പ്രധാനമന്ത്രിയുടെ കൊൽക്കത്തയിലെ മെഗാ റാലി ബിജെപി റദ്ദാക്കി
പ്രധാനമന്ത്രി കൊൽക്കത്തയിലെ ബ്രിഗേഡ് പരേഡ് ഗ്രൗണ്ടിൽ അടുത്ത മാസം നടത്താനിരുന്ന മെഗാ റാലി റദ്ദാക്കി. പശ്ചിമ ബംഗാളിലെ വിവിധ ഇടങ്ങളിലായി മറ്റ് റാലികളില്‍ പങ്കെടുക്കുന്നതിനാലാണ് മെഗാ റാലി റദ്ദാക്കിയതെന്ന് വിശദീകരണം.
കൊല്‍ക്കത്ത: ലോക്സഭാ തെരഞ്ഞെടുപ്പിന് മുന്നോടിയായി പ്രധാനമന്ത്രി നരേന്ദ്രമോദി കൊൽക്കത്തയിലെ ബ്രിഗേഡ് പരേഡ് ഗ്രൗണ്ടിൽ അടുത്ത മാസം നടത്താനിരുന്ന മെഗാ റാലി ബി ജെ പി റദ്ദാക്കി. പശ്ചിമ ബംഗാളിലെ വിവിധ ഇടങ്ങളിലായി ഉടൻ നടക്കുന്ന മൂന്നിലധികം റാലികളിൽ പങ്കെടുക്കുന്നതിനാലാണ് മെഗാ റാലി റദ്ദാക്കിയതെന്നാണ് വിശദീകരണം.
ഫെബ്രുവരി എട്ടിനായിരുന്നു റാലി നടത്താനിരുന്നത്. അതേസമയം, ഇതേ ദിവസം അസൻസോളിൽ സംഘടിപ്പിക്കുന്ന റാലിയിൽ മോദി പങ്കെടുക്കും. എന്നാൽ, ബി ജെ പി നടത്താൻ ലക്ഷ്യമിട്ടിരുന്ന രഥയാത്രയ്‌ക്ക് ഹൈക്കോടതിയും സുപ്രീംകോടതിയും അനുമതി നിഷേധിച്ചിരിക്കുകയാണ്. ബ്രിഗേഡ് പരേഡ് ഗ്രൗണ്ടിൽ പശ്ചിമ ബംഗാള്‍ മുഖ്യമന്ത്രി മമത ബാനർജി ബി ജെ പി വിരുദ്ധ പ്രതിപക്ഷ കക്ഷികളുടെ റാലി സംഘടിപ്പിച്ചതിനു പിന്നാലെയാണ് മോദിയുടെ റാലി റദ്ദാക്കിയതായി ബി ജെ പി അറിയിച്ചത്.
