വായുമലിനീകരണം: ദില്ലിയിലെ സ്കൂളുകൾക്ക് രണ്ട് ദിവസം കൂടി അവധി പ്രഖ്യാപിച്ചു
കഴിഞ്ഞ രണ്ട് ദിവസങ്ങളിലായി ദില്ലിയിലെ അന്തരീക്ഷ മലിനീകരണം ഗുരുതരാവസ്ഥയിലെത്തിയിരുന്നു. പരിസ്ഥിതി മലിനീകരണ നിയന്ത്രണ അതോറിറ്റിയാണ് സ്കൂളുകൾക്ക് അവധി നിർദ്ദേശിച്ചത്.
ദില്ലി: അന്തരീക്ഷ മലിനീകരണം രൂക്ഷമായതിനെ തുടർന്ന് ദില്ലിയിലെ സ്കൂളുകളിൽ രണ്ട് ദിവസം കൂടി അവധി പ്രഖ്യാപിച്ചു. ദില്ലി, നോയിഡ, ഗാസിയാബാദ് എന്നിവിടങ്ങളിലെ വിദ്യാഭ്യാസ സ്ഥാപനങ്ങൾക്കാണ് അവധി നൽകിയിരിക്കുന്നത്. കഴിഞ്ഞ രണ്ട് ദിവസങ്ങളിലായി ദില്ലിയിലെ അന്തരീക്ഷ മലിനീകരണം ഗുരുതരാവസ്ഥയിലെത്തിയിരുന്നു. പരിസ്ഥിതി മലിനീകരണ നിയന്ത്രണ അതോറിറ്റിയാണ് സ്കൂളുകൾക്ക് അവധി നിർദ്ദേശിച്ചത്. ദില്ലിയിലെ മിക്സിംഗ് പ്ലാന്റുകളും ക്രഷറുകളും വെള്ളിയാഴ്ച വരെ അടച്ചിടാനും അതോറിറ്റി നിർദ്ദേശം നൽകിയിട്ടുണ്ട്.
കൂടാതെ വാതക പ്ലാന്റുകൾ, കൽക്കരി ഉപയോഗിച്ച് പ്രവർത്തിക്കുന്ന വ്യവസായ ശാലകൾ എന്നിവയും നവംബർ 15 വരെ അടച്ചിടാൻ പരിസ്ഥിതി മലിനീകരണ നിയന്ത്രണ അതോറിറ്റി നിർദ്ദേശം നൽകിയിട്ടുണ്ട്. നഗരത്തിലെ വായുവിന്റെ ഗുണനിലവാരം വീണ്ടും അപകടകരമായ അവസ്ഥയിലേക്ക് എത്തിക്കൊണ്ടിരിക്കുകയാണെന്നും അതോറിറ്റി ചൂണ്ടിക്കാട്ടി.