'നമ്മള് തളരില്ല, നമുക്ക് ഒരു റോള് മോഡലുണ്ട്', ആരാധകന്റെ പ്രശംസയോട് പ്രതികരിച്ച് സാമന്തയും
ആരാധകന്റെ പോസ്റ്റിനോട് പ്രതികരിച്ച് സാമന്ത.
തെന്നിന്ത്യൻ പ്രേക്ഷകരുടെ പ്രിയപ്പെട്ട താരങ്ങളില് ഒരാളാണ് സാമന്ത. വിവിധ ഭാഷകളില് ഒട്ടേറെ ഹിറ്റ് ചിത്രങ്ങളില് സാമന്ത നായികയായിട്ടുണ്ട്. സാമൂഹ്യ മാധ്യമങ്ങളിലും സജീവമാണ് സാമന്ത. ഒരു ആരാധകൻ എഴുതിയ കുറിപ്പ് താരം റിട്വീറ്റ് ചെയ്തതാണ് ഇപ്പോഴത്തെ ചര്ച്ച.
ഭാവിയില് നമുക്ക് എന്തെങ്കിലും പ്രശ്നങ്ങള് വന്നാല് നമ്മള് തളരില്ല. കാരണം നമുക്ക് റോള് മോഡലുണ്ട് എന്നാണ് സാമന്തയുടെ വര്ക്കൗട്ട് ഫോട്ടോ പങ്കുവെച്ച് ആരാധകൻ എഴുതിയത്. ഹൃദയ ചിഹ്നം ചേര്ത്ത് സാമന്ത തന്നെ കുറിപ്പ് പങ്കുവയ്ക്കുകയും ചെയ്തു. മയോസൈറ്റിസ് രോഗ ബാധയുണ്ടാകിലും വൻ തിരിച്ചുവരവ് നടത്തിക്കൊണ്ടിരിക്കുന്ന സാമന്ത പ്രചോദനമാണ് എന്നാണ് ആരാധകൻ ഉദ്ദേശിച്ചത്.
സാമന്ത നായികയായി 'ശാകുന്തളം' എന്ന സിനിമയാണ് ഇനി റിലീസ് ചെയ്യാനുള്ളത്. കാളിദാസന്റെ 'അഭിജഞാന ശാകുന്തളം' ആസ്പദമാക്കിയുള്ള സിനിമയില് സാമന്ത 'ശകുന്തള'യാകുമ്പോള് 'ദുഷ്യന്തനാ'കട്ടെ മലയാളത്തിന്റെ യുവ താരം ദേവ് മോഹനാണ്. ഗുണശേഖര് സംവിധാനം ചെയ്യുന്ന പുതിയ ചിത്രം ഫെബ്രുവരി 17നാണ് റിലീസ് ചെയ്യുകയെന്ന് അറിയിച്ചിട്ടുണ്ട്. സാമന്തയ്ക്ക് വലിയ പ്രതീക്ഷയുള്ള ഒരു ചിത്രമാണ് ശാകുന്തളം.
വിജയ് ദേവെരകൊണ്ടയുടെ നായികയായി തെലുങ്കിലും ഒരു പ്രധാന പ്രൊജക്റ്റ് സാമന്തയുടേതായിട്ടുണ്ട്. ശിവ നിര്വാണ സംവിധാനം ചെയ്ത 'ഖുഷി' എന്ന ചിത്രമാണ് സാമന്തയുടേതായി പുറത്തിറങ്ങാനുള്ളത്. 'ഖുഷി' എന്ന ചിത്രത്തിന്റെ തിരക്കഥയും ശിവ നിര്വാണയുടേത് തന്നെ. സാമന്തയ്ക്ക് ഏറെ പ്രതീക്ഷയുള്ള ചിത്രമാണ് ഇത്. ജയറാമും വിജയ് ദേവെരകൊണ്ടയ്ക്കൊപ്പം പ്രധാന കഥാപാത്രമായി എത്തുന്നു. സച്ചിൻ ഖെഡേക്കര്, മുരളി ശര്മ, വെണ്ണെല കിഷോര്, രാഹുല് രാമകൃഷ്ണ, ശ്രീകാന്ത് അയ്യങ്കാര് തുടങ്ങിയവരും ചിത്രത്തില് വേഷമിടുന്നു. 'ഹൃദയം' എന്ന ചിത്രത്തിലൂടെ പ്രിയങ്കരനായി മാറിയ ഹിഷാം അബ്ദുല് വഹാബാണ് സംഗീത സംവിധാനം. ഹിഷാം അബ്ദുള് വഹാബ് ആദ്യമായി സംഗീത സംവിധാനം നിര്വഹിക്കുന്ന തെലുങ്ക് ചിത്രവുമാണ് ഇത്.
Read More: അജിത്തിന്റെ പേര് നീക്കം ചെയ്തു, സംവിധായകൻ വിഘ്നേശ് ശിവൻ 'എകെ 62'ന് ഒപ്പമില്ല