യുവാക്കൾ രാത്രി കാറിലെത്തി. വാഹനം പോളിന്റെ വീടിന് മുന്നിൽ നിന്നും ഇടവഴിയിലേക്ക് പാർക്ക് ചെയ്തു. പിന്നീട് 3 യുവാക്കൾ ചേർന്ന് ചെടികൾ ഓരോന്നായി മോഷ്ടിച്ച് കാറിലെത്തിക്കുന്നതും പിന്നീട് വാഹനവുമായി രക്ഷപ്പെടുന്നതും സിസിടിവിയിൽ കാണാം.
തൃശൂർ: എടത്തുരുത്തിയിൽ പ്രവാസിയുടെ വീട്ടിൽ നിന്നും രാത്രി അലങ്കാരച്ചെടികൾ മോഷ്ടിച്ച് യുവാക്കൾ. വലിയ വീട്ടിൽ പോളിന്റെ വീട്ടിൽ നിന്നാണ് കാറിലെത്തിയ മൂന്നംഗ സംഘം ചെടികൾ ചട്ടിയോടെ മോഷ്ടിച്ചത് മോഷണത്തിന്റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്. വെള്ള നിറത്തിലുള്ള ഇന്നോവ കാറിലെത്തിയ യുവാക്കളാണ് മോഷണം നടത്തിയത്. വീടുകളിൽ നിന്നും ചെടിയുടെ കമ്പും തൈകളുമൊക്കെ എടുക്കുന്നവരെ കാണാറുണ്ട്, പക്ഷേ ഇത് വെൽ പ്ലാൻഡ് മോഷണമാണ് നടത്തിയതെന്നാണ് വീട്ടുകാർ പറയുന്നത്.
പോളും കുടുംബവും ഏറെ നാളായി വിദേശത്താണ്. ഇവിടെ ആളില്ലെന്ന് ഉറപ്പിച്ച യുവാക്കൾ രാത്രി കാറിലെത്തി. വാഹനം പോളിന്റെ വീടിന് മുന്നിൽ നിന്നും ഇടവഴിയിലേക്ക് പാർക്ക് ചെയ്തു. പിന്നീട് 3 യുവാക്കൾ ചേർന്ന് ചെടികൾ ഓരോന്നായി മോഷ്ടിച്ച് കാറിലെത്തിക്കുന്നതും പിന്നീട് വാഹനവുമായി രക്ഷപ്പെടുന്നതും സിസിടിവിയിൽ കാണാം. വീടിന്റെ മുന്നിലും മതിലിലും വെച്ചിരുന്ന 40000 രൂപയോളം വിലവരുന്ന ചെടികളാണ് മോഷ്ടിച്ചത്. മാസ്ക് ധരിച്ചെത്തിയ സംഘം നേരത്തെ പ്ലാൻ ചെയ്ത പോലെ വേഗത്തിൽ മോഷണം നടത്തി സ്ഥലം വിടുകയായിരുന്നുവെന്ന് ദൃശ്യങ്ങളിൽ നിന്നും വ്യക്തമാണ്. സിസിടിവി ദൃശ്യങ്ങൾ സഹിതം വീട്ടുടമസ്ഥൻ പോൾ കൈപ്പമംഗലം പൊലീസിൽ പരാതി നൽകിയിട്ടുണ്ട്.
