ജെഎസ്ഡബ്ല്യു മോട്ടോഴ്സ് ചെറി ഓട്ടോമൊബൈലുമായി സഹകരിച്ച് ഇന്ത്യൻ വിപണിയിൽ എത്തുന്നു. 2026-ൽ ജെറ്റൂർ ടി2 പ്ലഗ്-ഇൻ ഹൈബ്രിഡ് എസ്യുവി ആദ്യ വാഹനമായി അവതരിപ്പിക്കും. 125 കിമീ വരെ മൈലേജ് വാഗ്ദാനം ചെയ്യുന്ന ഈ മോഡലിനൊപ്പം മറ്റ് ഹൈബ്രിഡ്, ഇലക്ട്രിക് വാഹനങ്ങളും കമ്പനി പുറത്തിറക്കും.
ഇന്ത്യൻ വാഹന വിപണിയിലേക്ക് സ്വതന്ത്ര ബ്രാൻഡായി ജെഎസ്ഡബ്ല്യു മോട്ടോഴ്സ് എത്തുന്നു. 2026ലെ ദീപാവലി ഉത്സവകാലത്തോടെ പുതിയ വാഹനങ്ങൾ വിപണിയിലെത്തിക്കാനാണ് കമ്പനിയുടെ പദ്ധതി. ചെറി ഓട്ടോമൊബൈലുമായി സഹകരിച്ചാണ് ജെഎസ്ഡബ്ല്യു പുതിയ എനർജി വാഹനങ്ങൾ അവതരിപ്പിക്കുക. ചെറി ഓട്ടോമൊബൈൽ വാഹനങ്ങളുടെ സാങ്കേതികവിദ്യയും ഉൽപ്പന്ന അടിത്തറയും ജെഎസ്ഡബ്ല്യുവിന് നൽകും. ഇന്ത്യയിലെ ജെഎസ്ഡബ്ല്യുവിന്റെ ആദ്യ പാസഞ്ചർ വാഹനമായി ജെഎസ്ഡബ്ല്യു ബാഡ്ജോടുകൂടിയ ജെറ്റൂർ ടി2 പ്ലഗ്-ഇൻ ഹൈബ്രിഡ് എസ്യുവി എത്തും. മഹാരാഷ്ട്രയിലെ കമ്പനിയുടെ പുതിയ നിർമാണശാലയിൽ പ്രാദേശികമായി വാഹനം അസംബിൾ ചെയ്യും.
1.5 ലിറ്റർ ടർബോ പെട്രോൾ എൻജിൻ
ജെറ്റൂർ ടി2 ഐ-ഡിഎം പ്ലഗ്-ഇൻ ഹൈബ്രിഡിൽ 1.5 ലിറ്റർ ടർബോ പെട്രോൾ എൻജിനൊപ്പം 2 ഇലക്ട്രിക് മോട്ടോറുകളും 26.7 കിലോവാട്ട് ബാറ്ററി പാക്കും നൽകും. ഈ സംവിധാനത്തിന് 381 ബിഎച്ച്പി സംയുക്ത കരുത്തും 610 എൻഎം ടോർക്കും ഉൽപ്പാദിപ്പിക്കാൻ കഴിയും. 3 സ്പീഡ് 3ഡിഎച്ച്ടി ഗിയർബോക്സാണ് വാഹനത്തിൽ ഉപയോഗിക്കുന്നത്. ഒറ്റ ചാർജിൽ 139 കിലോമീറ്റർ വരെ എൻഇഡിസി ഇലക്ട്രിക് റേഞ്ച് ലഭിക്കുമെന്നും കമ്പനി അവകാശപ്പെടുന്നു. 0 മുതൽ 100 കിമീ വേഗത കൈവരിക്കാൻ 7.5 സെക്കൻഡ് മാത്രം മതിയാകും.
1 ലിറ്ററിൽ 125 കിമീ മൈലേജ് ശരിക്കും ലഭിക്കുമോ?
ജെറ്റൂർ ടി2 പ്ലഗ്-ഇൻ ഹൈബ്രിഡിന്റെ ഏറ്റവും ശ്രദ്ധേയമായ സവിശേഷത ഇന്ധനക്ഷമതയാണ്. ആഗോള വിപണിയിലെ മോഡലിന് 100 കിലോമീറ്ററിന് 0.8 ലിറ്റർ ഇന്ധനം മാത്രമാണ് എൻഇഡിസി സംയോജിത പരിശോധനയിൽ ആവശ്യമായി വരുന്നതെന്നാണ് അവകാശവാദം. ഇത് 1 ലിറ്റർ ഇന്ധനത്തിൽ 125 കിലോമീറ്റർ സഞ്ചരിക്കുമെന്ന കണക്കിന് തുല്യമാണ്. എന്നാൽ സാധാരണ റോഡ് സാഹചര്യങ്ങളിൽ എസ്യുവിക്ക് 1 ലിറ്ററിൽ 125 കിലോമീറ്റർ സഞ്ചരിക്കാൻ കഴിയുമെന്ന് ഇതിനർഥമില്ല. ബാറ്ററിയിലെ വൈദ്യുതി പൂർണമായി തീർന്നാൽ ജെറ്റൂർ ടി2 ഐ-ഡിഎം 100 കിലോമീറ്ററിന് 5.4 ലിറ്റർ ഇന്ധനം ഉപയോഗിക്കും. അതായത് ഏകദേശം 18.5 കിമീ മൈലേജാണ് ലഭിക്കുക.
Related Articles
50 ലക്ഷം രൂപ വരെ വിലയുള്ള വാഹനങ്ങൾ
ജെഎസ്ഡബ്ല്യു മോട്ടോഴ്സ് പ്ലഗ്-ഇൻ ഹൈബ്രിഡിന് പുറമെ സ്ട്രോങ് ഹൈബ്രിഡ്, റേഞ്ച് എക്സ്റ്റൻഡർ ഇലക്ട്രിക്, ബാറ്ററി ഇലക്ട്രിക് വാഹനങ്ങളും ഇന്ത്യയിൽ അവതരിപ്പിക്കും. 10 ലക്ഷം രൂപ മുതൽ 50 ലക്ഷം രൂപ വരെയായിരിക്കും വാഹനങ്ങളുടെ എക്സ്-ഷോറൂം വില പ്രതീക്ഷിക്കുന്നത്. വില കുറഞ്ഞ ലൈഫ്സ്റ്റൈൽ ഇലക്ട്രിക് എസ്യുവി വിഭാഗത്തെ ലക്ഷ്യമിടുന്ന ഐകാർ വി23 ഇവിയും ജെഎസ്ഡബ്ല്യുവിന്റെ നിരയിൽ എത്തിയേക്കും. ജെയ്കൂ ജെ5 ഇലക്ട്രിക് എസ്യുവിയും ഇന്ത്യയിലെത്തും. ഹ്യുണ്ടായി ക്രെറ്റ ഇലക്ട്രിക്, മാരുതി ഇവിറ്റാര, ടൊയോട്ട ഇബെല്ല, എംജി ഇസഡ്എസ് ഇവി, ടാറ്റ കർവ്വ് ഇവി തുടങ്ങിയ മോഡലുകളോടായിരിക്കും ജെ5 ഇലക്ട്രിക് മത്സരിക്കുക.
51 നഗരങ്ങളിൽ 70 ഡീലർഷിപ്പുകൾ
ഇന്ത്യയിൽ സ്വതന്ത്ര പ്രവർത്തനം ആരംഭിക്കുന്നതിന് മുന്നോടിയായി ജെഎസ്ഡബ്ല്യു മോട്ടോഴ്സ് രാജ്യത്തെ 51 നഗരങ്ങളിലായി ഏകദേശം 70 ഡീലർഷിപ്പുകൾ ആരംഭിച്ചിട്ടുണ്ട്. ഏകദേശം 89 ടച്ച് പോയിന്റുകളാണ് നിലവിൽ കമ്പനിക്കുള്ളത്. 2027 ഏപ്രിലോടെ ഡീലർഷിപ്പുകളുടെ എണ്ണം 120 ആയും ടച്ച് പോയിന്റുകളുടെ എണ്ണം 150 ആയും ഉയർത്താനാണ് ജെഎസ്ഡബ്ല്യുവിന്റെ ലക്ഷ്യം. ദീപാവലി സീസണിൽ ജെഎസ്ഡബ്ല്യു ടി2 പ്ലഗ്-ഇൻ ഹൈബ്രിഡ് എസ്യുവി എത്തുന്നതോടെ ഇന്ത്യൻ വിപണിയിലെ ഹൈബ്രിഡ്, ഇലക്ട്രിക് വാഹന വിഭാഗത്തിലെ മത്സരം കൂടുതൽ ശക്തമാകുമെന്നാണ് വിലയിരുത്തൽ.
