ദീപാവലി, ധന്തേരസ് കാലയളവിൽ കാറുകൾക്കും ബൈക്കുകൾക്കും നിരവധി ഓഫറുകൾ പ്രഖ്യാപിക്കാറുണ്ട്. എന്നാൽ ഇത്തരം ഓഫറുകളുടെ പേരിൽ അനാവശ്യ ചെലവുകൾ ഒഴിവാക്കാൻ വാഹനം വാങ്ങുന്നതിന് മുമ്പ് ശ്രദ്ധിക്കേണ്ട 6 സുപ്രധാന കാര്യങ്ങളെക്കുറിച്ചാണ് ഈ ലേഖനം.
ദീപാവലി, ധന്തേരസ് കാലയളവിൽ പുതിയ കാർ വാങ്ങുന്നത് പലർക്കും ഏറെ പ്രത്യേകതയുള്ള കാര്യമാണ്. ഉത്സവകാലത്ത് ഉപഭോക്താക്കളെ ആകർഷിക്കുന്നതിനായി വാഹന നിർമാതാക്കളും ഡീലർമാരും ആകർഷകമായ ഓഫറുകളാണ് പ്രഖ്യാപിക്കാറുള്ളത്. ആയിരക്കണക്കിന് രൂപയുടെ വിലക്കിഴിവുകൾ, എക്സ്ചേഞ്ച് ബോണസുകൾ, കോർപ്പറേറ്റ് ഡിസ്‍കൌണ്ടുകൾ, സൗജന്യ ആക്‌സസറികൾ തുടങ്ങി നിരവധി ആനുകൂല്യങ്ങൾ ഇവയിൽ ഉൾപ്പെടും. എന്നാൽ, പരസ്യങ്ങളിൽ കാണുന്ന ഓഫറുകൾക്ക് ചില നിബന്ധനകളും വ്യവസ്ഥകളും ബാധകമായിരിക്കാം. അതിനാൽ, ദീപാവലി കാലത്ത് കാറോ ബൈക്കോ വാങ്ങാൻ പദ്ധതിയിടുന്നവർ ഷോറൂമിലെത്തുന്നതിന് മുമ്പ് ചില കാര്യങ്ങൾ ശ്രദ്ധിക്കണം. അല്ലാത്തപക്ഷം ആകർഷകമെന്ന് തോന്നുന്ന ഓഫറുകൾ അധിക ചെലവിന് കാരണമായേക്കാം.
1. കിഴിവ് കണ്ട് പഴയ സ്റ്റോക്ക് വാങ്ങരുത്
ഉത്സവകാലത്ത് പഴയ സ്റ്റോക്കുകൾ വിറ്റഴിക്കുന്നതിനായി ഡീലർമാർ വലിയ വിലക്കിഴിവുകൾ നൽകാറുണ്ട്. കഴിഞ്ഞ വർഷം നിർമിച്ച വാഹനങ്ങൾക്കും ആകർഷകമായ ഓഫറുകൾ ലഭിച്ചേക്കാം. അതിനാൽ വാഹനം ബുക്ക് ചെയ്യുന്നതിന് മുമ്പ് അതിന്റെ നിർമാണ മാസവും വർഷവും പരിശോധിക്കണം. വലിയ കിഴിവ് ലഭിക്കുന്നുവെന്ന കാരണത്താൽ മാത്രം പഴയ സ്റ്റോക്കിലുള്ള വാഹനം തിരഞ്ഞെടുക്കരുത്. പഴയതും പുതിയതുമായ സ്റ്റോക്കുകളുടെ വിലയും ഓഫറുകളും താരതമ്യം ചെയ്തശേഷം തീരുമാനമെടുക്കുന്നതാണ് ഉചിതം.
2. സൗജന്യ ആക്‌സസറികളുടെ പേരിൽ അധിക പണം നൽകേണ്ട
സീറ്റ് കവറുകൾ, ഫ്ലോർ മാറ്റുകൾ, ബോഡി കവറുകൾ, മഡ് ഫ്ലാപ്പുകൾ തുടങ്ങിയവ സൗജന്യമായി നൽകുമെന്ന് ചില ഷോറൂമുകൾ വാഗ്ദാനം ചെയ്യാറുണ്ട്. എന്നാൽ ചില സാഹചര്യങ്ങളിൽ ഇവയുടെ വില അധിക ചാർജായി ബില്ലിൽ ഉൾപ്പെടുത്തിയേക്കാം. അതിനാൽ ഏതൊക്കെ ആക്‌സസറികളാണ് സൗജന്യമായി ലഭിക്കുന്നതെന്ന് മുൻകൂട്ടി ചോദിച്ച് ഉറപ്പാക്കണം. ആവശ്യമില്ലാത്ത ആക്‌സസറികൾ ബില്ലിൽ ഉൾപ്പെടുത്തിയിട്ടുണ്ടെങ്കിൽ അവ ഒഴിവാക്കാനും ആവശ്യപ്പെടാം.
Related Articles
3. ഇൻഷുറൻസ് തിരഞ്ഞെടുക്കുന്നതിന് മുമ്പ് താരതമ്യം ചെയ്യുക
കാർ വാങ്ങുന്ന അതേ ഡീലർഷിപ്പിൽനിന്ന് ഇൻഷുറൻസ് എടുക്കണമെന്ന നിർബന്ധമില്ല. വിവിധ ഇൻഷുറൻസ് കമ്പനികളുടെ പ്രീമിയത്തിലും പോളിസി ആനുകൂല്യങ്ങളിലും വ്യത്യാസമുണ്ടാകാം. അതിനാൽ ഒന്നിലധികം കമ്പനികളുടെ നിരക്കുകൾ പരിശോധിച്ചശേഷം അനുയോജ്യമായ പോളിസി തിരഞ്ഞെടുക്കുക. ഇൻഷുറൻസ് എടുക്കുമ്പോൾ ഇൻഷ്വേർഡ് ഡിക്ലയേർഡ് വാല്യു (ഐഡിവി), സീറോ ഡിപ്രീസിയേഷൻ, അധിക പരിരക്ഷകൾ തുടങ്ങിയ കാര്യങ്ങളും ശ്രദ്ധിക്കണം. കുറഞ്ഞ പ്രീമിയം മാത്രം നോക്കി പോളിസി തിരഞ്ഞെടുക്കുന്നത് ഒഴിവാക്കുക.
4. എക്സ്ചേഞ്ച് ബോണസിനായി പഴയ വാഹനത്തിന്റെ വില കുറയ്ക്കരുത്
പഴയ വാഹനം കൈമാറുമ്പോൾ ലഭിക്കുന്ന എക്സ്ചേഞ്ച് ബോണസ് എല്ലാവർക്കും ഒരുപോലെ ലഭിക്കണമെന്നില്ല. വാഹനത്തിന്റെ പഴക്കം, ആവശ്യമായ രേഖകൾ തുടങ്ങിയവയെ അടിസ്ഥാനമാക്കി നിബന്ധനകൾ മാറാം. എക്സ്ചേഞ്ച് ബോണസ് ലഭിക്കുമെന്ന കാരണത്താൽ മാത്രം പഴയ വാഹനം കുറഞ്ഞ വിലയ്ക്ക് കൈമാറരുത്. ഡീലർഷിപ്പിലെ വിലയിരുത്തലിന് പുറമെ മറ്റ് ഇടങ്ങളിലും വാഹനത്തിന്റെ വിപണിമൂല്യം പരിശോധിക്കുക. ഇതിലൂടെ പഴയ വാഹനത്തിന് ന്യായമായ വില ലഭിക്കുന്നുണ്ടെന്ന് ഉറപ്പാക്കാം.
5. വാഹനം കൈപ്പറ്റുംമുമ്പ് പരിശോധന നടത്തുക
ഉത്സവകാലത്തെ തിരക്കിൽ വാഹനത്തിന്റെ ഡെലിവറി വേഗത്തിലാക്കുന്നതിനിടെ ചിലർ പരിശോധന ഒഴിവാക്കാറുണ്ട്. എന്നാൽ വാഹനം കൈപ്പറ്റുന്നതിന് മുമ്പ് പ്രീ-ഡെലിവറി ഇൻസ്പെക്ഷൻ (പിഡിഐ) നടത്തേണ്ടത് പ്രധാനമാണ്. വാഹനത്തിന്റെ ബോഡി, പെയിന്റ്, ടയറുകൾ, ലൈറ്റുകൾ, എൻജിൻ, ഓഡോമീറ്റർ എന്നിവ പരിശോധിക്കണം. കൂടാതെ വാഹനത്തിലെ ഷാസി നമ്പറും എൻജിൻ നമ്പറും ബന്ധപ്പെട്ട രേഖകളിലുള്ള വിവരങ്ങളുമായി ഒത്തുനോക്കുകയും വേണം. എന്തെങ്കിലും തകരാറുകളോ വ്യത്യാസങ്ങളോ ശ്രദ്ധയിൽപ്പെട്ടാൽ ഡെലിവറി സ്വീകരിക്കുന്നതിന് മുമ്പ് ഡീലറെ അറിയിക്കുക.
6. ഇഎംഐയും ബുക്കിങ് നിബന്ധനകളും മനസ്സിലാക്കുക
കുറഞ്ഞ ഡൗൺ പേയ്‌മെന്റോ ചെറിയ പ്രതിമാസ ഇഎംഐയോ കാണുമ്പോൾ മാത്രം വാഹനവായ്പ എടുക്കാൻ തീരുമാനിക്കരുത്. കുറഞ്ഞ ഇഎംഐ വാഗ്ദാനം ചെയ്യുന്നതിനായി വായ്പയുടെ കാലാവധി നീട്ടിയിരിക്കാം. ഇത് കാലക്രമേണ അടയ്‌ക്കേണ്ട മൊത്തം പലിശ വർധിപ്പിക്കാനും ഇടയാക്കും.
വായ്പ എടുക്കുന്നതിന് മുമ്പ് പലിശനിരക്ക്, പ്രോസസിങ് ഫീസ്, വായ്പയുടെ കാലാവധി, തിരിച്ചടയ്‌ക്കേണ്ട മൊത്തം തുക എന്നിവ വ്യക്തമായി മനസ്സിലാക്കണം. അതുപോലെ ബുക്കിങ് തുക അടയ്ക്കുന്നതിന് മുമ്പ് ബുക്കിങ് റദ്ദാക്കുന്നതിനും പണം തിരികെ ലഭിക്കുന്നതിനുമുള്ള നിബന്ധനകൾ രേഖാമൂലം വാങ്ങി സൂക്ഷിക്കണം.
ഉത്സവകാല ഓഫറുകൾ പ്രയോജനപ്പെടുത്താം; എന്നാൽ എല്ലാ നിബന്ധനകളും പരിശോധിച്ചശേഷം മാത്രം പണം ചെലവഴിക്കുക. വിലക്കിഴിവിനൊപ്പം വാഹനത്തിന്റെ നിർമാണവിവരങ്ങൾ, ഇൻഷുറൻസ്, വായ്പാ വ്യവസ്ഥകൾ, ഡെലിവറിക്ക് മുമ്പുള്ള പരിശോധന എന്നിവയ്ക്കും തുല്യപ്രാധാന്യം നൽകുന്നത് അനാവശ്യ ചെലവുകൾ ഒഴിവാക്കാൻ സഹായിക്കും.
