ഐ.ബി.പി.എസ് കോമൺ റിക്രൂട്ട്മെൻറ്: അപേക്ഷ സമർപ്പിക്കാൻ വീണ്ടും അവസരം
11 പൊതുമേഖല ബാങ്കുകളിലായി ക്ലർക്ക് തസ്തികയിൽ 1557 ഒഴിവുകളും ബാങ്ക് പ്രൊബേഷനറി ഓഫിസർ/മാനേജ്മെന്റ് ട്രെയിനി തസ്തികയിൽ 1167 ഒഴിവുകളുമാണ് റിപ്പോർട്ട് ചെയ്തിരിക്കുന്നത്.
ദില്ലി: ഐബിപിഎസ് കോമൺ റിക്രൂട്ട്മെന്റ് പരീക്ഷയ്ക്ക് അപേക്ഷ സമർപ്പിക്കാൻ വീണ്ടും അവസരം. ഐ.ബി.പി.എസ് 2020 ലേക്ക് നേരത്തെ പ്രസിദ്ധീകരിച്ച വിജ്ഞാപനപ്രകാരം അപേക്ഷ ഓൺലൈനായി പൂർത്തീകരിക്കാൻ കഴിയാത്തവർക്കും അതിനുശേഷം യോഗ്യത നേടിയവർക്കുമാണ് അപേക്ഷിക്കാൻ വീണ്ടും അവസരം ലഭിച്ചിരിക്കുന്നത്. പൊതുമേഖല ബാങ്കുകളിൽ ക്ലർക്ക്, പ്രൊബേഷനറി ഓഫിസർ/മാനേജ്മെൻറ് ട്രെയിനീസ് തസ്തികകളിലേക്കും റീജനൽ റൂറൽ ബാങ്കുകളിൽ ഓഫിസർ, അസിസ്റ്റൻറ് (മൾട്ടിപർപ്പസ്) തസ്തികകളിലേക്കുമാണ് കോമൺ റിക്രൂട്ട്മെൻറിനായി പരീക്ഷ നടത്തുന്നത്.
ഇപ്പോൾ പ്രസിദ്ധീകരിച്ച അനുബന്ധ വിജ്ഞാപനവും 2021-22 വർഷത്തേക്കുള്ള റിക്രൂട്ട്മെൻറ് വിജ്ഞാപനവും www.ibps.inൽ ലഭ്യമാണ്. 11 പൊതുമേഖല ബാങ്കുകളിലായി ക്ലർക്ക് തസ്തികയിൽ 1557 ഒഴിവുകളും ബാങ്ക് പ്രൊബേഷനറി ഓഫിസർ/മാനേജ്മെന്റ് ട്രെയിനി തസ്തികയിൽ 1167 ഒഴിവുകളുമാണ് റിപ്പോർട്ട് ചെയ്തിരിക്കുന്നത്. അടുത്ത വർഷം ഒഴിവുകൾ ഇരട്ടിയിലധികം വർധിക്കുമെന്നും സൂചനയുണ്ട്.
ബിരുദവും കമ്പ്യൂട്ടർ പരിജ്ഞാനവുമുള്ളവർക്ക് ക്ലർക്ക് തസ്തികകളിൽ അപേക്ഷിക്കാം. ഹൈസ്കൂൾ, കോളജ് തലത്തിൽ കമ്പ്യൂട്ടർ/ഐ.ടി വിഷയമായി പഠിച്ചവരോ കമ്പ്യൂട്ടർ ഓപറേഷൻസ്/ഐ.ടിയിൽ ബിരുദധാരികളോ സർട്ടിഫിക്കറ്റുള്ളവരോ ആകണം. പ്രായം 20-28 വയസ്സ്. ഓഫിസർ/മാനേജ്മെൻറ് ട്രെയിനി തസ്തികകളിലേക്ക് അപേക്ഷിക്കാനുള്ള യോഗ്യത ബിരുദമാണ്. പ്രായം 20നും 30 നും ഇടയിലായിരിക്കണം.
സംവരണ വിഭാഗങ്ങൾക്ക് പ്രായപരിധിയിൽ ചട്ടപ്രകാരം ഇളവുണ്ട്. അപേക്ഷ ഓൺലൈനായി സമർപ്പിക്കണം. ക്ലറിക്കൽ തസ്തികക്ക് നവംബർ ആറു വരെയും പ്രൊബേഷനറി ഓഫിസർ/മാനേജ്മെൻറ് ട്രെയിനി തസ്തികക്ക് ഒക്ടോബർ 28 മുതൽ നവംബർ 11 വരെയും അപേക്ഷിക്കാം. ആദ്യം രജിസ്റ്റർ ചെയ്തവർക്ക് അപേക്ഷകളിൽ തിരുത്ത് വരുത്തുന്നതിനും അവസരമുണ്ട്.