പവര്‍ പ്ലേ പിന്നിട്ടതിന് പിന്നാലെ യുസ്‌വേന്ദ്ര ചാഹലിനെ ബൗളിംഗിന് വിളിച്ച ക്യാപ്റ്റന്‍ രോഹിത് ശര്‍മക്ക് പിഴച്ചില്ല.  ആദ്യ പന്തില്‍ തന്നെ സിക്സിന് ശ്രമിച്ച പുരാനെ ബൗണ്ടറിയില്‍ ബിഷ്ണോയി കൈയിലൊതുക്കിയെങ്കിലും കാല്‍ ബൗണ്ടറി റോപ്പില്‍ തട്ടിയതിനാല്‍ സിക്സ് ആയി.

കൊല്‍ക്കത്ത: വെസ്റ്റ് ഇന്‍ഡീസിനെതിരായ ടി20 പരമ്പരയിലെ(IND vs WI 1st T20I) ആദ്യ മത്സരത്തില്‍ ഇന്ത്യക്ക് 158 റണ്‍സ് വിജയലക്ഷ്യം. ടോസ് നഷ്ടമായി ആദ്യം ബാറ്റ് ചെയ്ത വിന്‍ഡീസ് 20 ഓവറില്‍ ഏഴ് വിക്കറ്റ് നഷ്ടത്തില്‍157 റണ്‍സെടുത്തു. 43 പന്തില്‍ 61 റണ്‍സെടുത്ത നിക്കോളാസ് പുരാനാണ്(Nicholas Pooran) വിന്‍ഡീസീന്‍റെ ടോപ് സ്കോറര്‍. ഇന്ത്യക്കായി അരങ്ങേറ്റം കുറിച്ച രവി ബിഷ്ണോയിയും(Ravi Bishnoi) ഹര്‍ഷല്‍ പട്ടേലും രണ്ട് വിക്കറ്റ് വീതം വീഴ്ത്തി ബൗളിംഗില്‍ തിളങ്ങി.

ആദ്യ ഓവറിലെ ഞെട്ടിച്ച് ഭുവി

ടോസിലെ നിര്‍ഭാഗ്യം വിന്‍ഡീസിനെ ബാറ്റിംഗിലും പിന്തുടര്‍ന്നു. ഇന്നിംഗ്സിലെ രണ്ടാം പന്ത് തന്നെ ബൗണ്ടറി അടിച്ചു തുടങ്ങിയ ബ്രാണ്ടന്‍ കിംഗിനെ(Brandon King) അഞ്ചാം പന്തില്‍ ഭുവനേശ്വര്‍ കുമാര്‍(Bhuvneshwar Kumar) പോയന്‍റില്‍ സൂര്യകുമാര്‍ യാദവിന്‍റെ കൈകളിലെത്തിച്ചു. ആദ്യ ഓവറില്‍ വിക്കറ്റ് നഷ്ടമായെങ്കിലും വണ്‍ഡൗണായെത്തിയ നിക്കോളാസ് പുരാനും കെയ്ല്‍ മയേഴ്സും ചേര്‍ന്ന് പവര്‍ പ്ലേയില്‍ കൂടുതല്‍ നഷ്ടങ്ങളില്ലാതെ വിന്‍ഡീസിനെ 44 റണ്‍സില്‍ എത്തിച്ചു.

കറക്കി വീഴ്ത്തി ചാഹലും ബിഷ്ണോയിയും

പവര്‍ പ്ലേ പിന്നിട്ടതിന് പിന്നാലെ യുസ്‌വേന്ദ്ര ചാഹലിനെ ബൗളിംഗിന് വിളിച്ച ക്യാപ്റ്റന്‍ രോഹിത് ശര്‍മക്ക് പിഴച്ചില്ല. ആദ്യ പന്തില്‍ തന്നെ സിക്സിന് ശ്രമിച്ച പുരാനെ ബൗണ്ടറിയില്‍ ബിഷ്ണോയി കൈയിലൊതുക്കിയെങ്കിലും കാല്‍ ബൗണ്ടറി റോപ്പില്‍ തട്ടിയതിനാല്‍ സിക്സ് ആയി. എന്നാല്‍ ആ ഓവറിലെ അഞ്ചാം പന്തില്‍ കെയ്ല്‍ മയേഴ്സിനെ(24 പന്തില്‍ 31) വിക്കറ്റിന് മുന്നില്‍ കുടുക്കി ചാഹല്‍ പ്രതികാരം തീര്‍ത്തു.

തന്‍റെ ആദ്യ ഓവറില്‍ മൂന്ന് വൈഡ് എറിഞ്ഞെങ്കിലും നാലു റണ്‍സ് മാത്രമാണ് ബിഷ്ണോയി വിട്ടുകൊടുത്തത്. തന്‍റെ രണ്ടാം ഓവറില്‍ രണ്ട് വിക്കറ്റെടുത്ത് ബിഷ്ണോയി അരങ്ങേറ്റം ഗംഭീരമാക്കി. രണ്ടാം പന്തില്‍ റോസ്റ്റണ്‍ ചേസിനെ(4) വിക്കറ്റിന് മുന്നില്‍ കുടുക്കിയ ബിഷ്ണോയ്, അഞ്ചാം പന്തില്‍ റൊവ്‌മാന്‍ പവലിനെ(2) വെങ്കടേഷ് അയ്യരുടെ കൈകളിലെത്തിച്ചു. 10 ഓവറില്‍ 71-2 എന്ന ഭേദപ്പെട്ട സ്കോറില്‍ നിന്ന് ഇതോടെ വിന്‍ഡീസ് 74-4ലേക്ക് കൂപ്പുകുത്തി. ദീപക് ചാഹറിനെതിരെ സിക്സടിച്ച് തുടങ്ങിയ അക്കീല്‍ ഹൊസൈനെ(12 പന്തില്‍ 10) അതേ ഓവറില്‍ പിടികൂടി ചാഹര്‍ പ്രതികാരം തീര്‍ത്തതോടെ വിന്‍ഡീസ് 94-5ലേക്ക് വീണു.

 പുരാന്‍-പൊള്ളാര്‍ഡ് വെടിക്കെട്ട്

പുരാനും ക്യാപ്റ്റന്‍ കെയ്റോണ്‍ പൊള്ളാര്‍ഡും ചേര്‍ന്ന് വിന്‍ഡീസിനെ പതിനാറാം ഓവറില്‍ 100 കടത്തി. പതിനാറാം ഓവറില്‍ 108-5 എന്ന സ്കോറിലായിരുന്നു വിന്‍ഡീസിനെ അവസാന നാലോവറില്‍ 49 റണ്‍സടിച്ച് പൊള്ളാര്‍ഡും പുരാനും ചേര്‍ന്ന് റണ്‍സില്‍ 157 എത്തിച്ചു. 45 പന്തില്‍ അര്‍ധസെഞ്ചുറി തികച്ച പുരാന്‍ 61 റണ്‍സുമായി ഹര്‍ഷല്‍ പട്ടേലിന്‍റെ പന്തില്‍ പുറത്തായപ്പോള്‍ അവസാന രണ്ടോവറില്‍ 22 റണ്‍സടിച്ച പൊള്ളാര്‍ഡ് 19 പന്തില്‍ 24 റണ്‍സുമായി പുറത്താകാതെ നിന്ന് വിന്‍ഡീസിന് മാന്യമായ സ്കോര്‍ ഉറപ്പാക്കി.

ഇന്ത്യക്കായി രവി ബിഷ്ണോയി നാലോവറില്‍ 17 റണ്‍സിന് രണ്ട് വിക്കറ്റെടുത്ത് ടി20 അരങ്ങേറ്റത്തിലെ ഇന്ത്യന്‍ ബൗളറുടെ മൂന്നാമത്തെ മികച്ച ബൗളിംഗ് പ്രകടനത്തിന് ഉടമയായി.ഹര്‍ഷല്‍ പട്ടേല്‍ നാലോവറില്‍ 37 റണ്‍സിന് രണ്ട് വിക്കറ്റെടുത്തപ്പോള്‍ യുസ്‌വേന്ദ്ര ചാഹല്‍ നാലോവറില്‍ 34 റണ്‍സിന് ഒരു വിക്കറ്റെടുത്തു. ഭുവനേശ്വര്‍ കുമാര്‍ ദീപക് ചാഹര്‍ എന്നിവരും ഓരോ വിക്കറ്റ് വീതം വീഴ്ത്തി.

India (Playing XI): Ishan Kishan, Rohit Sharma(c), Virat Kohli, Suryakumar Yadav, Rishabh Pant(w), Venkatesh Iyer, Deepak Chahar, Shardul Thakur, Harshal Patel, Ravi Bishnoi, Yuzvendra Chahal.

West Indies (Playing XI): Brandon King, Kyle Mayers, Nicholas Pooran(w), Rovman Powell, Kieron Pollard(c), Roston Chase, Romario Shepherd, Akeal Hosein, Odean Smith, Fabian Allen, Sheldon Cottrell.