ശ്രീലങ്കയ്ക്കെതിരെ ആദ്യ ടി20 മൽസരത്തിന് ഇറങ്ങുന്ന ഇന്ത്യൻ ടീമിന്റെ താൽക്കാലിക ക്യാപ്റ്റൻ രോഹിത് ശര്‍മ്മയെ കാത്തിരിക്കുന്നത് സുവര്‍ണനേട്ടം. ടി20യിൽ 1500 റണ്‍സ് തികയ്‌ക്കുകയെന്ന നേട്ടത്തിനരികിലാണ് രോഹിത് ശര്‍മ്മ. ഇന്ത്യൻ ക്യാപ്റ്റൻ വിരാട് കോലിയാണ് ഈ നേട്ടം കൈവരിച്ചിട്ടുള്ള മറ്റൊരു താരം. ഇപ്പോള്‍ രോഹിത് ശര്‍മ്മയുടെ പേരിൽ 1485 റണ്‍സാണുള്ളത്. 68 മൽസരങ്ങളിൽനിന്നാണ് രോഹിത് ഇത്രയും റണ‍്സെടുത്തിട്ടുള്ളത്. 30.30 ആണ് രോഹിത് ശര്‍മ്മയുടെ ശരാശരി. രോഹിതിന്റെ ടി20 കരിയറിൽ ഒരു സെഞ്ച്വറിയും 12 അര്‍ദ്ധസെഞ്ച്വറികളുമുണ്ട്. 1956 റണ്‍സാണ് കോലിയുടെ ടി20 സമ്പാദ്യം. ഇതിൽ 18 അര്‍ദ്ധസെഞ്ച്വറികളുണ്ട്. എന്നാൽ ടി20യിൽ കോലിയ്‌ക്ക് ഇതേവരെ മൂന്നക്കം തികയ്‌ക്കാനായിട്ടില്ല. അന്താരാഷ്‌ട്ര ടി20യിൽ 1500 തികയ്‌ക്കാനായാൽ ആ നേട്ടം കൈവരിക്കുന്ന പതിന്നാലാമത്തെ ബാറ്റ്‌സ്‌മാനായി രോഹിത് ശര്‍മ്മ മാറും. ടി20യിൽ ഏറ്റവുമധികം റണ്‍സ് നേടിയിട്ടുള്ളത് ന്യൂസിലാന്‍ഡ് താരം ബ്രണ്ടൻ മക്കല്ലമാണ്. 70 കളികളിൽ 2140 റണ്‍സാണ് മക്കല്ലം നേടിയിട്ടുള്ളത്. 1956 റണ്‍സുമായി രണ്ടാമതുള്ള വിരാട് കോലിയ്ക്ക് അധികംവൈകാതെ മക്കല്ലത്തെ മറികടക്കാനാകുമെന്ന് ഇന്ത്യൻ ആരാധകര്‍ പ്രതീക്ഷിക്കുന്നത്.