പ്രകടനത്തില് വീണ്ടും ഞെട്ടിക്കുന്ന ജോജു.
ജോജു ജോര്ജ് നായകനാകുന്ന പുതിയ ചിത്രമാണ് പുലിമട. ജോജു വീണ്ടും പ്രകടനത്തില് ഞെട്ടിക്കുന്ന ചിത്രമായിരിക്കും പുലിമട എന്നാണ് പ്രതീക്ഷകള്. ഇതുവരെ പുറത്തുവിട്ട പ്രമോഷണല് മെറ്റീരിയലുകളും ചിത്രത്തില് പ്രതീക്ഷ വര്ദ്ധിപ്പിച്ചിരുന്നു. ഇപ്പോഴിതാ ആകാംക്ഷയുണര്ത്തി ജോജുവിന്റെ പുലിമടയുടെ ടീസര് പുറത്തുവിട്ടിരിക്കുന്നു.
വളരെ പ്രത്യകതയുള്ളതായിരിക്കും പുലിമട എന്ന് ടീസര് വ്യക്തമാക്കുന്നു. ജോജുവിന്റെ ഒരു പാൻ ഇന്ത്യൻ ചിത്രമായി എത്തുന്ന 'പുലിമട' എ കെ സാജൻ സംവിധാനം ചെയ്തപ്പോള് നായികയായിരിക്കുന്നത് ഐശ്വര്യ രാജേഷാണ്. വേണുവാണ് 'പുലിമട'യുടെ ഛായാഗ്രാഹണം. ചിത്രത്തില് നായികയായി ലിജോമോളും ഉണ്ട്.
ഐൻസ്റ്റീൻ മീഡിയയുടെയും ലാൻഡ് സിനിമാസിന്റെയും ബാനറില് ഐന്സ്റ്റീന് സാക് പോളും രാജേഷ് ദാമോദരനും ചേര്ന്നാണ് നിര്മാണം. ചിത്രത്തിന്റെ പ്രധാന ലൊക്കേഷൻ വയനാടായിരുന്നു. ഒരു ഷെഡ്യൂളിൽ തന്നെ 60 ദിവസം കൊണ്ട് ചിത്രീകരണം പൂർത്തിയാക്കിയ ബിഗ് ബഡ്ജറ്റ് ചിത്രമാണ് 'പുലിമട'. പ്രൊഡക്ഷൻ ഡിസൈനർ വിനേഷ് ബംഗ്ലാൻ.
ബാലചന്ദ്രമേനോൻ, ചെമ്പൻ വിനോദ്, ജോണി ആന്റണി, ജാഫർ ഇടുക്കി, ജിയോ ബേബി,അബു സലിം, സോന നായർ, കൃഷ്ണ പ്രഭ, പൗളി വിത്സൻ, ഷിബില തുടങ്ങിയവർ മറ്റു പ്രധാന കഥാപാത്രങ്ങളെ അവതരിപ്പിക്കുന്നു. പൊലീസ് കോൺസ്റ്റബിളായ 'വിൻസന്റ് സ്കറി'യയുടെ (ജോജു ജോർജ് ) വിവാഹവും അതുമായി ബന്ധപ്പെട്ട് നടക്കുന്ന സംഭവങ്ങളും അത് അയാളുടെ സ്വഭാവത്തിലും ജീവിതത്തിലും വരുത്തുന്ന മാറ്റങ്ങളുമാണ് 'പുലിമട'യിലൂടെ പ്രേക്ഷകനു മുന്നിലെത്തുന്നത്. ടൈറ്റിൽ സൂചിപ്പിക്കുന്നതുപോലെ തന്നെ ചിത്രത്തിലൂടെ സംവിധായകൻ ശരിക്കും ഒരു 'പുലിമട'യിലൂടെ തന്നെയാവും പ്രേക്ഷകരെ കൊണ്ടുപോവുക. ആർട് ജിത്തു സെബാസ്റ്റ്യൻ, മേക്കപ്പ് ഷാജി പുൽപള്ളി, വസ്ത്രാലങ്കാരം സുനിൽ റഹ്മാൻ, സ്റ്റെഫി സേവ്യർ, ചീഫ് അസോസിയേറ്റ് ഡയറക്ടർ ഹരീഷ് തെക്കേപ്പാട്ട്, സ്റ്റിൽസ് അനൂപ് ചാക്കോ, പിആർഒ മഞ്ജു ഗോപിനാഥ്, ഡിസൈൻസ് ഓൾഡ്മങ്ക്സ്, മാർക്കറ്റിംഗ് പ്ലാനിങ് ഒബ്സ്ക്യൂറ എന്റർടൈൻമെന്റ്. വിതരണം ആൻ മെഗാ മീഡിയ.
Read More: തെന്നിന്ത്യയില് ഒന്നാമത് ഏത് നായിക?, താരങ്ങളുടെ പട്ടിക പുറത്ത്
