മാരുതി സുസുക്കിയും ഹ്യുണ്ടായി മോട്ടോർ ഇന്ത്യയും 2025 ദീപാവലി സീസണിൽ രണ്ട് പുതിയ ഉൽപ്പന്ന ലോഞ്ചുകൾ നടത്താൻ ഒരുങ്ങുന്നു. മാരുതി സുസുക്കി എസ്ക്യൂഡോ അവതരിപ്പിക്കുമ്പോൾ ഹ്യുണ്ടായി പുതുതലമുറ വെന്യുവിനെ അവതരിപ്പിക്കും.

ഇന്ത്യയിലെ ഏറ്റവും വലിയ രണ്ട് പാസഞ്ചർ വാഹന നിർമ്മാതാക്കളായ മാരുതി സുസുക്കിയും ഹ്യുണ്ടായി മോട്ടോർ ഇന്ത്യയും 2025 ദീപാവലി സീസണിൽ രണ്ട് പുതിയ ഉൽപ്പന്ന ലോഞ്ചുകൾ നടത്താൻ ഒരുങ്ങുന്നു. മാരുതി സുസുക്കി എസ്ക്യൂഡോ അവതരിപ്പിക്കുമ്പോൾ ഹ്യുണ്ടായി പുതുതലമുറ വെന്യുവിനെ അവതരിപ്പിക്കും. എസ്ക്യൂഡോ സെപ്റ്റംബർ 3 ന് വിൽപ്പനയ്‌ക്കെത്തും , അതേസമയം പുതിയ വെന്യുവിന്റെ ലോഞ്ച് തീയതി ഇതുവരെ പ്രഖ്യാപിച്ചിട്ടില്ല. വരാനിരിക്കുന്ന ഈ രണ്ട് എസ്‌യുവികളുടെ പ്രധാന വിശദാംശങ്ങൾ നമുക്ക് നോക്കാം.

മാരുതി എസ്ക്യുഡോ

മാരുതി സുസുക്കി പുതിയ എസ്‌യുവി പുറത്തിറക്കുമെന്ന് സ്ഥിരീകരിച്ചിട്ടുണ്ട്. എങ്കിലും അതിന്റെ പേരും വിശദാംശങ്ങളും ഇതുവരെ വെളിപ്പെടുത്തിയിട്ടില്ല. വരാനിരിക്കുന്ന മോഡൽ മാരുതി എസ്‌കുഡോ ആയിരിക്കാനാണ് സാധ്യത. ഗ്രാൻഡ് വിറ്റാരയെ അടിസ്ഥാനമാക്കിയുള്ള ഈ ഇടത്തരം എസ്‌യുവി അരീന ഡീലർഷിപ്പുകൾ വഴി മാത്രം വിൽക്കും. അതിന്റെ പ്ലാറ്റ്‌ഫോം, സവിശേഷതകൾ, ഡിസൈൻ, പവർട്രെയിനുകൾ എന്നിവ ഗ്രാൻഡ് വിറ്റാരയുമായി പങ്കിടുന്നു. 103 ബിഎച്ച്പി, 1.5 എൽ പെട്രോൾ, 116 ബിഎച്ച്പി ഹൈബ്രിഡ് പവർട്രെയിൻ, സിഎൻജി വേരിയന്റ് എന്നിങ്ങനെ മൂന്ന് ഇന്ധന ഓപ്ഷനുകളിൽ ഇത് വാഗ്ദാനം ചെയ്യാം.

ലെവൽ-2 ADAS സ്യൂട്ടും ഡോൾബി അറ്റ്‌മോസ് ഓഡിയോ സാങ്കേതികവിദ്യയും ഉൾക്കൊള്ളുന്ന ബ്രാൻഡിന്റെ ആദ്യ മോഡലാണ് പുതിയ മാരുതി എസ്‌ക്യുഡോ എന്ന് റിപ്പോർട്ട് ചെയ്യപ്പെടുന്നു. ഗ്രാൻഡ് വിറ്റാരയിൽ നിന്ന് വ്യത്യസ്തമായി അതിന്റെ മുൻഭാഗം കാണപ്പെടുമെന്ന് ചോർന്ന ചിത്രങ്ങൾ വെളിപ്പെടുത്തുന്നു. സീൽഡ്-ഓഫ് ഗ്രിൽ, ഇന്റഗ്രേറ്റഡ് എൽഇഡി ഡിആർഎല്ലുകളുള്ള പുതുതായി രൂപകൽപ്പന ചെയ്ത ഹെഡ്‌ലാമ്പുകൾ, അപ്‌ഡേറ്റ് ചെയ്ത ഫോഗ് ലാമ്പുകൾ എന്നിവ എസ്‌ക്യുഡോയിൽ ഉണ്ടായിരിക്കും.

പുതുതലമുറ ഹ്യുണ്ടായി വെന്യു

തലമുറ നവീകരണത്തോടെ, ഹ്യുണ്ടായി വെന്യുവിന് ഡിസൈനിലും സവിശേഷതകളിലും കാര്യമായ അപ്‌ഡേറ്റുകൾ ലഭിക്കും. പുതുതായി രൂപകൽപ്പന ചെയ്ത ഡാഷ്‌ബോർഡ്, പുതിയ അപ്ഹോൾസ്റ്ററി, ട്രിമ്മുകൾ, പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, നവീകരിച്ച ഇൻസ്ട്രുമെന്റ് ക്ലസ്റ്റർ, വലിയ ഇൻഫോടെയ്ൻമെന്റ് സിസ്റ്റം തുടങ്ങിയ സവിശേഷതകളോടെ അതിന്റെ ക്യാബിൻ അപ്‌ഗ്രേഡ് ചെയ്യുമെന്ന് പ്രതീക്ഷിക്കുന്നു. കോംപാക്റ്റ് എസ്‌യുവിക്ക് ലെവൽ-2 ADAS സ്യൂട്ടും പിൻ ഡിസ്‍ക് ബ്രേക്കുകളും ലഭിച്ചേക്കാം. 2025 ഹ്യുണ്ടായി വെന്യു അതിന്റെ നേരായ ലുക്ക് നിലനിർത്തും, അതേസമയം മുൻഭാഗം പൂർണ്ണമായും പരിഷ്‍കരിക്കപ്പെടും. വേറിട്ട ഇൻസേർട്ടുകളുള്ള പുതുതായി രൂപകൽപ്പന ചെയ്ത ഗ്രിൽ, പുതുക്കിയ ബമ്പർ, പുതിയ എൽഇഡി ഡിആർഎല്ലുകൾ, ഫെൻഡറുകളിൽ ഒരു ഡിസിടി ബാഡ‍്‍ജ് എന്നിവ എസ്‌യുവിയിൽ ഉണ്ടാകുമെന്ന് സ്പൈ ചിത്രങ്ങൾ വെളിപ്പെടുത്തുന്നു.

എഞ്ചിൻ സജ്ജീകരണത്തിൽ മാറ്റങ്ങളൊന്നും വരുത്തില്ല. നിലവിലെ തലമുറയിലെന്നപോലെ, പുതിയ വെന്യുവും മൂന്ന് എഞ്ചിൻ ഓപ്ഷനുകളോടെയാണ് വരുന്നത്. 83PS, 1.2L നാച്ചുറലി ആസ്പിറേറ്റഡ് പെട്രോൾ, 120PS, 1.0L ടർബോ പെട്രോൾ, 116PS, 1.5L ഡീസൽ എന്നിവയാണ് ഈ എഞ്ചിനുകൾ.