അക്ഷയ്യുടെ പിറന്നാൾ ദിനത്തിന് തലേദിവസമാണ് അമ്മയുടെ വിയോഗം.
മുംബൈ: ബോളിവുഡ് നടൻ അക്ഷയ് കുമാറിന്റെ അമ്മ അരുണ ഭാട്ടിയ അന്തരിച്ചു. വാർധക്യസഹജമായ അസുഖങ്ങളെ തുടർന്ന് ഏതാനും ദിവസങ്ങളായി ചികിത്സയിലായിരുന്നു അരുണ. ‘അമ്മയായിരുന്നു എന്റെ എല്ലാം. ഈ വേദന സഹിക്കാനാവുന്നില്ല. എന്റെ അമ്മ ശ്രീമതി അരുണ ഭാട്ടിയ ഇന്ന് രാവിലെ ഈ ലോകത്തോട് വിട പറഞ്ഞു, മറ്റേതെങ്കിലും ലോകത്ത് എന്റെ അച്ഛനുമായി വീണ്ടും ഒന്നിച്ചു. ഓം ശാന്തി.’ എന്നാണ് മരണ വാർത്ത പങ്കുവച്ച് അക്ഷയ് കുറിച്ചത്.
മുംബൈയിലെ ഹിരനന്ദാനി ആശുപത്രിയിലായിരുന്നു അരുണ ഭാട്ടിയയുടെ അന്ത്യം. ഷൂട്ടിംഗിനായി ലണ്ടനിലായിരുന്ന അക്ഷയ്, അമ്മയുടെ അസുഖ വിവരം അറിഞ്ഞ് മുംബൈയിൽ എത്തിയിരുന്നു. അക്ഷയ്യുടെ പിറന്നാൾ ദിനത്തിന് തലേദിവസമാണ് അമ്മയുടെ വിയോഗം. സെപ്റ്റംബർ 9നാണ് അക്ഷയ് കുമാറിന്റെ ജന്മദിനം. ഹരി ഓം ഭാട്ടിയ ആണ് അക്ഷയ് കുമാറിന്റെ അച്ഛൻ.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്സിൻ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യർത്ഥിക്കുന്നു. ഒന്നിച്ച് നിന്നാൽ നമുക്കീ മഹാമാരിയെ തോൽപ്പിക്കാനാവും. #BreakTheChain #ANCares #IndiaFightsCorona
