'സത്യം എന്താണെന്ന് നിങ്ങള് മനസ്സിലാക്കണം'; വിവാഹമോചനഹര്ജിയെക്കുറിച്ച് ബിപ്ലബ് കുമാറിന്റെ ഭാര്യ
വിലകുറഞ്ഞ പ്രചാരണതന്ത്രമാണ് തന്റെ ഭര്ത്താവിനെതിരായ വാര്ത്തയെന്നാണ് നീതി ദേബ് ഫേസ്ബുക്കില് കുറിച്ചിരിക്കുന്നത്.
ദില്ലി: ത്രിപുര മുഖ്യമന്ത്രി ബിപ്ലബ് കുമാര് ദേബിനെതിരെ താന് ഗാര്ഹികപീഡന പരാതി നല്കിയെന്ന വാര്ത്ത തെറ്റാണെന്ന് ഭാര്യ നീതി ദേബിന്റെ ഫേസ്ബുക്ക് പോസ്റ്റ്. ഒരുകൂട്ടം മാധ്യമങ്ങള് തെറ്റായ വാര്ത്ത പ്രചരിപ്പിച്ചതാണെന്നും അവര് ആരോപിച്ചു. അതേസമയം, നീതി ദേബിന്റെ പേരിലുള്ള ഫേസ്ബുക്ക് അക്കൗണ്ട് യഥാര്ത്ഥത്തിലുള്ളതാണോ എന്ന കാര്യത്തില് സ്ഥിരീകരണമില്ലെന്നും എന്ഡിടിവി റിപ്പോര്ട്ട് ചെയ്തു.
വിലകുറഞ്ഞ പ്രചാരണതന്ത്രമാണ് തന്റെ ഭര്ത്താവിനെതിരായ വാര്ത്തയെന്നാണ് നീതി ദേബ് ഫേസ്ബുക്കില് കുറിച്ചിരിക്കുന്നത്. രാഷ്ട്രീയലാഭത്തിന് വേണ്ടി ചിലര് കരുതിക്കൂട്ടി മെനഞ്ഞെടുത്ത വാര്ത്തയാണിത്. തന്നോട് അല്പമെങ്കിലും സ്നേഹമുണ്ടെങ്കില് വാര്ത്ത വന്ന മാധ്യമങ്ങളെ ബഹിഷ്കരിക്കാന് തയ്യാറാവണമെന്നും അവര് ജനങ്ങളോട് ആഹ്വാനം ചെയ്തിട്ടുണ്ട്.
ഭര്ത്താവിനോടുള്ള തന്റെ സ്നേഹം പരിധികളില്ലാത്തതും പരിശുദ്ധവുമാണ്. അത് മറ്റാരോടെങ്കിലും വിശദീകരിക്കേണ്ട ആവശ്യമുണ്ടെന്ന് തോന്നുന്നില്ലെന്നും നീതി ഫേസ്ബുക്കിലൂടെ പറഞ്ഞു. ഗാര്ഹിക പീഡനം നേരിടുന്നെന്ന് കാണിച്ച് നീതി ദേബ് ദില്ലിയിലെ ഹസാരി കോടതിയില് വിവാഹമോചന ഹര്ജി നല്കിയെന്നായിരുന്നു നേരത്തെ പ്രചരിച്ച വാര്ത്ത.