സ്‌കൂള്‍ തുറക്കല്‍ മുതല്‍ ബാങ്കിംഗ് പരിഷ്‌കാരങ്ങള്‍ വരെ, 2021 ല്‍ നിര്‍ബന്ധമായും അറിഞ്ഞിരിക്കേണ്ടത്
ഒട്ടേറെ പുതുമകളുമായാണ് ഈ പുതു വര്‍ഷം പിറക്കുന്നത്. സ്‌കൂള്‍ തുറക്കുന്നത് മുതല്‍ ബാങ്കിംഗ് സേവനങ്ങളില്‍ വരെ വലിയ മാറ്റം ഉണ്ടാകുന്ന വര്‍ഷം കൂടിയാണ് 2021. ഈ വര്‍ഷം അറിഞ്ഞിരിക്കേണ്ട 12 കാര്യങ്ങള്‍.
സംസ്ഥാനത്തെ പ്രാഫഷണല്‍ കോളേജുകള്‍ ഉള്‍പ്പെടെയുള്ള ഉന്നത വിദ്യാഭ്യാസ സ്ഥാപനങ്ങള്‍ തിങ്കളാഴ്ച തുറക്കും. ശനിയാഴ്ച കൂടി പ്രവൃത്തിദിവസമാക്കിയാണ് അധ്യയനം. റൊട്ടേഷന്‍ അടിസ്ഥാനത്തിലാണ് ക്‌ളാസുകള്‍.
പല പരീക്ഷകളും ഇല്ലാത്ത വര്‍ഷമായിരുന്നു 2020. എന്നാല്‍ 2021 ല്‍ വിദ്യാര്‍ഥികള്‍ പരീക്ഷയ്ക്ക് ഒരുങ്ങണം. സിബിഎസ്ഇ പത്ത് പന്ത്രണ്ട് ക്ലാസ്സുകളിലെ പരീക്ഷകള്‍ മെയ് നാല് മുതല്‍ ജൂണ്‍ പത്ത് വരെ നടക്കും. എസ്എസ്എല്‍സി പരീക്ഷാത്തീയതിയും ഉടന്‍ പ്രഖ്യാപിക്കും.
ഇന്ന് മുതല്‍ ദേശീയ പാതകളില്‍ ടോള്‍ പിരിവ് ഫാസ് ടാഗ് വഴി മാത്രം. ഫാസ്റ്റാഗ് ഇല്ലാതെ എത്തിയാല്‍ അധിക തുക നല്‍കേണ്ടി വരും. പണമായി ടോള്‍ ഈടാക്കാന്‍ ഒറ്റ ബൂത്ത് മാത്രം ഫെബ്രുവരി പതിനഞ്ചുവരെ പ്രവര്‍ത്തിക്കുമെങ്കിലും ഫാസ്റ്റാഗ് ഇന്ന് മുതല്‍ നിര്‍ബന്ധമാണെന്ന് ദേശീയപാതാ അതോറിറ്റി വ്യക്തമാക്കി.
ഡെബിറ്റ് / ക്രെഡിറ്റ് കാര്‍ഡ് പിന്‍ നമ്പര്‍ നല്‍കാതെ അടയ്ക്കാവുന്ന തുകയുടെ പരിധി രണ്ടായിരത്തില്‍ നിന്ന് അയ്യായിരമായി ഉയര്‍ത്തിയത് ഇന്ന് നിലവില്‍ വരും. അയ്യായിരം രൂപവരെയുള്ള ബില്ലുകള്‍ ഇന്ന് മുതല്‍ പിന്‍ നമ്പര്‍ നല്‍കാതെ അടയ്ക്കാം.
വാഹന രജിസ്‌ട്രേഷന്‍ സര്‍ട്ടിഫിക്കറ്റും ഡ്രൈവിംഗ് ലൈസന്‍സും ഇന്ന് മുതല്‍ തപാലില്‍ വീട്ടിലെത്തും. ലൈസന്‍സ് സംബന്ധമായ
എല്ലാ സേവനങ്ങളും ഓണ്‍ലൈനാക്കി.
സംസ്ഥാന സര്‍ക്കാരിന്റെ സൗജന്യ ഭക്ഷ്യ കിറ്റ് പുതുവര്‍ഷത്തിലെ ആദ്യ നാലു മാസങ്ങളില്‍ കൂടി ലഭ്യമാകും. ഡിസംബര്‍ മാസത്തെ കിറ്റ്
ജനുവരി ഒമ്പതുവരെ വാങ്ങാം. ഡിസംബര്‍ മാസത്തെ റേഷന്‍ നാളെക്കൂടി വാങ്ങാം.
വിവിധ രേഖകള്‍ സമര്‍പ്പിക്കാനുള്ള കോവിഡ് കാല ഇളവുകള്‍ പുതുവര്‍ഷത്തില്‍ തുടരും.
ജനുവരി 10 വരെ ആദായ നികുതി റിട്ടേണ്‍ നല്‍കാം. കമ്പനികള്‍ക്ക് ഫെബ്രുവരി 15 വരെ റിട്ടേണ്‍ നല്‍കാം.
കോവിഡ് കാരണം എംപ്‌ളോയ്‌മെന്റ് എക്സ്സ്ചേഞ്ചില്‍ പേര് പുതുക്കാന്‍ കഴിയാത്തവര്‍ക്ക് ഫെബ്രുവരി 25 വരെ സമയം. വാഹന രേഖകള്‍ പുതുക്കാന്‍ കഴിയാത്തവര്‍ക്ക് മാര്‍ച്ച് 30 വരെ സമയം.
ഒരാള്‍ ഒന്‍പതു സിം കാര്‍ഡില്‍ കൂടുതല്‍ കൈവശം വെക്കരുതെന്ന നിബന്ധന പുതുവര്‍ഷത്തില്‍ കര്‍ശനമായി നടപ്പാക്കും. കൂടുതല്‍ സിം ഉള്ളവര്‍ അത് സേവനദാതാക്കളെ മടക്കി ഏല്‍പ്പിക്കണം.
വാഹന പുക പരിശോധനാ സര്‍ട്ടിഫിക്കറ്റ് ഇനി ഓണ്‍ലൈനായി മാത്രം. വാഹന്‍ സോഫ്റ്റ്വേറും പുക പരിശോധന കേന്ദ്രങ്ങളും തമ്മില്‍ ബന്ധിപ്പിക്കും.
ചെക്കുകള്‍ നല്‍കുന്നവര്‍ ഇനി ആര്‍ക്കാണ് അത് നല്‍കിയതെന്ന വിവരം ബാങ്കുമായി പങ്കുവെയ്ക്കണം. ഇത് ഒത്തുനോക്കി മാത്രമേ ബാങ്കുകള്‍ ചെക്ക് മാറി നല്‍കൂ. ഈ നിയമം പുതുവര്‍ഷത്തില്‍ നടപ്പാകും.
