മാരുതി സുസുക്കി ഏറെ ജനപ്രിയമായ ബ്രെസയുടെ 2026 ഫെയ്സ്ലിഫ്റ്റ് മോഡലിനായുള്ള ബുക്കിംഗ് ആരംഭിച്ചു. പുതിയ ഡിസൈൻ, മെച്ചപ്പെടുത്തിയ ഇന്റീരിയർ, ടർബോ പെട്രോൾ എഞ്ചിൻ സാധ്യത എന്നിവയോടെ എത്തുന്ന വാഹനത്തിന്റെ വില ജൂലൈ 23-ന് പ്രഖ്യാപിക്കും.
രാജ്യത്തെ കോംപാക്ട് എസ്യുവി വിപണിയിൽ ഏറെ ജനപ്രിയമായ മാരുതി സുസുക്കി ബ്രെസയ്ക്ക് പുതിയ മുഖം ഒരുങ്ങുന്നു. 2026 ബ്രെസ ഫെയ്സ്ലിഫ്റ്റിന്റെ ആദ്യ ടീസർ പുറത്തിറക്കിയതിന് പിന്നാലെ വാഹനത്തിന്റെ ബുക്കിംഗും കമ്പനി ആരംഭിച്ചു. പുതിയ ബ്രെസ സ്വന്തമാക്കാൻ ആഗ്രഹിക്കുന്നവർക്ക് ഓൺലൈനായോ മാരുതി സുസുക്കിയുടെ അംഗീകൃത അറീന ഡീലർഷിപ്പുകളിലൂടെയോ വാഹനം ബുക്ക് ചെയ്യാം. ഇതിനായി 11,000 രൂപ ടോക്കൺ തുക നൽകണം.
“ഇത് സീസണിലെ ഏറ്റവും വലിയ മുന്നേറ്റമാണ്. നിങ്ങളെ അമ്പരപ്പിക്കാൻ പുതിയ ബ്രെസ എത്തുകയാണ്” എന്ന സന്ദേശത്തോടെയാണ് മാരുതി സുസുക്കി ടീസർ പുറത്തിറക്കിയിരിക്കുന്നത്. വാഹനത്തിന്റെ പൂർണ രൂപം കമ്പനി പുറത്തുവിട്ടിട്ടില്ലെങ്കിലും, പുതുക്കിയ ബ്രെസയുടെ സില്വെറ്റ് ടീസറിൽ കാണാം.
2016ൽ വിപണിയിലെത്തിയ ബ്രെസ ഇതിനോടകം ഇന്ത്യൻ വിപണിയിൽ വലിയ സ്വീകാര്യത നേടിയ മോഡലാണ്. പത്ത് വർഷത്തിനിടെ 14 ലക്ഷത്തിലധികം ഉപഭോക്താക്കളാണ് ബ്രെസയെ തെരഞ്ഞെടുത്തതെന്ന് മാരുതി സുസുക്കി വ്യക്തമാക്കി. മാരുതി സുസുക്കി ഇന്ത്യ ലിമിറ്റഡിന്റെ മാർക്കറ്റിംഗ് ആൻഡ് സെയിൽസ് വിഭാഗം സീനിയർ എക്സിക്യൂട്ടീവ് ഓഫീസർ പാർഥോ ബാനർജി പറഞ്ഞു, ഉപഭോക്താക്കളുടെ വിശ്വാസവും സ്നേഹവും പുതിയ ബ്രെസ കൂടുതൽ ഉയരങ്ങളിലേക്ക് കൊണ്ടുപോകുമെന്നും പുതിയ മോഡൽ കൂടുതൽ ആവേശകരമായ ഡ്രൈവിംഗ് അനുഭവം നൽകുമെന്നും.
Related Articles
ഡിസൈനിൽ കൂടുതൽ പുതുമകൾ നിലവിലെ ബ്രെസയുടെ ഡിസൈൻ ഭാഷ നിലനിർത്തിക്കൊണ്ടാകും ഫെയ്സ്ലിഫ്റ്റ് എത്തുക. എന്നാൽ വാഹനത്തിന് കൂടുതൽ പുതുമ നൽകുന്ന നിരവധി കോസ്മെറ്റിക് മാറ്റങ്ങൾ പ്രതീക്ഷിക്കുന്നു. പുതിയ മുൻഭാഗം, പരിഷ്കരിച്ച പിൻഭാഗം, പുതുക്കിയ ഹെഡ്ലാമ്പ് ഡിസൈൻ, പുതിയ അലോയ് വീലുകൾ തുടങ്ങിയ മാറ്റങ്ങൾ വാഹനത്തിന് കൂടുതൽ ആധുനിക രൂപം നൽകും.
ക്യാബിനിലും ഫീച്ചറുകളിലും അപ്ഡേറ്റുകൾ
അകത്തളത്തിൽ പുതിയ കളർ തീം, പുതുക്കിയ ഇൻഫോടെയ്ൻമെന്റ് സിസ്റ്റം, മെച്ചപ്പെടുത്തിയ യൂസർ ഇന്റർഫേസ് എന്നിവ ലഭിക്കാൻ സാധ്യതയുണ്ട്. പൂർണ ഡിജിറ്റൽ ഇൻസ്ട്രുമെന്റ് ക്ലസ്റ്ററും കൂടുതൽ പുതിയ ഫീച്ചറുകളും പുതിയ ബ്രെസയിൽ ഇടംപിടിച്ചേക്കും. സബ്-4 മീറ്റർ എസ്യുവി വിഭാഗത്തിലെ മത്സരം ശക്തമാകുന്ന സാഹചര്യത്തിൽ സുരക്ഷാ സംവിധാനങ്ങളിലും സൗകര്യ ഫീച്ചറുകളിലും കൂടുതൽ അപ്ഡേറ്റുകൾ പ്രതീക്ഷിക്കാം.
ടർബോ പെട്രോൾ എഞ്ചിൻ വരുമോ?
പുതിയ ബ്രെസയിലെ ഏറ്റവും വലിയ മാറ്റം എഞ്ചിൻ വിഭാഗത്തിലായിരിക്കുമെന്നാണ് റിപ്പോർട്ടുകൾ. 1.0 ലിറ്റർ, മൂന്ന് സിലിണ്ടർ ബൂസ്റ്റർജെറ്റ് ടർബോ പെട്രോൾ എഞ്ചിൻ പുതിയ മോഡലിൽ അവതരിപ്പിച്ചേക്കും. 5 സ്പീഡ് മാനുവൽ, ഓട്ടോമാറ്റിക് ട്രാൻസ്മിഷൻ ഓപ്ഷനുകൾക്കൊപ്പം ഈ എഞ്ചിൻ ലഭിക്കുമെന്നാണ് പ്രതീക്ഷ. 1.2 ലിറ്ററിൽ താഴെയുള്ള പെട്രോൾ എഞ്ചിൻ വാഹനങ്ങൾക്ക് ലഭിക്കുന്ന നികുതി ആനുകൂല്യം പുതിയ ബ്രെസയുടെ വില നിർണയത്തിലും സഹായകരമാകാൻ സാധ്യതയുണ്ട്.
സിഎൻജി മോഡലിലും മാറ്റം
പുതിയ ബ്രെസയുടെ സിഎൻജി പതിപ്പിലും ചില മാറ്റങ്ങൾ പ്രതീക്ഷിക്കുന്നു. ബൂട്ട് സ്പേസ് വർധിപ്പിക്കുന്നതിനായി അണ്ടർബോഡി സി.എൻ.ജി ടാങ്ക് സംവിധാനം ഉൾപ്പെടുത്തിയേക്കും. നിലവിലുള്ള 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ തന്നെയായിരിക്കും സി.എൻ.ജി പതിപ്പിൽ തുടരാൻ സാധ്യത. ഇത് 5 സ്പീഡ് മാനുവൽ ഗിയർബോക്സിനൊപ്പം ലഭിക്കും. ജൂലൈ 23ന് വില പ്രഖ്യാപിക്കുന്നതോടെ പുതിയ ബ്രെസയുടെ കൂടുതൽ വിവരങ്ങൾ ഔദ്യോഗികമായി പുറത്തുവരും.
