വാഹനമേള കാണാൻ ദില്ലിക്ക് പോകാൻ പറ്റുന്നില്ലേ? ഇതാ കണ്ണീരൊപ്പാൻ മാരുതി സുസുക്കി!
രാജ്യത്തെ വാഹനമാമാങ്കത്തെക്കുറിച്ച് ആവേശഭരിതനാണെങ്കിലും നേരിട്ട് പങ്കെടുക്കാൻ നിങ്ങള്‍ക്ക് സാധിക്കുന്നില്ലേ? എങ്കില്‍ ദു:ഖിക്കേണ്ട. നൂതന സാങ്കേതികവിദ്യയിലൂടെ വാഹനപ്രേമികളുടെ കണ്ണീരൊപ്പാൻ ഒരുങ്ങുകയാണ് ജനപ്രിയ വാഹന നിര്‍മ്മാതാക്കളായ മാരുതി സുസുക്കി
ദില്ലി ഓട്ടോ എക്‌സ്‌പോ 2023 കൊടിയേറാൻ ഇനി ദിവസങ്ങള്‍ മാത്രം. രാജ്യത്തെ വാഹനമാമാങ്കത്തെക്കുറിച്ച് ആവേശഭരിതനാണെങ്കിലും നേരിട്ട് പങ്കെടുക്കാൻ നിങ്ങള്‍ക്ക് സാധിക്കുന്നില്ലേ? എങ്കില്‍ ദു:ഖിക്കേണ്ട. നൂതന സാങ്കേതികവിദ്യയിലൂടെ വാഹനപ്രേമികളുടെ കണ്ണീരൊപ്പാൻ ഒരുങ്ങുകയാണ് ജനപ്രിയ വാഹന നിര്‍മ്മാതാക്കളായ മാരുതി സുസുക്കി. എക്സ്‍പോയുടെ ഡിജിറ്റല്‍ കാഴ്‍ച നല്‍കുന്ന മെറ്റാവേഴ്സ് സൌകര്യങ്ങളാണ് മാരുതി സുസുക്കി പവലിയനില്‍ ഒരുങ്ങുന്നതെന്നാണ് പുതിയ റിപ്പോര്‍ട്ടുകള്‍.
ഓട്ടോ എക്‌സ്‌പോ 2023 ലെ തങ്ങളുടെ പവലിയനെ ഡിജിറ്റൽ ലോകത്ത് സജീവമാക്കുമെന്ന് മാരുതി സുസുക്കി സ്ഥിരീകരിച്ചു. താൽപ്പര്യമുള്ള ആർക്കും അവരുടെ സ്വന്തം ലൊക്കേഷനിൽ നിന്ന് ഇതില്‍ ആക്‌സസ് നേടാനാകും. ഇന്ററാക്ടീവ് വെർച്വൽ സോൺ എല്ലാ ഉൽപ്പന്ന ഷോകേസുകളുടെയും വിവിധ എക്സ്പീരിയൻഷ്യൽ സോണുകളുടെയും ആഴത്തിലുള്ള അനുഭവം നൽകുമെന്ന് കമ്പനി പറയുന്നു. എക്സ്പോവേഴ്സ് ലോബി, അഡ്വഞ്ചർ സോൺ, ടെക്‌നോളജി സോൺ, സ്റ്റുഡിയോ സോൺ, ലോഞ്ച് സോൺ, എന്റർടൈൻമെന്റ് സോൺ, സസ്റ്റൈനബിലിറ്റി സോൺ എന്നിവ ഇതിൽ ഉൾപ്പെടുന്നു.
ഉപഭോക്താക്കൾക്ക് എക്സ്പോവേഴ്സ് അനുഭവിക്കാൻ വെർച്വൽ റിയാലിറ്റി ഉപകരണങ്ങളുമായി ഇന്ത്യയിലുടനീളമുള്ള 1,100 നെക്‌സ, അരീന ഡീലർഷിപ്പുകൾ സജ്ജീകരിച്ചിട്ടുണ്ടെന്നും മാരുതി സുസുക്കി പറയുന്നു. ഓട്ടോ എക്‌സ്‌പോ 2023ന്, തങ്ങളുടെ ഡിജിറ്റൽ സംവിധാനം കൂടുതൽ ശക്തമാകുകയാണെന്നും നെക്സാ വേഴ്‍സ്, അരീനാവേഴ്‍സ് എന്നിവയിൽ നിന്നുള്ള മികച്ച പ്രതികരണത്തിന് ശേഷം, എക്സ്പോവേഴ്സ് എന്ന ഒരു മെറ്റാവേഴ്സ് പ്ലാറ്റ്ഫോം അവതരിപ്പിക്കുകയാണെന്നും കമ്പനി വ്യക്തമാക്കുന്നു.
ഇത് എക്‌സ്‌പോയിൽ മാരുതി സുസുക്കിയുടെ ഭാഗമാകാൻ എല്ലാവരെയും പ്രാപ്‍തരാക്കുന്നുവെന്നും മാരുതി സുസുക്കി ഇന്ത്യ ലിമിറ്റഡിന്‍റെ സീനിയർ എക്‌സിക്യുട്ടീവ് ഓഫീസർ ശശാങ്ക് ശ്രീവാസ്‍തവ പറഞ്ഞു. ഭൂമിശാസ്ത്രപരമായ അതിരുകളുടെ നിയന്ത്രണങ്ങളില്ലാതെ, ഓട്ടോ എക്‌സ്‌പോക്ക് സാക്ഷ്യം വഹിക്കാൻ ആഗ്രഹിക്കുന്ന ആളുകൾക്ക് ഈ സംരംഭം പ്രവേശനക്ഷമതയും കണക്റ്റിവിറ്റിയും നൽകും എന്നും അദ്ദേഹം വ്യക്തമാക്കി.
2023 ഓട്ടോ എക്‌സ്‌പോയിൽ കൺസെപ്റ്റ് ഇലക്ട്രിക് എസ്‌യുവി, അഞ്ച് ഡോർ ജിംനി, ഒരു പുതിയ സബ് കോംപാക്റ്റ് എസ്‌യുവി എന്നിവയുൾപ്പെടെ 16 മോഡലുകൾ കാർ നിർമ്മാതാവ് പ്രദർശിപ്പിക്കും . കൂടാതെ, ഗ്രാൻഡ് വിറ്റാര, XL6, സിയാസ്, എർട്ടിഗ, ബ്രെസ്സ, ബലേനോ, സ്വിഫ്റ്റ് തുടങ്ങിയ മോഡലുകളും പ്രദർശിപ്പിക്കും.
