ഈ ജനപ്രിയ സ്‍കൂട്ടറുകള്‍ ഇന്ത്യയില്‍ നിന്നും ഒഴിവാക്കാനൊരുങ്ങി ഹോണ്ട!
ജാപ്പനീസ് ഇരുചക്രവാഹന നിര്‍മ്മാതാക്കളായ ഹോണ്ട മോട്ടോര്‍സൈക്കിള്‍ ആന്‍ഡ് സ്‌കൂട്ടര്‍ ഇന്ത്യയുടെ ചില മോഡലുകള്‍ ഇന്ത്യന്‍ നിരത്തൊഴിഞ്ഞേക്കുമെന്ന് റിപ്പോര്‍ട്ട്.
ജാപ്പനീസ് ഇരുചക്രവാഹന നിര്‍മ്മാതാക്കളായ ഹോണ്ട മോട്ടോര്‍സൈക്കിള്‍ ആന്‍ഡ് സ്‌കൂട്ടര്‍ ഇന്ത്യയുടെ ചില മോഡലുകള്‍ ഇന്ത്യന്‍ നിരത്തൊഴിഞ്ഞേക്കുമെന്ന് റിപ്പോര്‍ട്ട്. ഹോണ്ട ഗ്രാസിയ, ഏവിയേറ്റര്‍ എന്നീ ബൈക്കുകളുടെ വിവരം ഹോണ്ടയുടെ വെബൈസൈറ്റില്‍ നിന്ന് നീക്കം ചെയ്‍തതോടെയാണ് ഈ സംശയം ബലപ്പെട്ടിരിക്കുന്നത്.
ഡിയോ, ആക്ടീവ 6ജി, ആക്ടീവ 125 എന്നീ മൂന്ന് സ്‌കൂട്ടറുകളുടെ വിവരം മാത്രമാണ് ഇപ്പോള്‍ ഹോണ്ടയുടെ വെബ്‌സൈറ്റിലുള്ളത്. 2017-ലാണ് ഗ്രാസിയ ഇന്ത്യയില്‍ എത്തുന്നത്. എന്നാല്‍ ഇന്ത്യന്‍ നിരത്തുകളില്‍ എട്ടു വര്‍ഷത്തോളം പഴക്കമുള്ള മോഡലാണ് ഏവിയേറ്റര്‍.
ഒന്നുകില്‍ ഈ മോഡലുകള്‍ ഉത്പാദനം അവസാനിപ്പിച്ചു, അല്ലെങ്കില്‍ ബിഎസ്6-ലേക്ക് മാറുന്നതിന് മുന്നോടിയായി വെബ്‌സൈറ്റില്‍ നിന്ന് നീക്കം ചെയ്തു. എന്നിങ്ങനെയാണ് ഇക്കാര്യത്തിലെ വിലയിരുത്തലുകള്‍.
2012-ല്‍ ഹോണ്ടയില്‍ നിന്ന് പുറത്തിറങ്ങിയ സ്കൂട്ടറാണ് ഏവിയേറ്റര്‍. 109 സിസി സിംഗിള്‍ സിലിണ്ടര്‍ എന്‍ജിന്‍ കരുത്തേകുന്ന ഈ സ്‌കൂട്ടര്‍ 8 ബിഎച്ച്പി പവറും 8.94 എന്‍എം ടോര്‍ക്കുമാണ് ഉത്പാദിപ്പിക്കുന്നത്. സിവിടി ട്രാന്‍സ്മിഷനിലുള്ള ഈ സ്‌കൂട്ടറിന്റെ പരമാവധി വേഗത മണിക്കൂറില്‍ 82 കിലോമീറ്ററാണ്.
ആക്ടീവക്ക് മുകളിലുള്ള ഹോണ്ടയുടെ ഫ്ലാഗ്ഷിപ്പ് സ്കൂട്ടറാണ് ഗ്രാസിയ. നഗരങ്ങളിലെ യുവത്വത്തെ ലക്ഷ്യംവെച്ചാണ് ഹോണ്ട ഗ്രാസിയയെ നിരത്തിലെത്തിച്ചിരിക്കുന്നത്. അഗ്രസീവ് ഡിസൈനാണ് ഗ്രാസിയയുടെ മുഖമുദ്ര. ആക്ടീവ 125-ല്‍ നല്‍കിയിരുന്ന ബിഎസ്-4 നിലവാരത്തിലുള്ള 124.9 സിസി എയര്‍-കൂള്‍ഡ് എന്‍ജിനാണ് ഗ്രാസിയയ്ക്ക് കരുത്തേകുന്നത്. ഇത് 8.52 ബിഎച്ച്പി പവറും 10.54 എന്‍എം ടോര്‍ക്കുമാണ് ഉത്പാദിപ്പിക്കുന്നത്. കൂടുതല്‍ ഇന്ധനക്ഷമത ഉറപ്പാക്കുന്നതിനും എന്‍ജിന്‍ ഫ്രിക്ഷന്‍ കുറയ്ക്കുന്നതിനും ഹോണ്ട ഇക്കോ ടെക്‌നോളജിയും ഇതിലുണ്ടായിരുന്നു.
അതേസമയം ഗ്രാസിയ ബിഎസ്-6 എന്‍ജിനില്‍ ഉടന്‍ മടങ്ങിയെത്തുമെന്നും ഏവിയേറ്ററിന്റെ മടങ്ങിവരവ് അനിശ്ചിതത്വത്തിലാണെന്നും റിപ്പോര്‍ട്ടുകളുണ്ട്.
