ഫിഫ ലോകകപ്പിൽ കേപ് വെർഡെയ്ക്കെതിരായ മത്സരത്തിന് മുൻപ് സ്പാനിഷ് സൂപ്പർ താരം ലാമിൻ യമാലിന് പരിക്കേറ്റത് ടീമിന് തിരിച്ചടിയായി. ടൂർണമെന്റിന്റെ തുടക്കത്തിൽ താരത്തെ വെച്ച് റിസ്ക് എടുക്കാൻ ആഗ്രഹിക്കുന്നില്ലെന്ന് കോച്ച് ലൂയിസ് ഡി ലാ ഫ്യൂന്റെ വ്യക്തമാക്കി.
ബോസ്റ്റണ്: ഫിഫ ലോകകപ്പിലെ തങ്ങളുടെ അടുത്ത മത്സരത്തില് കേപ് വെര്ഡെയെ നേരിടാന് ഒരുങ്ങുന്ന സ്പെയിന് ക്യാമ്പില് നിന്നും ആശങ്കയുടെ വാര്ത്തകള്. ടീമിന്റെ ഏറ്റവും പ്രധാനപ്പെട്ട മുന്നേറ്റനിര താരവും ബാഴ്സലോണയുടെ സൂപ്പര് വിങ്ങറുമായ ലാമിന് യമാലിന് പരിക്കേറ്റതാണ് സ്പെയിനിന് തിരിച്ചടിയായിരിക്കുന്നത്. വരുന്ന മത്സരത്തില് ഈ 18-കാരന് ആദ്യ ഇലവനില് കളിക്കുമോ അതോ ബെഞ്ചിലിരിക്കുമോ എന്ന കാര്യത്തില് സ്പെയിന് പരിശീലകന് ലൂയിസ് ഡി ലാ ഫ്യൂന്റെ കൃത്യമായ സൂചനകള് നല്കി കഴിഞ്ഞു.
ടൂര്ണമെന്റിലെ ലോങ് റണ് മനസ്സില് കണ്ട് താരത്തിന്റെ കാര്യത്തില് വലിയ റിസ്ക് എടുക്കാന് ടീം മാനേജ്മെന്റ് തയ്യാറല്ല എന്നാണ് ലഭിക്കുന്ന വിവരങ്ങള്. കഴിഞ്ഞ മത്സരത്തിനിടയിലാണ് യമാലിന്റെ കാലിന് പരിക്കേറ്റത്. അതിനുശേഷം താരം ടീമിനൊപ്പം പൂര്ണ്ണമായ പരിശീലന സെഷനുകളില് പങ്കെടുത്തിരുന്നില്ല. മത്സരത്തിന് മുന്നോടിയായുള്ള വാര്ത്താസമ്മേളനത്തില് കോച്ച് ലൂയിസ് ഡി ലാ ഫ്യൂന്റെ പറഞ്ഞതിങ്ങനെ... ''ലാമിന് ഞങ്ങള്ക്ക് എത്രത്തോളം പ്രധാനപ്പെട്ട കളിക്കാരനാണെന്ന് എല്ലാവര്ക്കും അറിയാം. അവന്റെ പരിക്കിന്റെ അവസ്ഥ ഞങ്ങള് സൂക്ഷ്മമായി നിരീക്ഷിച്ചുവരികയാണ്. നിലവില് വലിയ കുഴപ്പങ്ങളൊന്നുമില്ലെങ്കിലും, ലോകകപ്പ് പോലുള്ള ഒരു വലിയ ടൂര്ണമെന്റിന്റെ തുടക്കത്തില് തന്നെ ഞങ്ങളുടെ പ്രധാന താരത്തെ വെച്ച് ഒരു റിസ്ക് എടുക്കാന് ഞാന് ആഗ്രഹിക്കുന്നില്ല.'' ഫ്യൂന്റെ വ്യക്തമാക്കി.
കേപ് വെര്ഡെയെക്കാള് റാങ്കിംഗിലും കരുത്തിലും ഏറെ മുന്നിലുള്ള സ്പെയിന്, യമാലിനെ തുടക്കത്തില് ബെഞ്ചിലിരുത്തി പകരക്കാരനായി ഇറക്കാനാണ് കൂടുതല് സാധ്യത. യമാലിന് വിശ്രമം അനുവദിക്കുകയാണെങ്കില് അത്ലറ്റിക്കോ മാഡ്രിഡ് താരം റോഡ്രിഗോ റിക്വല്മേയോ അല്ലെങ്കില് ഫെരാന് ടോറസോ ആ വിങ്ങിലേക്ക് ആദ്യ ഇലവനില് എത്തിയേക്കും. ഗ്രൂപ്പ് ഘട്ടത്തിലെ മറ്റ് കടുത്ത മത്സരങ്ങളും നോക്കൗട്ട് സ്റ്റേജും മുന്നിലുള്ളതിനാല് യമാലിന്റെ പരിക്ക് വഷളാകാതിരിക്കാനാണ് മെഡിക്കല് ടീമിന്റെയും ശ്രമം.
തന്റെ അവിശ്വസനീയമായ വേഗതയും ഡ്രിബ്ലിംഗ് മികവും കൊണ്ട് യൂറോ കപ്പിലടക്കം സ്പെയിനിന്റെ വിജയശില്പിയായ ലാമിന് യമാല് ആദ്യ ഇലവനില് ഇല്ലെങ്കില് പോലും, കേപ് വെര്ഡെയെ തകര്ത്തുവിടാനുള്ള കരുത്ത് തങ്ങളുടെ സ്ക്വാഡിനുണ്ടെന്ന ആത്മവിശ്വാസത്തിലാണ് സ്പാനിഷ് പട.
