നാവികസേനയുടെ മിഗ് വിമാനം ഗോവയില്‍ തകര്‍ന്നുവീണു; പൈലറ്റുമാർ രക്ഷപ്പെട്ടു
വിമാനം പറന്നുയർന്ന് കുറച്ച് ദൂരം മുകളിലേക്ക് പിന്നിട്ടപ്പോഴേക്കും എഞ്ചിന് തീപിടിക്കുകയും തകര്‍ന്ന് വീഴുകയുമായിരുന്നുവെന്ന് നാവികസേന വക്താവ് കമാൻഡർ വിവേക് മദ്‍വാൽ അറിയിച്ചു.
പനാജി: ഇന്ത്യന്‍ നാവികസേനയുടെ മിഗ്-29 കെ യുദ്ധ വിമാനം പരിശീലന പറക്കലിനിടെ തകര്‍ന്നുവീണു. ശനിയാഴ്ച ഉച്ചയ്ക്ക് ഗോവയിലെ ദബോലിമിലാണ് മിഗ് വിമാനം തകർന്ന് വീണത്. വിമാനത്തിലുണ്ടായിരുന്ന രണ്ട് പൈലറ്റുമാർ രക്ഷപ്പെട്ടതായി നാവികസേന അറിയിച്ചു.
ദബോലിം വിമാനത്താവളത്തിൽ നിന്നും പറന്നുയരാൻ ശ്രമിക്കുന്നതിനിടെയാണ് അപകടമുണ്ടായത്. വിമാനം പറന്നുയർന്ന് കുറച്ച് ദൂരം മുകളിലേക്ക് പിന്നിട്ടപ്പോഴേക്കും എഞ്ചിന് തീപിടിക്കുകയും തകര്‍ന്ന് വീഴുകയുമായിരുന്നുവെന്ന് നാവികസേന വക്താവ് കമാൻഡർ വിവേക് മദ്‍വാൽ അറിയിച്ചു. പൈലറ്റുമാരായ ക്യാപ്റ്റൻ എം ശോകാന്തും ലെഫ്റ്റനന്റ് കമാൻഡർ ദീപക് യാദവുമാണ് അപകടസമയത്ത് വിമാനത്തിലുണ്ടായിരുന്നത്. ഇവർ സുരക്ഷിതരാണെന്നും വിവേക് മദ്‍വാൽ വ്യക്തമാക്കി.
സുരക്ഷിതമായിടത്താണ് വിമാനം തകർന്ന് വീണത്. അപകടത്തിൽ ആർക്കും പരുക്കില്ലെന്നാണ് റിപ്പോർട്ട്. വിമാനത്തിന്റെ എഞ്ചിനിൽ പക്ഷി ഇടിച്ചതാണ് തീപ്പിടിത്തതിന് കാരണമെന്നും നാവികസേന പറഞ്ഞു.
