടുണ്ട്.
പുതിയ ഡ്യുവല് ടോണ് ഡയമണ്ട് കട്ട് അലോയി വീല്, ഡോറിന് ചുറ്റും നല്കിയിട്ടുള്ള ക്രോമിയം സ്ട്രിപ്പ്, ഷാര്ക്ക് ഫിന് ആന്റിന, പ്രീമിയം കാറുകളോട് കിടപിടിക്കുന്ന സി ഷെയ്പ്പ് എല്ഇഡി ടെയില് ലാമ്പ്, എന്നിവയാണ് എക്സ്റ്റീരിയറിനെ അലങ്കരിക്കും.
1998 ജനുവരിയിലാണ് ഹോണ്ടയുടെ ഉപസ്ഥാപനമായ ഹോണ്ട കാഴ്സ് ഇന്ത്യ ലിമിറ്റഡ്(എച്ച് സി ഐ എൽ) ആഭ്യന്തര വിപണിയിൽ സിറ്റി വിൽപ്പനയ്ക്കു തുടക്കമിടുന്നത്. വിപണിയിലെത്തിയ ശേഷം 2003ല് രണ്ടാം തലമുറയും 2008ല് മൂന്നാംതലമുറയും 2014ല് നാലാം തലമുറയും ഇന്ത്യന് നിരത്തുകളിലെത്തി. ഈ നാലാം തലമുറയാണ് ഇപ്പോള് നിരത്തുകളിലുള്ളത്.
ഇന്ത്യൻ വിപണിയിൽ ഏഴു ലക്ഷം യൂണിറ്റ് വിൽപ്പനയെന്ന നേട്ടം കൈവരിക്കുന്ന ആദ്യ പ്രീമിയം സെഡാനെന്ന നേട്ടം 2017 ഒക്ടോബറില് സിറ്റി സ്വന്തമാക്കിയിരുന്നു. നിലവിൽ സിറ്റിയുടെ മൊത്തം വിൽപ്പനയിൽ 25 ശതമാനത്തിലേറെ ഇന്ത്യയുടെ സംഭാവനയെന്നതാണ് ശ്രദ്ധേയം.
മാരുതി സുസുക്കി സിയാസ്, ടൊയോട്ട യാരിസ്, വരാനിരിക്കുന്ന പുതിയ ഹ്യുണ്ടായ് വെര്ണ, സ്കോഡ റാപ്പിഡ്, ഫോക്സ്വാഗണ് വെന്റോ എന്നിവരാണ് പുതിയ സിറ്റിയുടെ പ്രധാന എതിരാളികള്.