മകനൊപ്പം എസ്എസ്സി പരീക്ഷ പാസ്സായി മുപ്പത്താറുകാരിയായ അമ്മ; ഇരുവരും നേടിയത് തിളക്കമാർന്ന വിജയം
അമ്മ ബേബി ഗുരാവ് 64.4 ശതമാനം മാർക്ക് നേടിയപ്പോൾ മകൻ സദാനന്ദ് നേടിയത് 73.2 ശതമാനം മാർക്കാണ്.
മഹാരാഷ്ട്ര: മകനൊപ്പം എസ്എസ്സി പരീക്ഷ എഴുതി പാസ്സായി അമ്മ. മഹാരാഷ്ട്രയിലെ ബരാമതിയിൽ നിന്നുള്ള അമ്മയും മകനുമാണ് ചരിത്രം രചിച്ച് ശ്രദ്ധേയരായത്. ജൂലൈ 29 നാണ് മഹാരാഷ്ട്രയിലെ എസ്എസ്സി ഫലം പ്രസിദ്ധീകരിച്ചത്. അമ്മ ബേബി ഗുരാവ് 64.4 ശതമാനം മാർക്ക് നേടിയപ്പോൾ മകൻ സദാനന്ദ് നേടിയത് 73.2 ശതമാനം മാർക്കാണ്. പത്താം ക്ലാസ് പരീക്ഷ എഴുതാൻ പൂർണ്ണ പിന്തുണ നൽകി കൂടെ നിന്നത് മകനും ഭർത്താവുമാണെന്ന് ബേബി ഗുരാവ് പറയുന്നു.
കുടുംബത്തിന് വേണ്ടി ഭക്ഷണം തയ്യാറാക്കുന്ന സമയത്തും പഠിക്കാനുള്ള പുസ്തകങ്ങൾ ബേബി ഒപ്പം കരുതിയിരുന്നു. പരീക്ഷ സമയത്ത് മകനൊപ്പമാണ് ഇവർ പഠിക്കാനിരുന്നത്. ഗ്രാമർ, ഗണിതം, മറ്റ് വിഷയങ്ങൾ എല്ലാം ആവർത്തിച്ച് പഠിച്ചു. വളരെ ചെറിയ പ്രായത്തിൽ തന്നെ വിവാഹം കഴിഞ്ഞതിനാൽ സ്കൂൾ വിദ്യാഭ്യാസം പൂർത്തിയാക്കാൻ എനിക്ക് സാധിച്ചിരുന്നില്ല. മകനൊപ്പം പത്താം ക്ലാസ് പരീക്ഷ എഴുതാനുള്ള പ്രോത്സാഹനം നൽകിയത് ഭർത്താവാണ്. ബേബി പറഞ്ഞു. വസ്ത്രനിർമ്മാണ കമ്പനിയിൽ ജീവനക്കാരിയാണ് ബേബി ഗുരാവ്.
എന്റെ ഭാര്യയും മകനും പരീക്ഷയ്ക്ക് വേണ്ടി കഠിനമായി പരിശ്രമിച്ചു. മികച്ച മാർക്ക് നേടുകയും ചെയ്തു. അവരുടെ പ്രകടനത്തെക്കുറിച്ച് എനിക്ക് അഭിമാനം തോന്നു‌ന്നു. ബേബിയുടെ ഭർത്താവ് ഗുരാവ് പറഞ്ഞു. പ്രാദേശിക ദിനപത്രത്തിൽ മാധ്യമപ്രവർത്തകനായി ജോലി ചെയ്യുകയാണ് ഇദ്ദേഹം.
