രാജസ്ഥാനിൽ വിവാഹ ഘോഷയാത്രയിലേക്ക് ട്രക്ക് ഇടിച്ചു കയറി പതിമൂന്ന് മരണം; പതിനെട്ട് പേർക്ക് പരിക്ക്
പതിനെട്ടോളം പേർക്ക് പരിക്കേറ്റു. മരിച്ചവരിൽ നാലുപേർ കുട്ടികളാണ്. റോഡിന്റെ സൈഡിലൂടെ നീങ്ങിക്കൊണ്ടിരുന്ന വിവാഹയാത്രയിലേക്ക് അമിത വേഗത്തിൽ വന്ന ട്രക്ക് പാഞ്ഞുകയറുകയായിരുന്നു
രാജസ്ഥാൻ: രാജസ്ഥാനിലെ പ്രതാപ് നഗറിൽ വിവാഹ ഘോഷയാത്രയിലേക്ക് ട്രക്ക് ഇടിച്ചു കയറി പതിമൂന്ന് പേർ മരിച്ചു. പതിനെട്ടോളം പേർക്ക് പരിക്കേറ്റു. മരിച്ചവരിൽ നാലുപേർ കുട്ടികളാണ്. റോഡിന്റെ സൈഡിലൂടെ നീങ്ങിക്കൊണ്ടിരുന്ന വിവാഹയാത്രയിലേക്ക് അമിത വേഗത്തിൽ വന്ന ട്രക്ക് പാഞ്ഞുകയറുകയായിരുന്നു എന്ന് പൊലീസ് വെളിപ്പെടുത്തി. സംഭവത്തിൽ മുഖ്യമന്ത്രി അശോക് ഗെഹ് ലോട്ട് അനുശോചനം രേഖപ്പെടുത്തി.
മരിച്ചവരുടെ കുടുംബത്തെ അനുശോചനമറിയിക്കുന്നതായും പരിക്കറ്റവർ വേഗത്തിൽ സുഖം പ്രാപിക്കട്ടെ എന്നും മുഖ്യമന്ത്രി അശോക് ഗെഹ് ലോട്ട് ട്വീറ്റ് ചെയ്തു. ഗുരുതരമായി പരിക്കേറ്റ 15 പേരെ സർക്കാർ ആശുപത്രിയിൽ പ്രവേശിപ്പിച്ചിരിക്കുകയാണ്. മരിച്ചവരിൽ ഒൻപത് പേരെ തിരിച്ചറിഞ്ഞിട്ടുണ്ട്. മൃതദേഹങ്ങൾ മോർച്ചറിയിൽ സൂക്ഷിച്ചിരിക്കുകയാണെന്ന് പൊലീസ് അറിയിച്ചു.