നിര്‍മ്മിച്ചത് ഒരുദശലക്ഷം യൂണിറ്റ്; നാഴികക്കല്ല് പിന്നിട്ട് ഗുജറാത്ത് സുസുക്കി
സുസുക്കി മോട്ടോർ കോർപ്പറേഷന്റെ അനുബന്ധ സ്ഥാപനമായ സുസുക്കി മോട്ടോർ ഗുജറാത്ത് പ്രൈവറ്റ് ലിമിറ്റഡ് (SMG) ഒരു മില്ല്യൺ യൂണിറ്റ് പ്രൊഡക്ഷൻ എന്ന നാഴികക്കല്ല് പിന്നിട്ടു
സുസുക്കി മോട്ടോർ കോർപ്പറേഷന്റെ അനുബന്ധ സ്ഥാപനമായ സുസുക്കി മോട്ടോർ ഗുജറാത്ത് പ്രൈവറ്റ് ലിമിറ്റഡ് (SMG) ഒരു മില്ല്യൺ യൂണിറ്റ് പ്രൊഡക്ഷൻ എന്ന നാഴികക്കല്ല് പിന്നിട്ടെന്ന ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. 2020 ഒക്ടോബർ 21 -നാണ് ഈ നേട്ടം കൈവരിച്ചത്. ബലേനോ ഹാച്ച്ബാക്കാണ് ഒരു മില്ല്യൺ യൂണിറ്റ് എന്ന ഈ നേട്ടം കൈവരിക്കുന്നതിനുള്ള മോഡലായി മാറിയത്.
മൂന്ന് വർഷവും ഒമ്പത് മാസവും കൊണ്ടാണ് ഈ നേട്ടം SMG കൈവരിക്കുന്നക്കുന്നതെന്നാണ് റിപ്പോർട്ട്. 2017 ഫെബ്രുവരിയിലാണ് ഈ ഉല്‍പ്പാദനശാല പ്രവർത്തനം ആരംഭിച്ചത്. 2017 ഫെബ്രുവരിയിൽ മാരുതി സുസുക്കി ബലേനോയുടെ നിർമ്മാണം തുടങ്ങി. അതിനുശേഷം 2018 ജനുവരിയിൽ സ്വിഫ്റ്റ് ഹാച്ച്ബാക്കിന്റെ ഉത്പാദനവും ആരംഭിച്ചു.
കയറ്റുമതിയും ഉൽ‌പാദനവും വർധിച്ചുവരുന്ന വാഹനങ്ങളുടെ ആവശ്യകത കണക്കിലെടുത്ത് 2019 ജനുവരിയിൽ, B-പ്ലാന്റ് എന്നറിയപ്പെടുന്ന രണ്ടാമത്തെ ഉൽ‌പാദന സൈറ്റും പവർട്രെയിൻ പ്ലാന്റും പ്രവർത്തനം ആരംഭിച്ചു. ഏകദേശം 1.44 ദശലക്ഷം യൂണിറ്റുകൾ 2019 സാമ്പത്തിക വർഷത്തിൽ സുസുക്കി വിറ്റു. വാർഷികാടിസ്ഥാനത്തിൽ വിൽപ്പനയിൽ 82 ശതമാനം വർധനയാണ് കമ്പനി കൈവരിച്ചത് എന്നാണ് റിപ്പോര്‍ട്ടുകള്‍.
