ജനപ്രിയ ബൈക്ക് മോഡലായ R15 ന്റെ വില കൂട്ടി ജാപ്പനീസ് വാഹന നിര്‍മ്മാതാക്കളായ യമഹ. ഏകദേശം 2600 രൂപയോളമാണ് കൂട്ടിയത് എന്നാണ് റിപ്പോര്‍ട്ടുകള്‍. ബൈക്കിന്റെ ബിഎസ്6 പതിപ്പ് വിപണിയില്‍ എത്തിച്ച ശേഷം രണ്ടാമത്തെ വില വര്‍ദ്ധനവാണിത്.  മെയിൽ ആർ15-ന്റെ വില 1000 രൂപ വരെ ഇന്ത്യ യമഹ മോട്ടോർ വർദ്ധിപ്പിച്ചിരുന്നു.

പുതിയ വര്‍ദ്ധനവോടെ 1,45,300 രൂപ വിലയുണ്ടായിരുന്ന തണ്ടർ ഗ്രേ നിറത്തിന് 2600 രൂപ കൂടി ഇപ്പോൾ 1,47,900 രൂപയാണ് എക്‌സ്-ഷോറൂം വില. 1,47,900 രൂപ വിലയുണ്ടായിരുന്ന ഡാർക്ക് നൈറ്റ് നിറത്തിന്റെ വില 2100 രൂപ കൂടി ഇപ്പോൾ 1,50,000 രൂപയാണ്. 1,46,900 രൂപ വിലയുണ്ടായിരുന്ന റേസിംഗ് ബ്ലൂ നിറത്തിന്റെ വിലയും 2100 രൂപ കൂടി ഇപ്പോൾ 1,49,000 രൂപയാണ് എക്‌സ്-ഷോറൂം വില.

2019 ഡിസംബറിലാണ് ബൈക്കിന്‍റെ ബിഎസ്6 പതിപ്പിനെ കമ്പനി വിപണിയില്‍ എത്തിക്കുന്നത്. ബിഎസ് 4 മോഡലുമായി താരതമ്യം ചെയ്യുമ്പോള്‍ 4,000 രൂപ മുതൽ 5,000 രൂപ വരെ വില കൂട്ടിയായിരുന്നു ബിഎസ്6 എത്തിയതു തന്നെ.  ബിഎസ് 6 എന്‍ജിന്‍ നല്‍കിയതോടെ ബൈക്കിന്‍റെ കരുത്തും ടോര്‍ക്കും അല്‍പ്പം കുറഞ്ഞിരുന്നു. 155 സിസി, സിംഗിള്‍ സിലിണ്ടര്‍, ലിക്വിഡ് കൂള്‍ഡ് എന്‍ജിന്‍ 10,000 ആര്‍പിഎമ്മില്‍ 18.6 എച്ച്പി കരുത്തും 8,500 ആര്‍പിഎമ്മില്‍ 14.1 എന്‍എം ടോര്‍ക്കും ഉല്‍പ്പാദിപ്പിക്കും. നിലവിലെ ബിഎസ് 4 പതിപ്പില്‍ ഇതേ റെവ് റേഞ്ചില്‍ 19.3 എച്ച്പി കരുത്തും 14.7 എന്‍എം ടോര്‍ക്കുമാണ് ഉല്‍പ്പാദിപ്പിച്ചിരുന്നത്. 6 സ്പീഡ് ട്രാന്‍സ്മിഷന്‍ തന്നെയാണ് തുടര്‍ന്നും. 

നിരവധി പുതിയ അപ്ഡേറ്റുകളും ഇന്ത്യ യമഹ മോട്ടോർ (IYM) YZF-R15 വേർഷൻ 3.0-ന് നൽകിയിട്ടുണ്ട്. സൈഡ്-സ്റ്റാൻഡ് ഇൻഹിബിറ്റർ ആണ് ഇതിൽ പ്രധാനം. സൈഡ് സ്റ്റാൻഡ് ഇട്ടിരിക്കുന്ന സമയത് ഇഗ്നിഷൻ ഓൺ ആവാതെ ക്രമീകരിക്കുന്ന സുരക്ഷാ സംവിധാനമാണിത്. ഇരട്ട ഹോൺ, പുറകിൽ റേഡിയൽ ട്യൂബ്-ലെസ്സ് ടയർ എന്നിവയാണ് മറ്റുള്ള പുതിയ കൂട്ടിച്ചേർക്കലുകൾ.

കൂടാതെ റേസിംഗ് ബ്ലൂ നിറത്തിലുള്ള 2020 YZF-R15 വേർഷൻ 3.0-ന്റെ അലോയ് വീലുകളും പൂർണമായും നീല നിറത്തിലാണ്. ഇതുവരെ വില്പനയിലുണ്ടായിരുന്ന റേസിംഗ് ബ്ലൂ കളർ മോഡലിന് കറുപ്പ് നിറത്തിലുള്ള അലോയ് വീലിൽ നീല നിറത്തിലുള്ള പിൻ സ്ട്രിപ്പിങ് മാത്രമായിരുന്നു.

ഡെൽറ്റബോക്‌സ് ഫ്രെയിം അടിസ്ഥാനമാക്കി നിർമിച്ചിരിക്കുന്ന YZF-R15 വേർഷൻ 3.0-യുടെ മുന്നില്‍ ടെലിസ്കോപിക് ഫോർക്കും പുറകിൽ ലിങ്കുമാണ് സസ്‌പെഷന്‍. 282 എംഎം ഡിസ്ക് മുന്നിലും 220 എംഎം ഡിസ്‍ക് പിന്നിലും ബ്രെക്കിങ്ങിനായി സജ്ജീകരിച്ചിരിക്കുന്നു. 142 കിലോഗ്രാം ആണ് YZF-R15 വേർഷൻ 3.0-യുടെ ഭാരം. ബിഎസ് 4 വേര്‍ഷനേക്കാള്‍ ഭാരം 3 കിലോയോളം കൂടുതലാണ്. ഇന്തോനേഷ്യയിലും മറ്റ് ഏഷ്യന്‍ വിപണികളിലും വില്‍ക്കുന്നതുപോലെ നീല നിറത്തിലുള്ള ചക്രങ്ങളിലാണ് റേസിംഗ് ബ്ലൂ വേരിയന്റ് വരുന്നത്.