നിസാൻ മാഗ്നൈറ്റ് കുറോ സ്പെഷ്യൽ എഡിഷൻ ഇന്ത്യയിൽ പുറത്തിറങ്ങി. 8.30 ലക്ഷം രൂപ മുതലാണ് വില ആരംഭിക്കുന്നത്. പൂർണ്ണമായും കറുപ്പ് നിറത്തിലുള്ള എക്സ്റ്റീരിയറും ഇന്റീരിയറും പ്രത്യേകതയാണ്.

ജാപ്പനീസ് വാഹന ബ്രാൻഡായ നിസാൻ മോട്ടോർ ഇന്ത്യ പ്രൈവറ്റ് ലിമിറ്റഡ് മാഗ്നൈറ്റിന്റെ പുതിയ കുറോ സ്പെഷ്യൽ എഡിഷൻ ഇന്ത്യയിൽ പുറത്തിറക്കി. ജനപ്രിയ കോംപാക്റ്റ് എസ്‌യുവി നിരയ്ക്ക് ഇത് ഒരു ബോൾഡ്, ഓൾ-ബ്ലാക്ക് ലുക്ക് നൽകുന്നു. 8.30 ലക്ഷം രൂപയാണ് മാഗ്നൈറ്റിന്റെ കുറോ എഡിഷന്‍റെ പ്രാരംഭ എക്സ്-ഷോറൂം വില . ഉപഭോക്താക്കൾക്ക് നിസ്സാൻ ഡീലർഷിപ്പ് വഴിയോ കമ്പനിയുടെ ഔദ്യോഗിക വെബ്‌സൈറ്റായ നിസാൻ ഇന്ത്യ വഴിയോ ഈ വാഹനം ബുക്ക് ചെയ്യാം. ഇതിനായി ഉപഭോക്താക്കൾ 11,000 രൂപ ടോക്കൺ തുക നൽകേണ്ടിവരും.

ജാപ്പനീസ് ഭാഷയിൽ കുറോ എന്ന വാക്കിന്റെ അർത്ഥം 'കറുപ്പ്' എന്നാണ്, ഇത് ഈ പ്രത്യേക പതിപ്പിന്റെ ആകർഷകമായ പ്രമേയത്തെയും പ്രതിഫലിപ്പിക്കുന്നു. പൂർണ്ണമായും കറുപ്പ് നിറത്തിലുള്ള എക്സ്റ്റീരിയറും ഇന്റീരിയറും ഉള്ളതിനാൽ, പ്രീമിയവും പ്രത്യേകവുമായ ഡിസൈൻ ആഗ്രഹിക്കുന്ന വാങ്ങുന്നവർക്കുള്ളതാണ് കുറോ സ്പെഷ്യൽ എഡിഷൻ. ഇന്ത്യൻ വിപണിയിൽ, മാരുതി ബ്രെസ, ഹ്യുണ്ടായി വെന്യു, കിയ സോനെറ്റ്, ടാറ്റ നെക്സോൺ തുടങ്ങിയ മോഡലുകളുമായി ഈ കാർ മത്സരിക്കും.

അകത്തും പുറത്തും പൂർണ്ണമായും കറുപ്പ് നിറത്തിലുള്ള ഒരു ട്രീറ്റ്മെന്റ് ഈ കാറിന് ലഭിക്കുന്നു. അതിൽ പിയാനോ ബ്ലാക്ക് ഫ്രണ്ട് ഗ്രിൽ, കറുത്ത സ്കിഡ് പ്ലേറ്റുകൾ, കറുത്ത റൂഫ് റെയിലുകൾ, കറുത്ത ഡോർ ഹാൻഡിലുകൾ എന്നിവ ഉൾപ്പെടുന്നു. ലൈറ്റ്‌സേബർ ടേൺ ഇൻഡിക്കേറ്ററുകളുള്ള സിഗ്നേച്ചർ ബ്ലാക്ക് എൽഇഡി ഹെഡ്‌ലാമ്പുകൾ ഷാർപ്പായിട്ടുള്ളതും ആകർഷകവുമായ രൂപം നൽകുന്നു. ഫെൻഡറുകളിലും R16 ഡയമണ്ട്-കട്ട് അലോയ് വീലുകളിലും 'കുറോ' ബ്രാൻഡിംഗ് കാണപ്പെടുന്നു.

മിഡ്‌നൈറ്റ് തീം ഡാഷ്‌ബോർഡ്, പിയാനോ ബ്ലാക്ക് ആക്‌സന്റുകൾ, സേബിൾ ബ്ലാക്ക് വയർലെസ് ചാർജർ എന്നിവയ്‌ക്കൊപ്പം പ്രീമിയം ഇന്റീരിയർ ലഭ്യമാണ്. അഞ്ച് ഇഞ്ച് അഡ്വാൻസ്‍ഡ് ഡ്രൈവർ അസിസ്റ്റ് ഡിസ്‌പ്ലേയും വാക്ക്-എവേ ലോക്ക്, അപ്രോച്ച് അൺലോക്ക് സവിശേഷതകളും സ്റ്റാൻഡേർഡായി ഇതിലുണ്ട്. ടർബോ-പെട്രോൾ, നാച്ചുറലി ആസ്പിറേറ്റഡ് പെട്രോൾ എഞ്ചിൻ ഓപ്ഷനുകളിൽ ലഭ്യമാണ്. അതേസമയം, അധിക സുരക്ഷയ്ക്കായി സ്റ്റെൽത്ത് ഡാഷ് കാം ആക്‌സസറി ഉൾപ്പെടുത്തിയിട്ടുണ്ട്.

പുതുതായി പുറത്തിറക്കിയ നിസാൻ മാഗ്നൈറ്റ് കുറോ സ്പെഷ്യൽ എഡിഷൻ 1.0L നാച്ചുറലി ആസ്പിറേറ്റഡ് പെട്രോൾ, 1.0L ടർബോ പെട്രോൾ എന്നിങ്ങനെ രണ്ട് എഞ്ചിൻ കോൺഫിഗറേഷനുകളിലായി നാല് വേരിയന്റ് ഓപ്ഷനുകളിൽ ലഭ്യമാണ്. ആദ്യത്തെ എഞ്ചിൻ 160Nm-ൽ പരമാവധി 72bhp പവർ നൽകുന്നു, രണ്ടാമത്തേത് 100bhp-യും 160Nm-ഉം നൽകുന്നു. ട്രാൻസ്‍മിഷൻ തിരഞ്ഞെടുപ്പുകളിൽ അഞ്ച് സ്പീഡ് മാനുവൽ (സ്റ്റാൻഡേർഡ്), അഞ്ച് സ്പീഡ് AMT (NA വേരിയന്റുകൾ മാത്രം), ഒരു സിവിടി (ടർബോ-പെട്രോൾ വേരിയന്റുകൾ മാത്രം) എന്നിവ ഉൾപ്പെടുന്നു.