ലഡാക്ക് ബിജെപി എംപി സെറിംഗ് നംഗ്യാലിന് കൊവിഡ് സ്ഥിരീകരിച്ചു
പ്രാദേശിക സൈക്ലിംഗ് അസോസിയേഷനുകളും നിരവധി കായികതാരങ്ങളും ഈ പരിപാടിയിൽ പങ്കെടുത്തിരുന്നു.
ലേ: ബിജെപി നേതാവും ലഡാക്കിലെ എംപിയുമായ ജംയാങ് സെറിംഗ് നംഗ്യാലിന് തിങ്കളാഴ്ച കൊവിഡ് ബാധ സ്ഥിരീകരിച്ചു. കേന്ദ്രമന്ത്രി കിരൺ റിജിജുവിന്റെ നേതൃത്വത്തിലുള്ള 25 കിലോമീറ്റർ സൈക്കിൾ റാലി ഉൾപ്പെടെ നിരവധി പ്രവർത്തനങ്ങളിൽ ഇദ്ദേഹം പങ്കെടുത്തിരുന്നു. ലഡാക്കിലെ ബിജെപി അധ്യക്ഷൻ കൂടിയായ സെറിംഗ് ട്വീറ്റിലൂടെയാണ് തനിക്ക് കൊവിഡ് സ്ഥിരീകരിച്ച വിവരം പുറത്തുവിട്ടത്. താനുമായി സമ്പർക്കം പുലർത്തിയ എല്ലാവരോടും പരിശോധനയ്ക്ക് വിധേയരാകാനും സ്വയം നിരീക്ഷണത്തിൽ പോകാനും അദ്ദേഹം നിർദ്ദേശിച്ചു.
കേന്ദ്രമന്ത്രി കിരൺ റിജിജുവിന്റെ നേതൃത്വത്തിൽ നടത്തിയ ഫിറ്റ് ഇന്ത്യ സൈക്ലോത്തോൺ പരിപാടിയിൽ സെറിംഗ് പങ്കെടുത്തിരുന്നു. ഓഗസ്റ്റ് 15 മുതൽ ഒക്ടോബർ 2 വരെയുള്ള ഒന്നരമാസം നീണ്ടുനിൽക്കുന്ന ഫിറ്റ് ഇന്ത്യ ഫ്രീഡം റണ്ണിന്റെ ഭാഗമായിട്ടാണ് സൈക്ലത്തോൺ സംഘടിപ്പിച്ചത്. പ്രാദേശിക സൈക്ലിംഗ് അസോസിയേഷനുകളും നിരവധി കായികതാരങ്ങളും ഈ പരിപാടിയിൽ പങ്കെടുത്തിരുന്നു. ദൈനംദിന ജീവിതത്തിൽ ശാരീരിക പ്രവർത്തനങ്ങളും കായിക വിനോദങ്ങളും ഉൾപ്പെടുത്തി ആരോഗ്യമുള്ളവരായിരിക്കാൻ ആളുകളെ പ്രോത്സാഹിപ്പിക്കാൻ വേണ്ടിയാണ് അദ്ദേഹം ഈ പരിപാടിയിൽ പങ്കെടുത്തത്.
ലഡാക്കിൽ 40 പേരാണ് കൊവിഡ് ബാധിച്ച് മരിച്ചത്. 17 പേർ ലേയിലും 23 പേർ കാർഗിലിലും. 3345 പേരാണ് ഇവിടെ കൊവിഡ് ബാധിതരായിട്ടുള്ളത്. ഇവിടുത്തെ രോഗമുക്തി നിരക്ക് 73 ശതമാനമാണ്. 869 പേരാണ് ഇവിടെ ചികിത്സയിൽ കഴിയുന്നത്.
