ചെറി ഓട്ടോമൊബൈലുമായുള്ള സഹകരണത്തോടെ ജെഎസ്ഡബ്ല്യു മോട്ടോഴ്‌സ് തങ്ങളുടെ ആദ്യ പ്ലഗ്-ഇൻ ഹൈബ്രിഡ് എസ്‌യുവി 'ജെഎസ്ഡബ്ല്യു കോംബാറ്റ്' ഇന്ത്യയിൽ അവതരിപ്പിക്കുന്നു. 1,000 കിലോമീറ്ററിലധികം റേഞ്ചും മികച്ച പ്രീമിയം ഫീച്ചറുകളുമുള്ള വാഹനം 2026 ഡിസംബറിൽ പുറത്തിറങ്ങും. 30 മുതൽ 50 ലക്ഷം രൂപ വരെയാണ് ഇതിന് പ്രതീക്ഷിക്കുന്ന വില.
ഇന്ത്യൻ വാഹന വിപണിയിൽ സ്വതന്ത്ര കാർ നിർമാതാക്കളായി അരങ്ങേറ്റം കുറിക്കാനൊരുങ്ങി ജെഎസ്ഡബ്ല്യു മോട്ടോഴ്‌സ്. ചൈനീസ് വാഹന നിർമാതാക്കളായ ചെറി ഓട്ടോമൊബൈലുമായുള്ള സാങ്കേതിക സഹകരണത്തിലൂടെയാണ് കമ്പനിയുടെ വരവ്. ജെറ്റ്‌ടൂർ ടി2 അടിസ്ഥാനമാക്കിയുള്ള പ്ലഗ്-ഇൻ ഹൈബ്രിഡ് എസ്‌യുവിയായിരിക്കും കമ്പനിയുടെ ആദ്യ മോഡൽ. ജെഎസ്ഡബ്ല്യു കോംബാറ്റ് എന്ന് പേരിട്ടിരിക്കുന്ന വാഹനത്തെ 2026 ഡിസംബർ 4ന് അവതരിപ്പിക്കും.
അഞ്ച് സീറ്റുകളുള്ള പുതിയ എസ്‌യുവി മഹാരാഷ്ട്രയിലെ ഛത്രപതി സംഭാജിനഗറിലുള്ള ജെഎസ്ഡബ്ല്യു പ്ലാന്റിൽ അസംബിൾ ചെയ്യും. അടുത്ത വർഷം ആദ്യത്തോടെ വാഹനം വിൽപ്പനയ്‌ക്കെത്തുമെന്നാണ് പ്രതീക്ഷ. ഔദ്യോഗിക വില പ്രഖ്യാപിച്ചിട്ടില്ലെങ്കിലും അടിസ്ഥാന വകഭേദത്തിന് ഏകദേശം 30 ലക്ഷം രൂപയും ഉയർന്ന വകഭേദത്തിന് 50 ലക്ഷം രൂപയും പ്രതീക്ഷിക്കുന്നു. എക്സ്-ഷോറൂം വിലയാണിത്. ഈ വിലനിലവാരത്തിൽ ഹോണ്ട ഇസെഡ്ആർ-വിയുമായിരിക്കും പ്രധാന മത്സരം.
പ്ലഗ്-ഇൻ ഹൈബ്രിഡ് എൻജിൻ; 1,000 കിലോമീറ്ററിലേറെ റേഞ്ച്
ആഗോള വിപണിയിൽ വിൽക്കുന്ന ജെറ്റ്‌ടൂർ ടി2 ഐ-ഡിഎം പ്ലഗ്-ഇൻ ഹൈബ്രിഡിൽ 1.5 ലിറ്റർ ഡയറക്ട് ഇഞ്ചക്ഷൻ ടർബോ പെട്രോൾ എൻജിനും രണ്ട് ഇലക്ട്രിക് മോട്ടോറുകളുമാണുള്ളത്. 26.7 കിലോവാട്ട് അവർ ബാറ്ററിയും ഈ സംവിധാനത്തിലുണ്ട്. സമാനമായ ഹൈബ്രിഡ് പവർട്രെയിനായിരിക്കും ജെഎസ്ഡബ്ല്യു കോംബാറ്റിലും പ്രതീക്ഷിക്കുന്നത്.
Related Articles
ഹൈബ്രിഡ് സംവിധാനത്തിന്റെ സംയോജിത കരുത്ത് 381 ബിഎച്ച്പിയും ടോർക്ക് 610 എൻഎമ്മുമാണ്. മൂന്ന് സ്പീഡ് പ്രത്യേക ഹൈബ്രിഡ് ട്രാൻസ്മിഷനും വാഹനത്തിലുണ്ടാകും. എൻഇഡിസി പരിശോധനാ മാനദണ്ഡമനുസരിച്ച് വൈദ്യുതിയിൽ മാത്രം 139 കിലോമീറ്റർ സഞ്ചരിക്കാൻ ജെറ്റ്‌ടൂർ ടി2ക്ക് കഴിയുമെന്നാണ് കമ്പനി അവകാശപ്പെടുന്നത്. പെട്രോളും വൈദ്യുതിയും ചേർന്നുള്ള മൊത്തം റേഞ്ച് 1,000 കിലോമീറ്ററിലധികമാണ്.
27 മിനിറ്റിൽ 30ൽ നിന്ന് 80 ശതമാനം വരെ ചാർജ്
6.6 കിലോവാട്ട് എസി ചാർജർ ഉപയോഗിച്ചാൽ ബാറ്ററി 30 ശതമാനത്തിൽനിന്ന് 100 ശതമാനത്തിലേക്ക് ചാർജ് ചെയ്യാൻ ഏകദേശം 3 മണിക്കൂർ വേണ്ടിവരും. 50 കിലോവാട്ട് ഡിസി ഫാസ്റ്റ് ചാർജർ ഉപയോഗിച്ചാൽ 30 ശതമാനത്തിൽനിന്ന് 80 ശതമാനത്തിലെത്താൻ ഏകദേശം 27 മിനിറ്റ് മതിയെന്നാണ് ചൈനീസ് പതിപ്പിന്റെ കണക്കുകൾ. ആഗോള പതിപ്പിൽ ഫ്രണ്ട് വീൽ ഡ്രൈവ്, ഓൾ വീൽ ഡ്രൈവ് സംവിധാനങ്ങൾ ലഭ്യമാണ്. എന്നാൽ ഇന്ത്യയിലെത്തുന്ന ജെഎസ്ഡബ്ല്യു കോംബാറ്റിൽ ഫ്രണ്ട് വീൽ ഡ്രൈവ് സംവിധാനം മാത്രമായിരിക്കും ഉണ്ടാകുകയെന്നാണ് പ്രതീക്ഷ.
15.6 ഇഞ്ച് ടച്ച്‌സ്‌ക്രീൻ ഉൾപ്പെടെ പ്രീമിയം ഫീച്ചറുകൾ
പ്രീമിയം എസ്‌യുവി വിഭാഗത്തെ ലക്ഷ്യമിടുന്ന കോംബാറ്റിൽ നിരവധി ആധുനിക സൗകര്യങ്ങളുണ്ടാകുമെന്നാണ് റിപ്പോർട്ടുകൾ. 15.6 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സംവിധാനം, വയർലെസ് ആൻഡ്രോയ്ഡ് ഓട്ടോ, ആപ്പിൾ കാർപ്ലേ കണക്റ്റിവിറ്റി, 10.6 ഇഞ്ച് ഡിജിറ്റൽ ഡ്രൈവർ ഡിസ്പ്ലേ എന്നിവ പ്രതീക്ഷിക്കുന്നു. ജെഎസ്ഡബ്ല്യു ബ്രാൻഡിങ്ങുള്ള നാല് സ്പോക്ക് സ്റ്റിയറിങ് വീൽ, പനോരമിക് സൺറൂഫ്, 540 ഡിഗ്രി ക്യാമറ, അഡാപ്റ്റീവ് ക്രൂയിസ് കൺട്രോൾ എന്നിവയും വാഹനത്തിലുണ്ടാകാം. വൈദ്യുതമായി ക്രമീകരിക്കാവുന്ന വെന്റിലേറ്റഡ് മുൻസീറ്റുകൾ, ആംബിയന്റ് ലൈറ്റിങ് തുടങ്ങിയ സൗകര്യങ്ങളും ലഭിച്ചേക്കും. വില, ഇന്ത്യയിലെ കൃത്യമായ സാങ്കേതിക സവിശേഷതകൾ, ബുക്കിങ് തീയതി എന്നിവ കമ്പനി ഔദ്യോഗികമായി പ്രഖ്യാപിച്ചിട്ടില്ല. ഡിസംബറിലെ അവതരണത്തോടെ ജെഎസ്ഡബ്ല്യു മോട്ടോഴ്‌സിന്റെ ആദ്യ എസ്‌യുവിയെക്കുറിച്ചുള്ള കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷ.
