ഐക്കണിക്ക് ജര്‍മ്മന്‍ വാഹന നിര്‍മ്മാതാക്കളായ പോര്‍ഷ പുത്തന്‍ 718 സ്‍പൈഡര്‍, കേമാന്‍ GT4 എന്നിവ ഇന്ത്യന്‍ വിപണിയില്‍ അവതരിപ്പിച്ചു. യഥാക്രമം 1.59 കോടി രൂപ, 1.63 കോടി രൂപ എന്നിങ്ങനെയാണ് ഈ വാഹനങ്ങളുടെ എക്‌സ്-ഷോറൂം വില.

414 bhp കരുത്തും 420 Nm ടോര്‍ക്കും ഉല്‍പ്പാദിപ്പിക്കുന്ന 4.0 ലിറ്റര്‍ ആറ് സിലിണ്ടര്‍ പെട്രോള്‍ എഞ്ചിനാണ് ഇരു കാറുകളുടെയും ഹൃദയം. ആറ് സ്പീഡ് മാനുവല്‍ ഗിയര്‍ബോക്‌സാണ് ട്രാന്‍സ്‍മിഷന്‍.

കേമാന്‍ GT4 -ന് മണിക്കൂറില്‍ 304 കിലോമീറ്റര്‍ പരമാവധി വേഗതയും സ്‌പൈഡറിന് 301 കിലോമീറ്റര്‍ പരമാവധി വേഗതയും കൈവരിക്കാന്‍ കഴിയും. ഇരു മോഡലുകള്‍ക്കും 4.4 സെക്കന്‍ഡിനുള്ളില്‍ 0-100 കിലോമീറ്റര്‍ വേഗതയില്‍ എത്താന്‍ സാധിക്കും.

718 സ്പൈഡറിലെയും 718 കേമാന്‍ GT4 ലെയും ഉയര്‍ന്ന പ്രകടനമുള്ള ബ്രേക്ക് സിസ്റ്റവും വലിയ അലുമിനിയം മോണോബ്ലോക്ക് ഫിക്സഡ്-ക്ലാലിപ്പര്‍ ബ്രേക്കുകളും ട്രാക്ക് ഡ്രൈവിംഗിന് അനുയോജ്യമായ സ്ഥിരമായ ബ്രേക്കിംഗ് നല്‍കുന്നു. പോര്‍ഷ സെറാമിക് കോമ്പോസിറ്റ് ബ്രേക്ക് (PCCB) ഒരു ഓപ്ഷനായി ലഭ്യമാണ്.

മുന്‍ഗാമികളെ അനുസ്‍മരിപ്പിക്കുന്ന തരം ഭാരം കുറഞ്ഞ കണ്‍വേര്‍ട്ടിബിള്‍ ടോപ്പ് കൊണ്ട് വേര്‍തിരിച്ചിരിക്കുന്നതാണ്  പുതിയ 718 സ്‍പൈഡര്‍. 

GT4 -ല്‍ നിന്ന് വ്യത്യസ്തമായി, 718 സ്‌പൈഡറിന് ഒരു റിയര്‍ സ്പോയിലര്‍ ഉണ്ട്. ഇത് മണിക്കൂറില്‍ 120 കിലോമീറ്റര്‍ വേഗതയില്‍ എത്തുമ്പോള്‍ താനെ ഉയരുന്നു, കൂടാതെ ഫംഗ്ഷണല്‍ ഡിഫ്യൂസറും വാഹനത്തിന് ലഭിക്കുന്നു.