റിയാദ്​: മുസ്​ലിംകളെ മാറ്റിനിർത്തുന്ന പൗരത്വ നിയമം മനുഷ്യത്വ വിരുദ്ധമാണെന്ന്​ കവിയും ഗാനരചയിതാവുമായ അനിൽ പനച്ചൂരാൻ​. കുടിയിറക്കലുകളെല്ലാം പ്രശ്​നമാണ്​. നമ്മൾ നിൽക്കുന്ന മണ്ണ്​ നഷ്​ടപ്പെടാൻ ആരാണിഷ്​ടപ്പെടുക. മുസ്​ലിംകൾക്ക്​ ഒന്നും വരില്ല, ഒരു പ്രശ്​നവുമുണ്ടാവില്ല എന്നാണ്​ ബി.ജെ.പിക്കാരും സർക്കാരും പറയുന്നത്​. എന്നാൽ തങ്ങൾ നിൽക്കുന്ന മണ്ണ്​ നഷ്​ടപ്പെടാൻ പോവുകയാണ്​ എന്ന്​ ഒരു കൂട്ടർക്ക്​ തോന്നലുണ്ടാവുകയാണെങ്കിൽ അത്​ പ്രശ്​നം തന്നെയാണ്​.

മണ്ണ്​ നഷ്​ടപ്പെടില്ലായിരിക്കാം. എന്നാൽ അങ്ങനെയൊരു തോന്നലിൽ ഒരു സമൂഹം വേദനിച്ച്​ കഴിയേണ്ടിവരുന്ന സാഹചര്യം ഒട്ടും ഭൂഷണമല്ല. ആ ഭയമാണ്​ ആദ്യം ഇല്ലാതാക്കേണ്ടത്​. മതപരമായ വേർതിരിവ്​ ഒട്ടും ശരിയല്ല. മതം മാത്രമല്ല, രാഷ്​ട്രീയവും പ്രാദേശികവുമായ വേർതിരിവുകളെല്ലാം മനുഷ്യത്വ വിരുദ്ധമാണെന്നും അദ്ദേഹം പറഞ്ഞു​. നവോദയ സാംസ്​കാരിക വേദിയുടെ ‘ദശോത്സവം സീസൺ രണ്ടി’ൽ പങ്കെടുക്കാൻ റിയാദിലെത്തിയ അദ്ദേഹം വാർത്താസമ്മേളനത്തിൽ സംസാരിക്കുകയായിരുന്നു. ഇന്ത്യാക്കാർക്ക്​ പൗരത്വബോധം എന്നൊന്നുണ്ടോ എന്ന്​ ചോദിച്ചുപോകുന്നത്ര വിഭാഗീയമാണ്​ സ്ഥിതി. ഹിന്ദു, മുസ്​ലിം, കൃസ്​ത്യൻ, സിഖ്​ അല്ലെങ്കിൽ മദ്രാസി, ബംഗാളി, മലയാളി, മറാത്തി എന്നിങ്ങനെ സ്വയം വിഭജിക്കപ്പെട്ട്​ കഴിയുകയാണ്​ ഓരോ പൗരനും.

അതിലപ്പുറം താൻ ഇന്ത്യാക്കാരൻ എന്നൊരു ബോധമുണ്ടാവുന്നുണ്ടോ? അങ്ങനെയൊന്നുണ്ടെങ്കിൽ ജാതിയുടെയും മതത്തി​െൻറയും ഭാഷയുടെയും പ്രാദേശികതയുടെയും പേരിൽ അപരന്റെ പൗരത്വത്തെ സംശയിക്കാനോ ചോദ്യം ചെയ്യാനോ മുതിരില്ല. എല്ലാ വിഭാഗീയതകളും ഇല്ലാതാകാൻ എല്ലാവരും ഒരേതരം പൗരനാണെന്ന ബോധം മനസിൽ ഉറച്ചുകിട്ടിയാൽ മതി. കമ്യൂണിസത്തിന്​ ഒന്നും പറ്റിയിട്ടില്ല. പറ്റുകയുമില്ല. അടിസ്ഥാനവർഗങ്ങൾ ഉള്ളി​ടത്തോളം അത്​ നിലനിൽക്കുക തന്നെ ചെയ്യും. കാരണം അത്​ വിമോചന പ്രത്യയശാസ്​ത്രമാണ്​.

സ്വാതന്ത്ര്യാനന്തര ഇന്ത്യയിൽ മുദ്രാവാക്യം നഷ്​ടപ്പെട്ട്​ കോൺഗ്രസ്​ നിൽക്കുമ്പോൾ മുദ്രാവാക്യമുയർത്തി രംഗത്ത്​ വന്നത്​ കമ്യൂണിസമാണ്​. അതുകൊണ്ടാണ്​ പ്രതിപക്ഷത്ത് കമ്യൂണിസ്​റ്റ്​ നേതാവായി എ.ജെ.ജി ഇരുന്നത്​. 70 വർഷത്തിനിപ്പുറം ഇന്ത്യയ്​ക്കുണ്ടായ മാറ്റം എന്താണെന്ന്​ ​ചോദിച്ചാൽ മുദ്രാവാക്യമുള്ളവർ പണ്ട്​ ഇരുന്ന പ്രതിപക്ഷ കസേരയിൽ ഇന്ന്​ മുദ്രാവാക്യമില്ലാത്ത കോൺഗ്രസ്​ ഇരിക്കുന്നു എന്ന്​ ഉത്തരം പറയാം. ​പ്രതിപക്ഷത്തെ കേൾക്കുന്ന ഒരു ഭരണപക്ഷമുണ്ടെങ്കിലേ ജനാധിപത്യം ശരിയായ ദിശയിൽ പോകൂ. അതുകൊണ്ടാണ്​ നെഹ്​റു എ.കെ.ജിയെ ബഹുമാനിച്ചത്​. എന്നാൽ ഇന്ന്​ പ്രതിപക്ഷത്തെ അവഗണിക്കുന്ന ഭരണപക്ഷമാണുള്ളത്​. സ്വേഛാധിപത്യത്തിലേക്കുള്ള ലക്ഷണമാണത്​- അദ്ദേഹം പറഞ്ഞു.