വീണ്ടും റെക്കോർഡ് തകർത്ത് സ്വർണ നിരക്ക്: അന്താരാഷ്ട്ര വിപണിയിലും വൻ കുതിപ്പ്
ട്രോയ് ഔൺസിന് (31.1 ഗ്രാം) അന്താരാഷ്ട്ര വിപണിയിൽ 1, 810 ഡോളറാണ് നിലവിലെ നിരക്ക്.
തിരുവനന്തപുരം: കേരളത്തിലെ സ്വർണ വിലയിൽ വീണ്ടും റെക്കോർഡ് മുന്നേറ്റം. ഇന്ന് ഗ്രാമിന് 35 രൂപയാണ് കൂടിയത്. പവന് 280 രൂപയും വർധിച്ചു. ഗ്രാമിന് 4,575 രൂപയാണ് ഇന്നത്തെ സ്വർണത്തിന്റെ വിൽപ്പന നിരക്ക്. പവന് 36,600 രൂപയും.
കഴിഞ്ഞ ദിവസം ഗ്രാമിന് 4,540 രൂപയായിരുന്നു നിരക്ക്. പവന് 36,320 രൂപയും. അന്താരാഷ്ട്ര സ്വർണവിലയിലും വൻ വർധനവാണ് റിപ്പോർട്ട് ചെയ്യുന്നത്. ട്രോയ് ഔൺസിന് (31.1 ഗ്രാം) അന്താരാഷ്ട്ര വിപണിയിൽ 1, 810 ഡോളറാണ് നിലവിലെ നിരക്ക്.
കൊവിഡ് -19 ആശങ്കകളെ തുടർന്ന് അന്താരാഷ്ട്ര സ്വർണ നിരക്ക് ഉയരുന്നതാണ് ആഭ്യന്തര വിപണിയിലെ സ്വർണവില ഉയരാനിടയാക്കിയത്. ഇതോടെ ഒരു പവൻ സ്വർണാഭരണം വാങ്ങാൻ ഉപഭോക്താക്കൾ പണിക്കൂലിയും നികുതിയും സെസ്സും അടക്കം 40,000 ത്തിലേറെ രൂപ നൽകേണ്ടി വരും.