കൊറിയ ഓപ്പണ്: പി കശ്യപിന് സെമിയില് തോല്വി
ആദ്യ ഗെയിമില് ഇരുതാരങ്ങളും അക്രമണോത്സുക കളിക്ക് മുതിര്ന്നില്ല. ഇടയ്ക്കിടെ കശ്യപിന്റെ പിഴവുകളില് പോയന്റുകള് നേടിയ മൊമോട്ട ആദ്യ ഗെയിം അനായാസം സ്വന്തമാക്കി.
സോള്: കൊറിയ ഓപ്പണ് സൂപ്പര് 5000 ബാഡ്മിന്റണ് ടൂര്ണമെന്റിലെ ഇന്ത്യന് പ്രതീക്ഷകള് അവസാനിച്ചു. പുരുഷ സിംഗിള്സില് അവസാന പ്രതീക്ഷയായിരുന്ന പി കശ്യപ് സെമിയില് ലോക ഒന്നാം നമ്പര് താരം ജപ്പാന്റെ കെന്റോ മൊമോട്ടയോട് തോറ്റ് പുറത്തായി. സ്കോര് 21-13, 21-15. നേര്ക്കുനേര് പോരാട്ടങ്ങളില് മൊമോട്ടയോട് കശ്യപിന്റെ നാലാം തോല്വിയാണിത്.
ആദ്യ ഗെയിമില് തന്നെ പോയന്റ് നേടി തുടങ്ങിയ മൊമോട്ടയെ ലോക റാങ്കിംഗില് ആറാം സ്ഥാനക്കാരനായ കശ്യപ് 2-2ന് ഒപ്പം പിടിച്ചെങ്കിലും പിന്നീട് മൊമോട്ട തുടര്ച്ചയായി നാലു പോയന്റ് നേടി ആധിപത്യം തിരിച്ചുപിടിച്ചു. ആദ്യ ഗെയിമില് ഇരുതാരങ്ങളും അക്രമണോത്സുക കളിക്ക് മുതിര്ന്നില്ല. ഇടയ്ക്കിടെ കശ്യപിന്റെ പിഴവുകളില് പോയന്റുകള് നേടിയ മൊമോട്ട ആദ്യ ഗെയിം അനായാസം സ്വന്തമാക്കി.
രണ്ടാം ഗെയിമിലും തുടക്കത്തില് 3-9ന് പിന്നിലായി പോയ കശ്യപ് പിന്നീട് തുടര്ച്ചയായി നാലു പോയന്റ് നേടി തിരിച്ചുവരവിന്റെ സൂചനകള് നല്കിയെങ്കിലും മൊമോട്ട തിരിച്ചടിച്ചു. എന്നിട്ടും 12-12ന് ഒപ്പം പിടിച്ച കശ്യപിന് പിന്നീട് ആ മികവ് പുറത്തെടുക്കാനാവാഞ്ഞതോടെ 21-15ന് മൊമൊട്ട ഗെയിമും മത്സരവും സ്വന്തമാക്കി.